Sogʻinchi jonimga chirmashgan bir gul

0
283
marta koʻrilgan.

Soʻzning goʻzali muhabbat madhida aytilur. Bu borada soʻzning azalini esa Odam Ato hazratlari Momo Havo onamizga aytganlar. Demak, oshiqlik bizga Odam Atodan meros. Ammo bu meros har dilda har rangda yuz ochur. Har tilda oʻzgacha ohang kasb etur. Sevganga hayot goʻzal, sevilganga baxt bor.

“Yoshlik” jurnali muxlislariga ilinayotgan bu bitiklarim yigitlik yillarining sadosi. Ularning aksariyati daftarlar qatida qolib ketsa sheʼrning ham uvoli borga oʻxshadi. Muhabbatning uvolini rizqning uvoliga qiyoslab boʻlmas. Aslida sheʼrni izohsiz oʻqigan maʼqul emasmi?..

 

XALQONA

Qat-qatgina qatlama,

Qatlarida yogʻi koʻp.

Kim sevishni bilmasa,

Yuragida dogʻi koʻp.

 

Oshiqlikdan or qilgan,

Oro yoʻlda ovvora.

Muhabbatni xor qilgan,

Yashar abad dilpora.

 

Qantak oʻrik qand emas,

Choyga solib boʻlmaydi.

Bevafoning nomini,

Yodga olib boʻlmaydi.

 

Qoʻlni-qoʻlga bersangiz,

Dukillaydi yuraklar.

Nogoh qarsillab sinar,

Egilmagan teraklar.

 

Pora-pora, dilpora,

Sevolmagan bechora.

Toshga malham kor qilmas,

Boʻlib yurmang ovvora.

 

Ishqdan ishrat izlamang,

Ishq vafoning mevasi.

Koʻzga tushgan yamoqdir,

Chinnilarning chegasi.

 

ChIN OSHIQ

Shodligida sharob bor,

Koʻzlarida gulob bor.

Sochlarida tun boʻlsa

Yuzlarida oftob bor.

 

Bu qanday chashma ekan,

Dil unga tashna ekan.

Sevmayin, sevilmayin,

Ichishga shoshma ekan.

 

Gul tutar ifori yoʻq,

Dilida dildori yoʻq.

Har oshiq Majnun boʻlsa

Laylining bozori yoʻq.

Sadoqat shevasi xush,

Muhabbat mevasi xush.

Oshiqman deb oh urar,

Yorni bir koʻrganmi tush?

 

Sehrda sado boʻlmas,

Quruq soʻz nido boʻlmas.

Chin oshiq chiranmaydi,

Bir ohda ado boʻlmas.

 

KULGICHING

Qatra koʻz yosh qonimdan,

Bir oh chiqdi jonimdan.

Shu goʻzalning poyiga,

Tushirding osmonimdan.

 

Magʻrur edim, sor edim,

Chertilmagan tor edim.

Xudoyimga yigʻlasam,

Xilvatda xumor edim.

 

Ay muhabbat, muhabbat,

Yuzingdagi nuringdan.

Sen kulding, men kul boʻldim,

Koʻzingdagi qoʻringdan.

 

Oftob qani, oy qani,

Koʻrsin, koʻrsatay sani.

Mensiz yerda yurganin,

Jismimdagi jon mani.

 

Qabogʻingda qoring yoʻq,

Tikilsam tumoring yoʻq.

Kulgiching kundan goʻzal,

Meningdek xushtoring yoʻq.

 

OLMA OTSANG

Qarsillagan qars nima,

Koʻngildagi darz nima,

Yoʻlga chiqqan yigitga,

Araz nima, arz nima?

 

Olma otsang bilib ot,

Avval oʻzing ilib ot.

Baxtli boʻlgan bormi, ayt,

Dunyosida solib dod.

 

Oftobga arzandasan,

Mohtobga pazandasan.

Xudoyimning oldida,

Bitta gʻarib bandasan.

 

Koʻzga tushgan choʻp ekan,

Baxtli boʻlsang xoʻp ekan.

