Tiriklik bu tansiq bayramdir

0
146
marta koʻrilgan.

 VATAN

 

Jamalaksoch qizcha edim,

Qirlarda oʻynab

Boychechaklar terar eding

Yonimda, Vatan.

Bolalikning qoʻshigʻiga

Joʻr boʻlib kuylab,

Sevgi boʻlib uygʻonding sen

Jonimda, Vatan.

 

Meni yoʻllar oʻz izmiga

Oldi kun sayin,

Tinim bilmas sayyoh kabi

Yeldim, yugurdim.

Qoʻsha-qoʻsha sevinch topdim,

Yoʻqotdim qoʻsh-qoʻsh,

Baxtdan sarxush, gʻamdan noxush

Onimda – Vatan.

 

Kaftlarimning qadogʻiga

Oftob sochdi don,

Yuragimga bir alanga

Tushdi hayotdan.

Koʻzlarimning qarogʻiga

Jo boʻldi osmon,

Yeru koʻkni qamragan –

Imkonimda – Vatan.

 

Shoxlarida tillo beshik

Keltirdi Bugʻu,

Va men aytdim onalarning

Buyuk allasin,

Irmoqlari had-hisobsiz

Daryoday toshdim.

Hayajonim, toshqinli

Tugʻyonimda – Vatan.

 

Sochlarimga oq togʻlarning

Boʻyogʻi koʻchdi,

Izzat-obroʻ oʻtrusida

Kechdi bor umrim.

Shukronamning daraxtlari

Tugdi tar meva,

Eldan topgan duoyi

Dostonimda – Vatan.

 

SIZGA

 

Sizga menday mehribon yoʻq,

Menga Sizday – soyabon.

Sizga menday vafodor yoʻq,

Menga sizday – havodor.

 

Koʻksingizga otilsa oʻq,

Mendayin balogardon yoʻq.

Koʻngil aytar: to oʻlguncha

Bizday doʻsti qadrdon yoʻq.

 

Menga Sizday habib yoʻqdir,

Sizga menday tabib yoʻq.

 

YURAGIMGA

 

Chap qovurgʻam ostini gʻashlab

Kuydiradi simillab bir choʻgʻ.

Qafasini sindirib tashlab,

Chiqaman deb tunlar qilar doʻq.

 

Chirmab oldi gʻamlar quyuni,

Yuragim, ne chohlarga tushdik.

Chirpiratdi taqdir oʻyini,

“Borsa-kelmas” rohlarga tushdik.

 

Asta-sekin taʼsir qilguvchi

Ogʻu kabi dardlarni koʻrdik.

Yolgʻiz Alloh oʻzi bilguvchi,

Bugʻdoy ekib, goh arpa oʻrdik.

 

Uyasiga ilon dorigan

Qushday goho qoldik chirqillab.

Yetmish yil qoʻsh haydab horigan

Boʻlsak hamki, turibmiz gullab.

 

Tark etmagin, yurak, loshimni,

Hali borar yoʻlimiz yiroq.

Toshdan dedim bu bardoshimni,

Boʻlsa hamki qalbim ming quroq.

 

Hali borar yoʻlimiz yiroq…

 

MANZARA

 

Tizza boʻyi qor kechib borar

Qush izlari,

Onam izlari.

Suvloq suvin qaymoqqa qorar

Onamning bol kabi soʻzlari.

 

Tong saharlab ariq boshida

Lampashishalarni yuvadi.

Oftob tushib koʻzu qoshidan

Shisha qurumlarin quvadi.

 

Oqshom uyning eshiklarida

Charaqlaydi osma fonuslar.

Fonuslarning piliklarida

Jam boʻladi gʻuj-gʻuj yulduzlar.

 

Tokchadagi har nur, soyani

Lipillatib oʻynaydi xayol.

Tashqarida – gʻoʻzapoyaning

Gʻaramida uxlaydi shamol.

 

Kavushchalar toʻla keng ayvon

Tunni haydab, turadi ushlab.

Tun xonaga kirolmay hayron,

Sahargacha chaladi hushtak.

Ertak aytar osma fonuslar.

 

GʻANIMAT DAMLAR

 

Bu dunyoga hamma gʻanimat,

Hech kim boʻlmas dunyoga ustun.

Gar mol-mulkat bir pulga qimmat,

Joning sabil tiriklik uchun.

 

Roʻzgʻor – gʻorning chuvalgan toʻri

Oʻrab tashlar oyoq-qoʻlingni.

Goh tulkisan, gohida boʻri,

Yoʻqotasan yurar yoʻlingni.

 

Qoʻllaringda sayragan toring

Chertilmasa tob tashlar, tinar.

Choʻqqilarda charx urgan soring

Oʻlja quvib, qanoti sinar.

 

Tun kechalar sukunatidan

Topolmaysan sehrli ertak.

Zim-ziyolik koʻzing olarkan,

Yulduzlar ham ovutmas andak.

 

Quchogʻingda oyday toʻlganlar

Farzandlaring osmonday yiroq.

Bolalikda yoqqan gulxanlar

Olovida boʻlma isinmoq.

 

Junjikasan, boʻm-boʻsh bagʻringda

Burqsib yotar kuz xazonlari.

Insho bitar sening toʻgʻringda

Xattot kuzning zar mezonlari.

 

Insholarning xulosasida

Baxtmi yoki ranju alamdir…

Men oʻqiyman kuz nafasida:

Tiriklik bu tansiq bayramdir!

 

Oydin HOJIYEVA

 

“Yoshlik”, 2014 yil 3-son

MULOHAZA BILDIRISH

Mulohaza kiritilmadi!
Ismi sharifingizni kiriting.