Koʻzmunchogʻim

2
1859
marta koʻrilgan.

Bolajonlar sizga atab

Sheʼrlar yozdim bir talay.

Magʻzin chaqib oʻqisangiz

Sizlar bilan doʻst boʻlay.

Yaxshi koʻrib yod olsangiz

Boshim koʻkka yetadi.

Misralarim ezguliklar

Diyoriga eltadi.

 

SHEʼR YODLASHNI BILAMAN

 

Sheʼr yodlashni bilaman,

Tez yodlashni bilaman.

Soʻzlarni biyron aytib,

Zoʻr yodlashni bilaman.

 

Buvijonim aytgan sheʼr,

Oyijonim aytgan sheʼr,

Qayta-qayta takrorlab

Akajonim aytgan sheʼr.

 

Sheʼrlar chaman haqida,

Gulu gulshan haqida,

Bizni suyub oʻstirgan,

Ona Vatan haqida.

 

TOVUGʻIM

 

Meni nonxoʻr tovugʻim,

Meni donxoʻr tovugʻim.

Tuxum qoʻyib beradi,

Juda gʻamxoʻr tovugʻim.

 

Patlari-chi sariq, oq,

Silasam momiq, yumshoq.

Meni yaxshi koʻradi,

Men bilan qalin oʻrtoq.

 

XAYR BOGʻCHAM

 

Yetti yoshga toʻldim men,

Rosa oʻynab-kuldim men.

Endi navbat oʻqishga,

“Alifbe” oʻrganishga.

 

Xayr sevimli bogʻcham,

Xayr oʻyinchoqlarim.

Men maktabga boraman,

Xayr qoʻgʻirchoqlarim.

 

Ertaklarni oʻrgatgan,

Uxlasak alla aytgan,

Xayr bogʻcha opajon,

Sogʻ boʻlingiz har qachon.

 

Biz bilan qoʻshiq kuylab,

Biz bilan sheʼr yod olgan.

Xayr, musiqa ustoz,

Sogʻinamiz sizni rost

 

Sport maydonchasida

Chiniqib kuchga toʻldik.

Bir-birimizni quvlab

Oʻyinga ham xoʻp toʻydik.

 

Axil-inoq boʻlgancha

Oʻynadik bekinmachoq,

Nogoh topib olganda,

Sevindik birga shu choq.

 

Vatan, ona soʻzining

Maʼnosini bildik biz.

Hur oʻlkam madhiyasin

Quloqlarga ildik biz.

 

Davlatim bayrogʻini,

Shon-shuhrat mayogʻini,

Ranglar maʼnosin anglab

Tushundim yarim oyini.

 

Xumo qushi qanotin

Yozib turgan baralla,

Yurtim gerbi haqida

Soʻzlab beray jaranglab.

 

Xayr qoʻgʻirchoqlarim,

Xayr oʻyinchoqlarim,

Xayr bogʻcham, jon bogʻcham,

Menga qadrdon bogʻcham.

 

GILOS

 

Donalari qip-qizil

Hovlida pishdi gilos.

Uzib yegim kelgandi,

Boʻyim yetmadi biroz.

 

Kichkina kursichamni

Sudrab olib keldim men.

Qip-qizil giloslarni

Rosa terib yedim men.

 

ShU VATANGA

 

Shu Vatanga munosib

Farzand boʻlish ahdimiz.

El ishiga shay turgan

Dilband boʻlish baxtimiz.

 

Boshimizni silagan

Yurtimiz bor bagʻri keng,

Bizga oq yoʻl tilagan

Bobo mehri koʻkka teng.

 

Manzil olis, lek ravon,

Bilimda bellashamiz.

Aʼlo oʻqib-oʻrganib,

Har tilda soʻzlashamiz.

 

Tinchlik boʻlsin barqaror,

Istiqlol umri mangu.

Begʻubor chehramizda

Balqib turar shoʻx kulgu.

 

BOLALIK UY

 

Kichik qizalogʻimning

Oʻrtoqlari juda koʻp.

Kelishsa gar mehmonga

Hovlimiz ketar toʻlib.

Biri boʻlib muallim

Qoʻgʻirchoqqa dars berar,

Biri qoʻshiq kuylasa,

Biri shodon raqs etar.

Biri xamir qoradi,

Loydan chunon berilib,

Uch-toʻrt mehmon oʻtirar

Toʻrda qarang kerilib.

Eh, bolalik naqadar

Sof, musaffo, begʻubor,

Xalqim bejiz aytmagan:

“Bolalik uy – bu bozor”.

 

BOGʻCHADA NAVROʻZ

 

Jonajon bogʻchamizda

Navroʻz bayrami qildik.

Oshpaz opalar bizga

Koʻp sumalak pishirdi.

Talay sheʼrlar yod oldik,

Shoʻx qoʻshiqlar kuyladik,

Shirinliklar ulashib,

Bir-birimiz siyladik.

