Odob – yaxshi bola ishi

0
218
marta koʻrilgan.

 Odob – ona

 

Koʻpni koʻrgan keksalar:

Oftob – ona deydilar.

Oftob soʻzi shunchaki

Bir bahona deydilar.

Necha yillar shu oftob

Yoritgan keng olamni.

Qaydan, qanday kuch bilan,

Aqli yetmas odamning.

Bu toʻgʻri gap, hayotda

Oftob katta onamiz.

Bolalikdan biz mehr

Nurlariga qonamiz.

Ulgʻayamiz ham uning

Bagʻridamiz erta-kech.

Ona mehri oftobdan

Ayrilmasak deymiz hech.

 

 

Tabassum

 

Yaxshilarning belgisidir

Tabassum,

Tabassumsiz turolmaslar

Hech bir zum.

Tabassumga begonalar

Ham talay,

Qosh-qovogʻi osilganlar

Xaltaday…

Siz ularni bir koʻrganda

Sezarsiz,

Qay birin deb, qay biridan

Bezarsiz.

 

 

Yaxshi bola

 

Yaxshi bola qanday boʻlar,

Aytib bering, – deydi Vali.

– Yaxshi bola nimaligin,

Bilmaysanmi, oʻgʻlim, hali?

Vali oʻylab topolmaydi,

Yaxshi bola kim u oʻzi?

Shu payt birdan kulib turgan

Otasiga tushar koʻzi.

– Shunday, oʻgʻlim, – der otasi, –

Yaxshi nima, bilib olgin.

Bolalikda shoʻxlik bilan

Kun oʻtkazmay, bilim olgin.

Kattalarni hurmatlash ham,

Odob – yaxshi bola ishi.

Jondan sevib havas qilsin

Seni koʻrgan har bir kishi.

– Xoʻp, otajon, – deydi Vali,

Yaxshi bola boʻlmoq uchun,

Yaxshilikka bagʻishlaydi

Yoshlikdanoq u bor kuchin.

 

 

Uyimiz ham bir maktab

 

Maktab – maktab odatda,

Yana boshqa maktab bor.

Uyimizdir u maktab,

Bu ham aziz, moʻtabar.

Biz oʻqishdan har kuni

Shu maktabga qaytamiz.

Nima oʻqib, oʻrgandik

Kelib unga aytamiz.

Qaytaramiz bir boshdan,

Takror hamma oʻtganni.

Yodga olib, pishiqlab,

Darslardan unutganni.

Ota-ona mehribon

Ustoz, kuzatuvchimiz.

Biror fandan oqsoqlab,

Yetmay qolsa kuchimiz –

Darrov suyab, yetaklab,

Bizni yoʻlga solishar.

Aʼlochilar shu taxlit

“5” bahosin olishar.

 

 

Yoqubtoy – yoqimtoy

 

Yoqubtoyni hamma sevar,

Sababi – koʻp yoqimtoy.

Orzulashib derlar: – Bolang

Boʻlsa qani Yoqubday.

Oʻzi kichik boʻlsa hamki,

Kattalarday aqlli.

Bola boʻlib, bolalarday

Shoʻxlik qilmas aqalli.

Yurish-turish, soʻzlashlari

Bir yarashgan oʻziga.

Qarab koʻngling yayrab ketar,

Kulib turgan koʻziga.

 

Hamza IMONBERDIYEV

 

“Sharq yulduzi”, 2014–5

MULOHAZA BILDIRISH

Mulohaza kiritilmadi!
Ismi sharifingizni kiriting.