Bu olamga sen, mendek,

Kelib ketgan koʻp ekan.

 

Chiroyda chimmat boʻlur,

Xush soʻzda hikmat boʻlur.

Odam uchun ayt, nima,

Qadrdek qimmat boʻlur.

 

Bilib sevsang baxtlisan,

Koʻksingda togʻ, taxtlisan.

Yuzingda yuzta oftob,

Yor oldida ahdlisan.

 

ISHQ GULOBI

Shamolning shitobidan,

Bir chimdim tutib olsam.

Qizil gul gulobidan

Bir qultum yutib olsam.

 

Keyin koʻzingga boqsam,

Keyin yuzingga boqsam.

Orazing otashida,

Jonimni lov-lov yoqsam.

 

Yulduzlarning yuzidan,

Durlarin tilab olsam.

Oyning oydin roʻmolin,

Zulfini silab olsam.

 

Birin kaftingga solsam,

Birin kiftingga solsam.

Mehringni bolish qilsang,

Bagʻringda baxtdan tolsam.

 

Majnunning qaygʻusidan,

Toʻkilgan tilovatdek.

Laylining yogʻdusidan

Topilgan halovatdek.

 

Quvonchni sharob qilsak,

Qaygʻuni kabob qilsak,

Visolda qovrildik deb,

Olamga xitob qilsak.

 

GULIM

Osmondagi oy desam,

Olislab ketgandaysiz.

Jonim desam jilmayib,

Nafasim yetgandaysiz.

 

Siz mendan uzoqlashmang,

Uzilib ketolmaysiz.

Gulim, baxtni meningsiz,

Barmogʻin tutolmaysiz.

 

Joʻshqin soylar savlati,

Suv yuqmas toshdamikin?

Mehmon qadri mehrda,

Yo chimdim oshdamikin?

 

Bu dunyoda muhabbat,

Koʻngilning xush mehmoni.

Bir umr oʻzim boʻlay,

Koʻnglingizni mezboni.

 

Qadringizni qatrasi

Qarimaydi qonimda.

Gulim, guldek ochilib

Yashayvering jonimda.

 

IZLARINGDAN

TERGAYMAN

Men jonimni Jabborga

Bekorlarga bermayman.

Koʻzingdagi shabnamni

Kiprigimda tergayman.

 

Bu dunyo devonasi

Deb oʻksitma dilimni.

Tun menga tumor tutsa,

Ishq yoritgan yoʻlimni.

 

Men begona osmonning

Oftobini uzmayman.

Chiroying gul bargiga

Tikonlarda chizmayman.

 

Oshiqman deb dunyoga

Jar solmoqdan na hojat?

Noming nonday azizu

Yoding menga ibodat.

 

Men jonimni jabborga

Bekorlarga bermayman.

Jannatda ham iforni

Izlaringdan tergayman.

 

SADO BOʻLUR

Tosh oynani tosh yoʻlda,

Yotganini kim koʻrgan?

Ayt, vafoni bozorda

Sotganini kim koʻrgan?

 

Koʻngil-a, kuygan koʻngil,

Suv sepib soʻndirmagin.

Suymaganni yolborib

Yolgʻonga koʻndirmagin.

 

Umr qisqa yoʻl uzun,

Tulporlar ham tolarkan.

Alamning alangasi

Yuragingda yonarkan.

 

Koʻz yarashsa uzukka,

Aytgin, kim gina qilar.

Qayrilma qosh, qalam qosh

Qayrilsa nima qilar?

 

Koʻnglimning koʻchasidan,

Topganim ozor boʻldi.

Armon bagʻrimda tikan,

Hijron menga yor boʻldi.

 

Kuysa-yu, kuydirmasa,

Har koʻngil ado boʻlur.

Bu dunyoda ayt, qachon

Toshlardan sado boʻlur?!

 

 

“Yoshlik”, 2011 yil, 3-son

MULOHAZA BILDIRISH

Mulohaza kiritilmadi!
Ismi sharifingizni kiriting.