Topishmoq va tez aytishlar

0
5020
marta ko‘rilgan.

TOPISHMOQLAR

 

***

Quyoshda tovlanadi,

Shirasi til yoradi.

Hidi tutar falakni,

Biz yesak…

 

***

U bo‘ladi yong‘oqli,

Murabbo va qaymoqli.

Shokoladli, pushti oq,

Muzdekkina…

 

***

To‘ni yashil, ichi qizil,

Qo‘lga olsang zilu zambil.

Pishar vaqti yozu kuz,

Uning nomidir…

 

***

O‘rtog‘im ruchka, qalam,

Bir chiziq, katak dalam.

Ikkichiga kaptarman,

A’lochiga…

 

***

Qattiq, yumshoqdir jsmim,

Xatoni o‘chirgum jim.

Eng yaqin do‘stim chizg‘ich,

Meni derlar…

 

***

Kech kuzgacha uzilmas,

To yozgacha buzilmas.

Derlar ming dardga davo

Uning nomidir…

 

***

Taomiman Navro‘zning,

Umidiman rizq-ro‘zning.

Doshqozonda pishaman,

Goh ko‘pirib toshaman.

Ijobat bo‘lar tilak,

Pishirsa kim…

 

***

Bargim ingichka,

Qad-bastim novcha.

Hidlab ko‘r hargis,

Ismimdir…

 

***

Gullari mayda-mayda,

Bo‘yog‘i siyoh rangda.

Sog‘intirib xush atrin,

Ochiladi…

 

***

Yer tagida yetilar,

Ko‘p vitaminli bo‘lar

Shirasi bor, lek tuzsiz,

Palov pishmaydi usiz.

 

***

Yog‘ib qolsa qor, yomg‘ir,

Izlab qolasiz zir-zir.

Men-la boshingiz omon,

Men-la yo‘lingiz ravon.

 

***

Yugurib yetolmaysiz,

Bir zum to‘xtatolmaysiz.

Kim mazmunli o‘tkazar,

Kim behuda-yu bekor.

 

***

U gilosning ukasi,

Biroz nordon mazasi.

 

***

Ichida g‘ij-g‘ij bilim,

Unda hayot yashirin.

 

***

Kitob, daftar, qalamlar

Bir yerga to‘p jamlanar.

 

***

To‘rqovoqdan uyi bor,

Sayrasa qo‘shig‘i bor.

 

***

Yashash joyi Afrika,

Bo‘yni uzun va tikka.

 

***

Gugurt qutidek kelar,

Uzoqni yaqin qilar.

 

***

Ninasi ko‘p tikolmaysan,

Koptok qilib o‘ynolmaysan.

 

***

Oylarning eng boshiman,

Qishning ko‘zu qoshiman.

Yozaman oq dasturxon,

Yangi yil menga mehmon.

 

***

Chimchilaydi yuzingni,

Yoshlatadi ko‘zingni.

Ignasin sanchib olar,

Burning qizarib qolar.

 

***

Ochlik va suvsizlikni

Yengib o‘tgan jonivordir,

“Cho‘l kemasi” atalgan

Ko‘p mashhur nomi bordir.

 

***

U bahorning uchog‘i,

Bolalarning o‘yinchog‘i.

Katta-kichik qamishlar

Bu uchoqning belbog‘i.

 

***

Tekis, to‘rtburchak taxta

Bahs maydonga aylanar.

Oq va qora raqiblar

Naq hujumga shaylanar.

 

***

Baliq emas suzadi,

Bog‘-dalani kezadi.

Chuvalchang, qurt-qumursqa

Bo‘lar unga ozuqa.


 

 

TEZ AYTISHLAR

 

Muzxonada muzlagan muzdekkina muzqaymoq.

 

***

Sojida-yu Saodat sinfdosh va sirdoshlar.

 

***

Chang ko‘chani changitib chuqur soyda cho‘mildim.

 

***

O‘lmas, O‘ktam o‘rtoqlar,

O‘t o‘rishdi o‘tloqda.

 

***

Qora, qizil qalamni qalamdonga qamadim.

 

***

Katta-katta ko‘zmunchoq,

Ko‘ylagimga ko‘rk munchoq.

 

***

Chirq-chirq-chirq, chug‘urladi chug‘urchuq.

 

***

Chori chayilgan choynakka choyni chamalab soldi.

 

***

Yozda yoqqan yoz yomg‘iri yon atrofga yog‘dek yoqdi.

 

***

Tal’at ta’tilda tanlovga tayyorlandi.

 

***

Qahraton qishning qahri qarg‘ani quvontirdi.

 

***

Chumchuq, chittak chug‘urlashib

Chumolini cho‘qir shoshib.

