Sheʼr parchalari

0
1115
marta koʻrilgan.

Oʻsmirlik kezlarimda yapon adabiyotini, xususan, Akutagavani oʻqib, kattiq taʼsirlangandim. Ana shu taassurot tufayli bir talay erkin mashqlar qilgan edim. (Ulardan baʼzilari 1988 yili “Yoshlik” jurnalining 8-sonida chop etilgan). Bugun yana oʻsha daftarlar qoʻlimga tushib qoldi. Oʻqib koʻrib, yaxlit asar boʻlmasa-da, sheʼr unsurlari – parchalaridek tuyuldi. Balki oʻzimniki oʻzimga oy koʻrinayotgandir, balki bu hissiyot faqat mening shaxsiy tuygʻularimdir. Har holda, bu mashqlarni Sizga havola etarkanman, istiholam bor: ishqilib, gʻashingizga tegmasa boʻldi…

Muallif

 

* * *

Sirdaryoga uzun muzkoʻprik soldi

Xudoyim.

Men visoldan umid uzganman.

 

* * *

Uylarning

Birinchi qavati oynalarida

Hayot aks etardi.

 

* * *

Tok zangiga ilingan

Yoʻngʻichqa shirasidan qasmoq boylagan

Oʻroqqa

Toʻlin oy toʻr tashladi.

 

* * *

Safarxaltamga

Navoiyni solib qoʻy!

Men uzoqqa ketyapman.

 

* * *

Bobur hovuchlab suv ichgan

Buloqlar

Moʻlt-moʻlt qaynaydi.

* * *

Ogʻoch shoxidagi yagona yaproq

Koʻklam qadar osilib turdi

Medalga oʻxshab.

 

* * *

Sukunatni uchirib yubordi

Musicha.

Men qabrni silab,

Assalomu alaykum, dedim.

 

* * *

Qabristonda achchiq izgʻirin yeldi.

Men qabr ustiga oʻzimni yopdim.

 

* * *

Mozor boshiga chiqib,

Dahmani

Qorlardan kaftim bilan tozaladim.

 

* * *

Koʻchada

Senga xat yozayotgandim

Qoʻllarin uzatib

Tilanchi keldi.

* * *

Men uzoq qarab qoldim unga:

Judayam odamga oʻxshar edi u.

 

* * *

Dovon tepasida

Oy ochilgan,

Yulduzlar yirik.

Pastga tushgim kelmaydi sira.

 

* * *

U

Ogʻzidan chiqqan hovuri bilan

Yashirmoqchi boʻldi koʻzini.

 

* * *

Paykal qoʻriqchisiga

Chopon kiygizib qoʻyishibdi.

Doʻppisiz kulguli koʻrindi.

 

* * *

Shamoldek keldiyu

Shamoldek ketdi.

Hilpirab qoldi yurak.

 

* * *

Bolaligimda qush tilini bilardim.

Endi hayvonlar tilini ham bilaman.

 

* * *

Uvildiriq kabi

Baliq boʻlasanmi

Yo yem –

Xudo biladi.

 

* * *

Navroʻz

Har kimning holiga yarasha

Shodlik ulashar.

 

* * *

Xijolatli tabassum bilan uzrxoh

Apil-tapil,

Ikkilanib,

Yoʻlimni kesib oʻtdi

Ayol.

* * *

Ovozi bor uning,

Andishasi bor,

Farosati – taʼbi nazmi bor.

Qoʻshiq aytolmadi.

 

* * *

Bilib turib suvga

Suvrat solarkan,

Kelajakni oʻylab entikar.

 

* * *

Turmush yoʻllarida shalagʻi chiqqan

Sinfdosh doʻstim

Toʻxtamasdan oʻtib ketdi yonimdan.

 

* * *

Bozorda –

Shaytonning toʻyxonasida

Raqs tushib, isiriq tutatib yurar

Farishta.

 

* * *

Doʻrmon –

Adabiy oʻrmon.

Bulbulni izlab yuribman.

 

* * *

Qodiriyni koʻrgan,

Choʻlponni koʻrgan,

Usmonlarni koʻrgan joʻka daraxti turar

Hech narsa koʻrmagandek.

