Ona sogʻinchi

0
185
marta koʻrilgan.

Koʻzlari toʻrt boʻlgan onam yonidan

Tomlarga yugurib chiqar qizgʻaldogʻ

Menga yoʻl qaraydi uyning tomidan.

Toʻrt qiblaga tutash yoʻl. Bari – aldogʻ.

 

Shamollar yulqiydi koʻylaklarini,

U tomdan tusholmas menga yoʻl qarab.

Onamning sochida Sogʻinch qariydi,

Huvillab yotadi mensiz toʻrt taraf.

 

Onam koʻzlariga qaray olmagan

Tomonlar yuziga devorni tutar.

Ariqlardan oqib kelgan olmalar

Qizchamning qoʻllarin sogʻinib ketar.

 

U hali bilmaydi, dunyoda uning

Qoʻllarin sogʻingan olma borligin.

U hali bilmaydi, qishloqda kunin

Buvisi yoʻliga intiq, zorligin.

 

Tosh tushgan suvdagi xalqoblar kabi

Qiblalar qizgʻaldogʻ koʻzidan qochar.

Soʻfi boʻlolmagan toʻrgʻaylar – nabiy,

Mening kelmasimdan fol, romlar ochar.

 

Shu folni yolgʻonlar qilmoqlik uchun

Qishloqqa talpinib yashaydi koʻnglim.

Men bir kun qaytaman, kelarman koʻchib,

Onamga qarashgin, qizgʻaldogʻ singlim.

 

Faxriyor

MULOHAZA BILDIRISH

Mulohaza kiritilmadi!
Ismi sharifingizni kiriting.