Sukunatga choʻkayotgan qichqiriqman

0
179
marta koʻrilgan.

 * * *

Orzu – kamalakrang,

Umid – zangori,

Sevgi… qish qoridan ham oppoq edi!

Mehr yashillikni olgan maysadan,

Nafrat – tun.

Yoʻq, undan qoraroq edi.

 

Sogʻinch – zaʼfaronroq edi kuzakdan,

Yaproqdek dildirab yelni kutardi.

Ishonch – pushti misol,

Hayajon – olrang,

Quvonch – shaffoflikda suvdan oʻtardi.

 

Alam…

Yoʻq, alamning rangi yoqmadi.

U jonni qiynarkan, qontalash ekan.

O, buyuk musavvir, hayot rasmida

Koʻrdim, barcha ranglar aralash ekan.

 

Balki, u shu sabab ohangrabo kuch,

Ammo meni qiynar bir savol hamon.

Qoʻlga qalam olib, taqdirim uchun

Qaysi rangni maʼqul koʻrding, Xudojon?

 

 

* * *

Tun. Koʻchada fonuslar sayli.

Shahar tinmay sochar yogʻdular.

Ammo bitta chirogʻini ham

Yuragimga yoqolmas ular…

 

Qorongʻulik kirar bostirib,

Iztirobga toʻlgandek dunyo.

Chiroqlardan xavfsirab, ey tun,

Koʻksim uzra berkindingmi, yo?

 

Derlar, yolgʻiz tugʻilmas shoir,

Unga qay bir tuygʻular egiz.

Ona, menga azobmi uyqash

Yo dard bilan tuqqanmidingiz…

 

Umrimning eng yorqin nurlarin,

Olding dunyo, yana jimsan, jim.

Tund yoʻllarga yogʻdu hislarim

Ulashmoqdan, axir charchadim!

 

Irkit hayot, shuncha ojizsan!

Lablarimda koʻzyoshning taʼmi.

Quyosh, nahot bir soʻngan qalbga

Nur bermoqqa arzimaysanmi…

 

SIZDAN YIROQDA

 

Sizdan yiroqda…

Men kimman, bilmadim!

Sizsizlik jonimga oʻqday qadalgan.

Qarshimda bir qadah – hijronli ogʻu,

Bu dunyoda,

Yolgʻiz menga atalgan!..

 

Sizsiz…

Koʻz oldimni tumanlar bosgan.

Sizsiz… oyoqlarim zil-zambil, ogʻir.

Taqdir yoʻllarimga dorlarin osgan,

Ularga ilinib yuragim ogʻrir.

 

Dengizday toshgandim,

Shoʻx navo edim.

Endi sizdan yiroq,

Tilsizman, jimman.

Tezroq menga qayting, mana yengildim,

Endi bilsam,

Sizsiz…

Sizsiz

Hech kimman!

 

NIMA BOʻPTI…

 

Yodingizni koʻnglin toqiga ilib,

Nima boʻpti sizni sogʻinsa bir qiz…

Borligingizni-da baxti deya bilib,

Xotira-albomga ovunsa bir qiz.

 

Koʻksiga kechalar urganda xanjar,

Bolishga dardlarin aytib yigʻlasa.

Dunyo keng, charx rangin boʻlsayu agar,

Siz sabab…

Siz sabab sigʻmasa.

 

Quyosh tinglamasa, ufqqa berkinib,

Mohni qiynamasa qalbining ohi.

Bir sizga intilib, sizga yukunib

Yashagani boʻlsa, yolgʻiz gunohi…

 

Qiz yuragi oʻzi shunday muammo,

Salga bu borliqdan toʻyadi.

Unutadi, baxtli boʻladi, ammo

Nari borsa,

Sevgiga ishonmay qoʻyadi.

 

Nima boʻpti…

 

* * *

Yuragingda muzlar bor edi,

Choʻgʻlar tutgan qoʻlim sovqotdi.

Qalbingga iliqlik beray dedimu,

Umrimning yozini yoʻqotdim.

 

Yuragingda muzlar bor edi,

Aytolmadim hech haddim sigʻib.

Yonishlarim… o, bekor edi,

Koʻklam ketdi, gullarin yigʻib.

 

Yuragingda muzlar bor edi,

Nima qilay, aritolmadim!..

Qay birimiz gunohkor edik,

Kuz quyoshi eritolmadi.

 

Buyogʻi qish. Qoʻrqaman endi,

Faqat, soʻzim malolga olma.

Qanday boʻlsang, boʻlgin iltimos

Qorodamga aylanib qolma…

 

BAHORNI SOGʻINDIM…

 

Poyimga gullarin toʻshagan,

Bir goʻzal iforni sogʻindim.

Mehrda singlimga oʻxshagan,

Bahorni sogʻindim…

 

Qizgʻaldoqlar quchgan togʻlarni,

Xush nasimlar esgan bogʻlarni,

Olib kelgan dilxush chogʻlarni,

Bahorni sogʻindim…

 

Argʻimchoqda uchgan hislarni,

Oʻsma surgan sirdosh qizlarni,

Oʻrik guli toʻkkan izlarni,

Bahorni sogʻindim…

 

Qorlar ezgan maʼyus torkoʻcha,

Chuchmomaga intiq zor koʻcha,

Oxir aytdi dardlarin kecha,

“Bahorni sogʻindim!..”

 

Kapalakman, asli guldagi,

Sogʻinchmi u ogʻriq, dildagi

Yigʻlamadim,

Yoʻq, yoʻq shunchaki,

Bahorni sogʻindim…

 

Goʻzal ROʻZIYEVA

 

“Yoshlik”, 2015 yil 2-son

MULOHAZA BILDIRISH

Mulohaza kiritilmadi!
Ismi sharifingizni kiriting.