Barcha xursand, barcha shod,

Shoʻx yallalar avj oldi,

Javondagi oʻyinchoqlar

Bizlarga hayron qoldi.

 

TOY BOLAM

 

Sen toychogʻim toy bolam,

Osmondagi oy bolam.

Istiqlol nurin ichgan

Baxti kulgan boy bolam.

 

Ber qoʻlingni ber bolam,

Elga qoʻshil er bolam.

Ajdodlarga munosib

Chin farzand boʻl, kel bolam.

 

Qadamlari nur bolam,

Soʻzi gavhar, dur bolam.

Obod Vatan seniki,

Quloch yozgin hur bolam.

 

SALOM MAKTAB

 

Yetti yoshga toʻldim men,

Maktab sari keldim men.

Salom maktab, jon maktab,

Quchogʻingga ol maktab.

 

Oʻzim yaxshi bolaman,

Eng aʼlochi boʻlaman,

Ona Vatan dilbandi,

Istiqlol farzandiman.

 

Erkalik va shoʻxlikni

Tashlab keldim bogʻchaga.

Barcha oʻyinchogʻimni

Terib qoʻydim tokchaga.

 

Odob va tarbiyani

Oldim ota-onamdan.

Endi bilim koniga

Yuray shu ostonadan.

 

Faqat “besh” baho bilan

Daftarimni toʻldiray.

Hur, goʻzal diyorimga

Munosib farzand boʻlay.

 

KUCHUGIMIZ

 

Kuchugimiz koʻchada

Uch kun yoʻq boʻlib ketdi.

Hammamiz xavotirda

Koʻzlar toʻrt boʻlib kutdik.

 

Hovlimiz suv quygandek

Usiz huvillab qoldi.

Tomdagi ola mushuk

Pastdan goʻsht izlab toldi.

 

Kuchukni koʻchalardan,

Hovlilardan izladik.

Bobomning jahli chiqib

Men, ukamni “tuzladi”.

 

Nihoyat uch kun oʻtgach

Kirib keldi shumshayib.

Koʻzlari mungli edi,

Orqa oyogʻi mayib.

 

Bobom-chi unga qarab,

Bir xoʻmrayib qoʻydilar.

Koʻchada sayoq yurgan

Tayoq yeydi, – dedilar.

 

YOSTIQCHAM

 

Yumshoq, momiq yostiqcham,

Guli sariq yostiqcham.

Meni yaxshi koʻrasan,

Tez uxlatib qoʻyasan.

 

TISHLARIMNI YUVAMAN

 

Har kuni ikki marta,

Erinmasdan birpasda,

Men yuvaman tishimni,

Qoʻyib hamma ishimni.

Keling siz ham bir koʻring,

Menga “besh” baho bering.

Qolmasin deb orqasi,

Tishlarimning kattasi,

Xafa qilmay hech birin

Yuvaman birin-sirin.

Demang meni maqtanchoq,

Mana tishlarim oppoq.

Doktorga qolmadi ish,

Chunki sogʻlom hamma tish.

 

QOʻZICHOQ

 

Eh mening qoʻzichogʻim,

Koʻzi tiyrak munchogʻim,

Zeriksam ovunchogʻim,

Tek turmaysan sira ham.

 

Siylayin oʻtlar terib,

Silayin suvlar berib,

Erkalasam-da suyib,

Tek turmaysan sira ham.

 

OZODA BOLA

 

Qoʻllarimni yuvaman,

Men ozoda yuraman.

Sovun shunday moʻjiza

Koʻpirtiraman mazza!

Pufaklar shishib chiqar,

Osmonga qarab uchar.

Qizil, sariq tovlanib,

Menga quvonch baxsh etar.

Ishqalayman barmogʻim,

Unutmayman tirnogʻim.

Old-orqasin yuvaman,

Mikroblarni quvaman.

Mana, qoʻllarim toza,

Mendan oling andoza.

 

BUVIJONIM

 

Bagʻri issiq buvim bor,

Mehrlari koʻp bisyor.

Pazandalar juda ham,

Havas qilgudek biram.

Boʻlsa-chi hayit, bayram,

Dasturxonimiz chunon,

Ketadi chiroy ochib,

Xushboʻy hidlar taratib.

Boʻgʻirsogʻu qushtili,

Shirin nonlar xilma-xil.

Koʻzimiz quvontirar,

Ishtahamiz uygʻotar.

Shirin xolvatarni-chi

Pishiradilar tez-tez,

Chunki yaxshi koʻramiz,

Uni ukam ikkimiz.

Ajoyib buvimiz bor,

Gʻaroyib buvimiz bor.

Hammamizga mehribon,

Soʻzlari asal biram.

Peshonamiz silaydi,

Bizga kamol tilaydi.

 

ShIRAXOʻR

 

Shiraxoʻr Bunyodjonning

Tishlari ogʻrib qoldi.

Tun boʻyi uxlay olmay

Yigʻlay-yigʻlay koʻp toldi.