 

* * *

U shunchalar gʻarib ediki,

Haddan tashqari bahaybat koʻrinardi

Ordeni.

 

* * *

Men keldim, dedi u.

Xayoli oʻzida emasdi.

 

* * *

Hamma baravar gapiryapti.

Qarsak chaladigan odam yoʻq.

 

* * *

Yonimdan

Bir qiz oʻtdi shoshib.

Men oʻzimdan uyalib ketdim.

* * *

Kimda alaming bor?

Kimda oʻching bor?

Muncha uvillaysan,

Qoʻqon shamoli?

 

* * *

Toshkentgacha

Uchoqda

Xudo bilan birga uchdim.

 

* * *

Atirgul gʻunchasi

Qirmiz qabosini qayirdi asta.

Sening nafasing keldi.

 

* * *

Puch kurmakni ortmoqlab,

Kuchanib boryapti chumoli.

Havo dim.

 

* * *

Olma ogʻochi poʻstlogʻi ichra

Bir biriga qarab uzoq

Tek qoldi bir juft chumoli.

 

* * *

Yuragi kichrayib,

Gʻashi kattalashib borardi:

Hamma narsa tegaveradi.

 

* * *

“Poq” etib tushdiyu

Poʻstlogʻidan ajrab

Ilgarilab ketdi yongʻoq.

 

* * *

Shudringga

Oʻzini soldi

Xonqizi.

 

* * *

Pagʻa-pagʻa yogʻdi qor.

Tomlar koʻpirib ketdi

Etigimni yashirib qoʻydi onam.

 

* * *

Koʻzingda

Oʻzimning

Aksimni koʻrdim.

* * *

Koʻzoynak

Kapalakdek qoʻndi

Burnimga.

 

* * *

Hamma narsa bor dedi u.

Hamma

Narsa.

 

* * *

Sandalning oʻti oʻchgan.

Turgim kelmas oʻrnimdan.

Koʻksimda mushuk yotibdi.

 

* * *

Bogʻi chaman boʻlgani sari

Toʻzgʻib boryapti

Oʻzi.

 

* * *

Bodroq paxtazorga

Oppoq quyonchalar qaydan keldi?

Tutib boʻlarmikan ularni?

 

* * *

Qiz seskanib qoʻlini tortdi.

Barmogʻimda qoldi

Uzugi.

 

* * *

Soʻfi azon chaqirdi.

Mezanadan shoshilib tushib,

Hovlisiga yugurib ketdi.

 

* * *

Yulduzlar koʻp uchdi bu kecha.

Uyqum oʻchdi.

Yigʻlagim keldi.

 

* * *

Yashirib sheʼr yozardim.

Bilardim

Shoirlik uyat ishligin.

 

* * *

Senga maqtangim kelyapti.

Sevib qoldimmikan.

* * *

Dengiz albatta toʻladi dedi

Qiyiq chol.

Oʻpkam toʻlib ketdi.

 

* * *

Shoirman deb

Irillardi u.

 

* * *

Navoiyning koʻzlariga

Qiyomatda

Qanday qaraymiz?

 

* * *

“Manfaat” deganda

“Man”ga berardi

Urgʻu

 

* * *

Uning ismini aytdi-yu

Dimogʻini yopdi

Yengi bilan.

 

* * *

Qiya eshik ustiga

In solibdi

Musicha.

 

* * *

Borligingni bilsam,

Tugʻilmas edim.

 

* * *

Kuylagin

Ovozing yoʻqolmay turib,

Meni sev…

 

* * *

Boʻsagʻada yotib,

Eshikni mushtlab,

Jonini Jabborga berdi.

 

* * *

Meni buncha qiynoqqa solib,

Qanday sirni olmoqchisan?

Nimani bilmoqchisan, falak!

 

 

Iqbol MIRZO,

Oʻzbekiston xalq shoiri

 

“Yoshlik”, 2012 yil, 4-son

MULOHAZA BILDIRISH

Mulohaza kiritilmadi!
Ismi sharifingizni kiriting.