Yurt uchun koʻrk oʻtmishning sasi

0
92
marta koʻrilgan.

Xolilla DAVLATNAZAROV

 

 OQCHAKOʻL

 

Tarixing kuylasa ne-ne asrlar,

Sado bergay necha qoʻrgʻon-qasrlar,

Yozilib, aytilib koʻp taxmin-sirlar,

Ulugʻlab, dongʻingni yoygan Oqchakoʻl!

 

Zardoʻsht necha marta suzdi suvingni,

Kezib Sulton Vayis kabi togʻingni,

Turon-Turkistonda zahru bolingni

Qoraqalpogʻing ham totgan Oqchakoʻl!

 

Choʻl-sahrolar toʻnab koʻchu karvoning,

Qumday maydalandi umid-armoning,

Koʻrar koʻzimiding qadim daryoning,

Oqqushlar oshiq boʻp qoʻngan Oqchakoʻl!

 

Goho muz kurshanding hatto savrda,

Yashab koʻrding ne zamon, ne davrda,

Qizilqumlar chekkan oʻtli hovurda

Maysa-oʻlanlaring yongan Oqchakoʻl!

 

Noming balki oqcha bulutli osmondan,

Oqcha qordanmi yo aqcha sochgandan,

“Aqchaxon qalʼaday” mashhur dostondan

Yodgorlik boʻp meros kolgan Oqchakoʻl!

 

Suv bejo toʻlgʻonsa, mard dehqonlaring

Teng tortishdi zamon imtihonlarin,

Oq siynasin silab ne jononlarning

Muhabbat mavjida qolgan Oqchakoʻl!

 

Oʻtmishing bor moziylardan teranday,

Qoʻllovching qirq chilton – gʻaybul-eranday,

Oltin ivitilgan kumush zarangday,

Jamoling koʻz yogʻin olgan Oqchakoʻl!

 

Yurt uchun ham bir koʻrk oʻtmishning sasi,

Boʻstonga ilhomdir shu ovozasi,

Qoratovning qaraydigan koʻzgusi –

Oy misoli oppoq toʻlgan Oqchakoʻl!

 

Qat-qat kechmishingday qalin oʻy bosgan,

Ayozqalʼang – togʻlar bilan boʻylashgan,

Men ham senday sado bermay qolmasman:

“Xalqim! Ona Vatan!” deya Oqchakoʻl!

 

 

QANOTLAGIM KELAR QALDIRGʻOCH BOʻLIB

 

Yer-koʻk koʻp eshitgan, qancha koʻz koʻrgan,

Haqiqat hamisha tashbeh izlarkan,

Men ham koʻngillarga suluv soʻzlardan

Uya qurgim kelar qaldirgʻoch boʻlib.

 

Ipakday yumshoq soʻz, yoqimli yorni,

Muhabbat fasli deb goʻzal bahorni,

Shirin orzu-umid, sogʻinishlarni

Olib uchgim kelar qaldirgʻoch boʻlib.

 

Bagʻishlov baxsh etib otgan tonglarga,

Yukinsam, tabiat bergan ranglarga,

Qanoti qotmagan palaponlarga

Vaʼz oʻqigim kelar qaldirgʻoch boʻlib.

 

Qismat azobidan jonlar bezinib,

Nozik hislar qolsa giryon, ezilib,

Bir butun dunyoni yaxlit sezinib

Sayragim keladi qaldirgʻoch boʻlib.

 

Har neni bir tatib chirkillar chumchuq,

Qargʻa urmoqqa oʻch haromga tumshuq,

Shubhali luqmadan gard olmas chimdib –

Yashagim keladi qaldirgʻoch boʻlib.

 

Vaqt ila bahslashsa, umr karvoni,

Tanglayga taʼm bersa, baxtning zamoni,

Yonib-titrab yotgan oʻksik dunyoni

Qanotlagim kelar qaldirgʻoch boʻlib.

 

Qoraqalpoq tilidan Muzaffar AHMAD tarjimasi

 

“Sharq yulduzi” jurnali, 2015–2

MULOHAZA BILDIRISH

Mulohaza kiritilmadi!
Ismi sharifingizni kiriting.