Тақдир

0
251
марта кўрилган.

Айб мендамас, гулим,

ҳисларим ёнди,

Сизни чиндан севдим, гуноҳим йўқдир.

Бошимга тушганин кўз кўрар энди,

Кўзимни йўлларга боғлади тақдир.

 

Бунчалар гўзалсиз, бунчалар нафис,

Дод дейми, оҳ дейми, ёлворай – нетай?!

Кўнглимнинг тубида очилган наргис,

Сизга зилол сувдай қўшиқлар айтай.

 

Балки сезмассиз ҳам, бу мунис нигоҳ

Жонимга қанчалар лазизлигини.

Момогулдуракдай юрагим шу чоқ

Бир титроқ олдида ожизлигини.

 

Биламан, ўй кўп-у, йўқдир имконим,

Сизга етмоқ қайда, сиз ойдай олис.

Жоним, ўртанади энди бу жоним,

Жонимни майдалаб ёқиб борар ҳис.

 

Нетай, ўз кўнглимга етмайди кучим,

Ортга қайтай десам энди йўл йўқдир.

Умримни сиз билан боғламаса ҳам,

Кўзимни йўлларга боғлади тақдир.

 

Ориф Толиб

 

2010

МУЛОҲАЗА БИЛДИРИШ

Мулоҳаза киритилмади!
Исми шарифингизни киритинг.