Yiroqlardan togʻlar jimirlab boqar

0
122
marta koʻrilgan.

Sogʻinch

 

Qish choʻzilib ketdi.

Zerikdim juda.

Sogʻindim koʻklamni, soʻlgʻindir ruhim.

Deraza yoniga

borib behuda

Qor sukunatiga tikilaman jim.

 

Chinorlar tek qotgan,

tik qotgan terak.

Archalar shoxini eggan oq zalvor.

Hovuzcha muz qotgan.

Menda muz yurak.

Ruhsiz shivirlayman: “Qaydasiz, bahor?..”

 

Bahor kelsin, kelsin,

ketgum togʻlarga,

Charchoq hayotimni ketgumdir tashlab.

Yuzlarimni yuvgum

oq buloqlarga,

Unda oʻtirmayman koʻzimni yoshlab.

 

Qish choʻzilib ketdi…

 

Gujum ostida

 

Gujum osti loysupa,

yozilgan guldor kigiz,

gurunglashar ustida

oʻtirishib bir toʻp qiz.

Orzular inja-inja,

koʻzlarda suvratlanar,

dil tubidagi soʻzlar

tillarda kurtaklanar.

Yonda paxsa devorlar,

ular osha tirmashib,

qovoqlar gullab yotar

oshiqlardek chirmashib.

Oftobning shuʼlalari

gullarida oʻynaydi,

qizlarning nigohlari

qarab-qarab toʻymaydi.

Faqat ular bittasi

qoʻshilmaydi gurungga,

qoʻlroʻmolcha tikadi

hech kim bilmaydi, kimga.

Nega gapirmaysan der,

buncha pismiq boʻlmasa,

hoy, qizlar qitiqlaymiz,

agar sirin aytmasa.

Shaddod qizlar, shoʻx qizlar,

qitiqlab ketar uni.

Pismiq qiz astagina

aytib qoʻyar sirini.

Gujum osti loysupa,

yozilgan guldor kigiz,

birdan jiddiy tortadi

oʻtirishgan gala qiz…

 

Samoviy

 

Samoviy jismlardan

saqlamoq boʻlib yerni,

Koʻkka qancha olimlar

tikmishdir nigohlarin.

O, balli, balli! Faqat

unutmasinlar, gohi –

er tomon ham qaratib

tursinlar nigohlarin…

 

Kimdan?

 

Kimdan vafo topdim,

doʻst-yorondanmi,

Yuragim oʻgʻrisi – yorimdanmi yo?

Bugʻdoy donidanmi

yo somonidanmi,

Bilmayman, oʻzing ayt, ey, makkor dunyo?..

 

Shafaq

 

Tovusning par-patlari,

Qirgʻovul qanotlari,

Yelpigʻich qat-qatlari,

Shom shafagʻida jam.

 

Qir-adir chechaklari,

Gulbogʻ kapalaklari,

Chashma ninachilari,

Shom shafagʻida jam.

 

Kuzgi zardolizorim,

Samarqandiy gulzorim,

Qontalash – yurak zorim,

Shom shafagʻida jam.

 

Togʻlar

 

Sahrolardan, bogʻlardan kechdim,

Burgut kabi balandlab uchdim,

Choʻqqilardan choʻqqiga koʻchdim,

O, bunchalar goʻzal bu togʻlar?!

Daralarga ochib keng quchoq,

Quchogʻida yayradim uzoq,

Koʻkida oy – chashma yarqiroq,

O, bunchalar goʻzal bu togʻlar?!

Havolarda ajib-ajib hol,

Naʼmataklar qoyada xushhol,

Ranglar zilol, ohanglar zilol,

O, bunchalar goʻzal bu togʻlar?!

Kakliklari bilan ellashdim,

Tugʻdonalar bilan tillashdim,

Andizlari bilan sirlashdim,

O, bunchalar goʻzal bu togʻlar?!

Buloqlarda yuvdim yuzimni,

Oydinlatdi xira koʻzimni,

Charaqlatdi tun, kunduzimni,

O, bunchalar goʻzal bu togʻlar?!

 

Yoz chillasi

 

Yelkador adirlar…

Qirqim qirlar… Dasht…

Oftoboʻt hovuri yoyilib oqar.

Toqqa borayapman,

otim yoyar toʻsh,

Yiroqlardan togʻlar jimirlab boqar.

Bari oldda hali…

Jizillovuqlar

“Jiz-z-jiz-z…”idan boshqa bunda yoʻq bir sas.

Jizgʻanak yotibdi

qoʻziquloqlar,

Toʻrgʻaylar tomogʻi bulkillar, xolos.

Toʻp-toʻp gulxayrilar

gulkosasida

Semiz govzanbirlar gʻimirlar… Uchar…

Yumronlar qaydandir

paydo gohida,

Xayolim chatnaydi: “Qaydan suv ichar?..”

Qirlarning toʻshida

suruv yotogʻi

Bir-birin pinjida qoʻylar, echkilar.

Bir shoxdor serkaning

goh qoʻngʻirogʻi

(Soʻna chaqdimikin) ilkis jiringlar.

Chu, jonvor, chanqama,

horima otim,

Ana, koʻrinmoqda tarvuz paykali.

Yoʻlbarstus tarvuzlar

dumalab yotar,

Yurakka oʻxsharkan ular barglari.

Oqquvray oʻralgan

chayla ichida,

Qaragil, kimlardir borga oʻxshaydi.

Otimni buraman.

bir cholu kampir

meni kutib olar… Sholcha toʻshaydi.

Tarvuz keltirishar…

Urunchoq kampir

choliga soʻying deb qiladi imo.

Bir ertak singari

gurung boshlanur,

Butkul unut erur ortdagi dunyo…

Yelkador adirlar…

Qirqim qirlar… Dasht…

 

Azim SUYUN

 

“Sharq yulduzi”, 2014–4

MULOHAZA BILDIRISH

Mulohaza kiritilmadi!
Ismi sharifingizni kiriting.