“Qalbdagi intizor-intizor hislar…”

0
136
marta koʻrilgan.

ONAM

 

Iliq xotiramning toʻlqinlaridan

Munis suvratingiz ohista qalqib

Koʻzim qorasida turib qoladi.

Osmonga termulib toʻlmagan koʻzlarim,

Zaminga termulib toʻlmagan koʻzlarim

Bir sizning chehrangiz bilan toʻladi.

Qalbdagi intizor-intizor hislar

Quvonchim taftida eriydi asta.

Endi quvonchimni ogʻrita boshlar

Hech chidab boʻlgusiz yana bir istak.

Qaniydi, shu dam yoʻq ilojni topib,

Bagʻrida Siz turgan qorachigʻimga

Intiq lablarimni entikib bossam.

 

 

OʻKINCH

 

Tong – Xorazm osmoni qonar,

Qondan qoʻrqib bekinar yulduz.

Yo Rab, oʻgay qiz boʻldim, ona,

Judolikdir sizga tuqqan qiz.

 

Shom – qorayib kuzatar samo,

Sudrab borar quyoshni abr.

Men-chi, uzoq qizingiz hamon,

Sizning yaqin qizingiz Sabr.

 

Tun – yulduzlar qaytadan sachrab,

Koʻk kulimsir: hura boshlar it.

Borolmayman, yomonman, yo Rab,

Sizning yaxshi qizingiz Umid…

 

Qutlibeka

MULOHAZA BILDIRISH

Mulohaza kiritilmadi!
Ismi sharifingizni kiriting.