Tavallo

0
250
marta koʻrilgan.

Oʻqing Anvar qori, oʻqing, birodar,

Muqaddas Qurʼonning oyatlaridan.

Ruhimga tinimsiz yogʻdular yogʻar,

Cheksiz samovotning qavatlaridan.

 

Oʻqing “Fotiha”ni, oʻqing “Yosin”ni,

Tavba eshiklari ochilsinlar lang.

Tazarru deb biling koʻzda yoshimni,

Oʻqing, barchamizga shafoat tilang.

 

Oʻqing, bor gunohlar butkul toʻkilsin,

Arshgacha yuksalsin savobning haddi.

Oʻqing yovuzlikning beli bukilsin,

Toki ezgulikning rost boʻlsin qaddi.

 

Insonni ming yillar jaholatidan

Asliga qaytargan iymon-ku axir.

Oʻqing, ilohiy soʻz haroratidan

Erisin hattoki tosh qotgan bagʻir.

 

Oʻqing, zarra gʻubor qolmasin dilda,

Kunduz quyosh guvoh, tunda guvoh oy.

Moʻminlar qatori oʻsha manzilda

Bormikan menga ham tangachalik joy?..

 

Abdulla ORIPOV,

Oʻzbekiston Qahramoni, xalq shoiri

MULOHAZA BILDIRISH

Mulohaza kiritilmadi!
Ismi sharifingizni kiriting.