“Yoniq boʻlsa sening chirogʻing”

0
117
marta koʻrilgan.

Yigʻilishdan soʻng…

 

Majlis tugaydi.

Farrosh

kirib kelar katta saroyga

 

polyuvgichini olib

qarsaklarni yigʻa boshlaydi.

 

xom, chala pishgan

pismiq qarsaklar.

nomiga yangragan va yoki

ikki kaft orasida yorilib

shu zahoti jon bergan qarsaklarni

artib olar stollar aro.

 

minbar ustida esa

pastroq parvozlagan yalongʻoch ovoz

turadi hanuz…

 

Uchinchi xulosa

 

bu rasmni sevaman uygʻoq,

bu rasmda yigʻlamli alam:

bola

qoʻlida non.

qonagan

labi qizil va alvon non ham.

 

xulosalar ingichka oʻtkir

yoki keskir ustaradek tan,

tamakini chekib kuzatib,

xulosalar urchir

masalan:

 

qiyinchilik qobirgʻasi-la

qismatining ipi bitishgan.

gung ochlikning nihoyasida

labi qonab nonga yetishgan

yoki boshqa xulosa mana:

 

sagʻirlikda qolgandir omon,

labi maysa kabi yumshoqdir…

lablarini kesgan qattiq non.

 

uchinchi xulosa qoʻrqinchli

(sigʻmay qolar yuvoshroq ongga)

millatini sotgan yovni oʻldirib,

soʻng

botirgan nonini qonga!..

 

bu rasmni sevaman uygʻoq…

 

Dilparchalar

 

1

Ikki koʻzing – ikkita quduq:

Biriga gul ekdim,

Biriga esa tashladim tanga…

Gul soʻldi…

Tanga esa hanuz yaltirar…

Tubda…

 

2

Xush koʻraman

Chuqur kissali kiyimni.

Koʻproq narsa yashirsa boʻlar,

Koʻmib qoʻysa boʻlar kaftimni.

 

Choʻntakka yashirilgan narsa

Bilinmasligi kerak.

Yoki jim boʻlmogʻi lozim…

Ogʻzim – yonboshlagan choʻntak.

 

3

Qorongʻi va sovuq uyda

Eʼtiqod kuchayar.

Issiq boʻlsa gunoh istagi…

 

Yuz yil yorugʻlik koʻrmagan odam

Kalit teshigidan tushgan nurni

Xudoning yolqini deb oʻylar tayin…

 

4

Tongda oyna oldida turib

Ayolingga qilgan xiyonating

Yodingga tushsa.

 

Galstuk bogʻlayotgan qoʻllaring

Titrasa –

Siqishi kerak boʻlgan bogʻichni

Bor kuching bilan tortsang…

 

… ishga ketasan galstuk bogʻlamay…

Bor kuchi bilan seni tortar

Yana xiyonat…

 

5

Bekatlarni kuzatsang. Ketsang.

manzil istagan odam – chiroyli.

Odam – chiroyli.

 

Bekatlarni kuzatsang. Tushsang.

Ketayotgan odamlar – goʻzal.

Odamlar – goʻzal.

 

Bekatlarni kuzatsang. Kutsang.

Kelmasa sen kutgan avtobus.

Kutishga aylansang…

 

Faqat kuzatsang goʻzal odamlarni…

Seni payqamasa hech kim…

 

6

Yoniq boʻlsa sening chirogʻing

Qush boʻlsamu oynangga ursam,

Gʻussadan ezilgan vujudni.

 

Ayoz boʻlsa tashqari. Sovuq.

Derazangni ochsang baribir.

Qoʻllaringga olsang ohista

Gʻussadan ezilgan vujudni.

 

Mehribon koʻzlaring yumilib

Qoʻllaring boylansa boʻyniga

Gʻussadan ezilgan vujudni…

 

Qora paltoimga oʻrab shaharni

Darbadar aylantirib qaytaman

Gʻussadan ezilgan vujudni.

 

Sovuq toʻshagimga yotqizib

Uxlashin kutaman tun boʻyi

Gʻussadan ezilgan vujudni…

 

Abdulazizxon AKRAMOV

 

“Yoshlik” jurnali, 2017–11

MULOHAZA BILDIRISH

Mulohaza kiritilmadi!
Ismi sharifingizni kiriting.