Sodda odamlar

0
307
marta koʻrilgan.

Shu fursat sheʼr aytay shaʼningizga bir,

Nomingizni yayrab yozsin qalamlar.

Muhabbatim sizga, mehrim sizgadir

Ey sodda odamlar, moʻmin odamlar.

 

Biringiz otamday birsoʻz, beriyo,

Biringiz onamday mushfiq, xokisor.

Simobday beqaror bu olam aro

Koʻnglimga sizlardan yaqinroq kim bor!?

 

Yaxshi gap-soʻzlarga tezda ishonib,

Mudom yaxshi kunni kutib yashaysiz.

Yurtga osh bergandan chandon quvonib,

Boringiz birovga tutib yashaysiz.

 

Garchi dasturxonda noningiz yarim,

Koʻnglingiz toʻq sizning, koʻnglingiz butun.

Dunyoning ishlarin oʻylagan sarim

Shukrlar aytaman borligingiz-chun.

 

Mehrimni ifoda etayin qanday,

Bugʻdoylar toʻlsin-ey uylaringizga.

Qamishdan bel bogʻlab qadrdon doʻstday

Sheʼrim xizmat qilsin toʻylaringizda.

 

Orif Tolib

 

2011

MULOHAZA BILDIRISH

Mulohaza kiritilmadi!
Ismi sharifingizni kiriting.