 

***

Tolib to‘pni topib tepdi,

G‘olib to‘pni tolib tepdi.

 

***

Ignadirman ingichka,

Bellarim ip-ingichka.

 

***

Shirinnning shirchoyiga shiringina shirmoynon.

 

***

Qayiq qirg‘oqda qimirlab turibdimi,

Ayiq qirg‘oqda g‘imirlab yuribdimi?

 

***

O‘yinni o‘ylab o‘ynadim,

O‘yinni o‘ynab o‘ynadim.

 

***

Shavkat sharbatni Sharifga tutdimi,

Sharif Shavkatga sharini tutdimi?

 

***

Mastura va Mastona maktabda mahmadona.

 

***

Gunafshaning gullari gurillabdi, gullabdi.

 

***

Piyolalik ey bola,

Piyolang guli lola.

 

***

Qumrining qo‘g‘irchog‘i qimirlasa qiqirlar.

 

***

Qarg‘a qag‘illar qar-qar,

Qirni qalin qor qoplar.

 

***

Qobil, Qo‘chqor va Qurbon

Qordan qurdilar qo‘rg‘on.

 

***

Qopin qo‘yib qorbobo

Qo‘lqopini qidirdi.

Qorqiz qalin qalpog‘in

Qulog‘iga qo‘ndirdi.

 

***

Savatdagi sariq sabzi

Sarg‘ayibdi, so‘libdi.

Saodat-chi sabzilarni

Suvga solib qo‘yibdi.

 

***

Mening mitti mushukcham

Mitti mushtlarin mushtlar.

 

***

Tuflining tagi tuproq,

Tozala Tolib tezroq.

 

***

Donogina Durdona Diyoraga dugona.

 

***

Ra’no rasmlariga rang-barang rang tanladi.

 

***

Qora qog‘ozning qattiq qirrasi qo‘limni qirqdi.

 

***

Bulut bulutga, burgut burgutga ergashadi.

 

***

Qora-qura qo‘zilar

Qirda quvonib o‘tlar.

 

***

Katakdagi kaklikka Karim kaftini tutdi.

 

***

O‘roq o‘xshar so‘roqqa,

So‘roq o‘xshar o‘roqqa.

 

***

Chuvalchang chuvalashib chirmoviqa chirmashdi.

 

***

Sumalakning sim-sim siri sayyohlarga so‘roq bo‘ldi.

 

***

Temur turnikda turibdimi,

Turg‘un tepada yuribdimi?

 

***

Erkin ekkan ekinlar

Dalani erkin enlar.

 

***

Sobirning sozi sozli,

Sahnada sof ovozli.

 

***

Yormat yozda o‘tin yordi,

Yorqin yordamga bordi.

 

***

U yon-bu yon yurar quyon,

Yov yovlasa yugurar quyon.

 

***

Mard maydonda mardona,

Nomard mardga begona.

 

***

Belbog‘ini belga bog‘lab,

Bog‘bon bobo boqqa bordi.

 

***

Dorivor daraxt do‘lana

Mevasi dona-dona.

 

***

Ko‘k koptokni kaftda tutib,

Ko‘kka otdim kerilib.

 

***

Qora qarg‘a qorga qo‘ndi,

Qorni cho‘qib, “qar” deb qo‘ydi.

 

***

Qorboboning qo‘lida qop,

Qopida qat-qat o‘yinchoq.

 

***

Ana alpdek asil archa,

Ayiq, arslon ildi zarcha.

 

***

Bobo, bobo qorbobo,

Bog‘-rog‘larga boq bobo.

 

***

Taom ta’min tuy o‘rtoq,

Tur o‘rningdan, tur tezroq.

 

***

Jamol, Jalol jo‘ralar,

Boqdi jajji jo‘jalar.

 

***

To‘rtta topqir topaloq,

Topishmoq topar quvnoq.

 

***

Ko‘m-ko‘k kurtak, ko‘katlar

Ko‘klamga ko‘rk ko‘rsatar.

 

***

Botir, Boir, Bahodir,

Bilagi zo‘r bahodir.

 

 

TOPISHMOQLARNING JAVOBLARI

 

Xandalak, muzqaymoq, tarvuz, daftar, o‘chirg‘ich, qovoq, sumalak, nargis, nastarin, sabzi, soyabon, vaqt, olcha, kitob, papka, bedana, jirafa, telefon, tipratikan, yanvar oyi, ayoz, tuya, varrak, shaxmat, o‘rdak.

 

Zahro HASANOVA

MULOHAZA BILDIRISH

Mulohaza kiritilmadi!
Ismi sharifingizni kiriting.