Onam ekkan rayhonlar

0
132
marta koʻrilgan.

QAYTISH

Meni koʻrib boshlanar darrov

Pistazorda shivir-shivirlar.

Bir-birining yelkasi osha

Ishonmasdan qaraydi qirlar.

 

Quvongandan shodon daraxtlar

Qiyqirishib urishtirar qoʻl.

Mendan oldin suyunchi soʻrab,

Uyga qarab chopib ketar yoʻl.

 

Otam kabi quchogʻin ochib,

Qarshi olar qari darvoza.

Chugʻurlashib shoʻx qaldirgʻochlar

Kelganimni qilar ovoza.

 

Qadrdonim, bolalik doʻstim,

Hovuch-hovuch tutgan gʻoʻralar —

Qoʻshni bogʻdan betoqat oʻrik

Devor osha qoʻyar moʻralab.

 

Dimogʻimga urilar birdan

Onam ekkan rayhonlar boʻyi…

Yuragimga chang solgan tugun

Shu asnoda yuborar qoʻyib…

 

TAASSUROT

Samarqandda ilk boʻlganimda

Titroq bosgan, bosgan hayajon.

Boshim uzra shundoq tepamda

Menga qarab turardi osmon.

 

Samarqandda ilk boʻlganimda

Soʻz deyarga til shaylanardi.

Lek demasdim, voajab, qarang,

Ostimdagi yer aylanardi.

 

Samarqandda ilk boʻlganimda

Hissiyotlar shunday quyilgan.

Balki unday boʻlmagan, balki

Menga faqat shunday tuyulgan…

Samarqandda ilk boʻlganimda…

 

VISOL

Yoʻllarimiz hijron rangida,

Togʻlar paydo boʻla boshlaydi.

Koʻzim yumsam, koʻzim oʻngida

Bogʻlar paydo boʻla boshlaydi.

 

Faqat senu men biladigan,

Faqat menu sen biladigan,

Ikkalamiz teng biladigan

Chogʻlar paydo boʻla boshlaydi.

 

Nozik koʻnglim bilar kipriging —

Yuragimni tilar kipriging.

O, nimalar qilar kipriging —

Dogʻlar paydo boʻla boshlaydi.

 

Desam buncha gulgun lolasan,

Hech ne demay jim uyolasan,

Bir jilmayib jonim olasan —

Chohlar paydo boʻla boshlaydi.

 

Koʻz oldimda koʻzing doimo,

Tushimda ham oʻzing doimo,

Qoshing qoqib bir qilsang imo

Mohlar paydo boʻla boshlaydi.

 

Sen goʻzal gul, faqat men uzsam,

Lablarimda gulgun may suzsam…

Xayolimda surating chizsam,

“Voh”lar paydo boʻla boshlaydi.

 

Yana ne dey, gulyuz dildorim,

Toʻlib turgan bu qalb – anorim

Yormoq uchun chogʻlansam bormi,

Ohlar paydo boʻla boshlaydi.

 

KOʻKLAM

Qorlar erib,

Sovuqlar ketib,

Vujudin tark etib karaxtlik,

Oʻzini bir boshqacha tutib,

Tili chiqib qoldi daraxtning.

 

Muhiddin ABDUSAMAD

 

“OʻzAS”dan olindi

MULOHAZA BILDIRISH

Mulohaza kiritilmadi!
Ismi sharifingizni kiriting.