Tong otganda dadasi

Qoʻlidan tutdi, yur, deb

Shifokorga eltdi:

Koʻrib qoʻying bir, deb

Doktor opa tishlarini

Davoladi bir zumda,

“Shirinlikni kam ye”deb,

Tayinladi koʻp unga.

Shundan beri Bunyodjon

Konfetlarni oʻylab yer,

Hali ogʻriq esida,

Darddan uzoq yuray der.

 

KAKTUS

 

Oyijonim tuvakda

Oʻstirdilar tikon gul.

Gul emas, naq tikonzor,

Ignalarga makon gul.

Hidlab koʻrsam hidi yoʻq,

Ushlay desam doʻqi zoʻr.

Koʻrinishi naqshinkor,

Yaqinlab, chekdim ozor.

Oyim uni koʻp maqtab,

Dedilar: – Xoʻp foydali,

Kaktus oʻstirmoq uchun,

Bilmoq zarur qoidasin.

Men ham xuddi oyimdek

Tikonlarni gul bildim.

Faqatgina uzoqdan

Mehr qoʻyib, doʻst boʻldim.

 

OʻKTAM OʻGʻLON BOLAMAN

 

Buvimning erkasiman,

Elimningn ertasiman,

Bobojonim suyanchi,

Ota-onam quvonchi.

 

Oʻktam, oʻgʻlon bolaman,

Sogʻlom, polvon boʻlaman.

 

Oʻqishlarim aʼlo, zoʻr,

Maktabimga kelib koʻr.

Sportga chin oshnoman,

Tolega ishonaman.

 

Oʻktam, oʻgʻlon bolaman,

Sogʻlom, polvon boʻlaman.

 

Ortda qoldi kamu-koʻst,

Kitobga boʻlganman doʻst.

Vaqtim oʻtmaydi bekor,

Kattalarga men dastyor.

 

Oʻktam, oʻgʻlon bolaman,

Sogʻlom, polvon boʻlaman.

 

Bobom, buvim qoʻl ochib,

Duolarga yoʻl ochib:

– Parvoz et, lochin, – deydi,

Zamon boʻldi chin, – deydi.

 

Oʻktam, oʻgʻlon bolaman,

Sogʻlom, polvon boʻlaman

 

QOʻGʻIRCHOQ

 

Qoʻgʻirchogʻim oppogʻim,

Mening yaqin oʻrtogʻim.

Doim yonimda yurar,

Gapirsam kulib qoʻyar.

 

Sochlarini tarayman,

Toza qilib qarayman,

Boʻyniga taqsam munchoq,

Quvonadi bir quchoq.

 

Men bilan birga uxlab,

Bogʻchaga ham boradi.

Oʻrtoqlarimga emas,

Menga quloq soladi.

 

Kiprigi uzun-uzun,

Koʻzlari katta-katta,

Yetti yoshga toʻlganda,

Birga borar maktabga.

 

MURABBO

 

Oyim qishga tursin deb,

Dasturxon moʻl boʻlsin deb,

Olma, oʻrik, olchadan,

Qulupnay, togʻolchadan,

Shakar solib birtalay,

Olovni qalay-qalay,

Pishirdilaru ammo,

Bermadilar murabbo.

 

BAHONACHI

 

Tongda uyqudan tursam

Qovogʻin uydi osmon.

Dov-daraxtni ayamay,

Yomgʻir quydi beomon.

Zim-ziyo koʻkka boqib

Men ham qovogʻim soldim.

Yomgʻir bahona boʻldi

Maktabimdan ham qoldim.

 

ChUMOLILAR

 

Ishlaydi bilmay tinim,

Mehnatida koʻp unum.

Hech charchadim demaydi,

Tekinga don yemaydi.

Garchi kichik boʻlsa-da,

Zahmatdan qochmaydi hech.

Tizilgancha bir safda

Rizqin terar erta-kech.

Yer tagidan uy qurib

Yashaydi ahil-inoq.

Toza, halol mehnatin

Mevasin oshar quvnoq.

 

ARGʻIMCHOQ

 

Hovlidagi daraxtga

Yana eng balandiga

Dadam osib argʻimchoq

Koʻnglimizni etdi chogʻ.

 

Opam bilan ikkimiz

Navbat bilan uchamiz,

Mayin esgan shamolni

Bagʻrimiz-la quchamiz.

 

Argʻimchogʻim, argʻimchoq,

Sen misoli belanchak.

Tebranib tur ohista,

Goh balandga, goh pastga.

 

SOGʻLOM BOʻLAY DESANG

 

Burningni yengga artib,

Saqichni puflab tortib,

Tirnoqlaring tishlama,

Koʻngillarni gʻashlama.

Qaynamagan suv ichib,

Yuviqsiz meva yesang,

Qorningda turar ogʻriq,

Xafa boʻladi sogʻliq.

 

BUVIJONLAR OʻGITI

 

Zukko, dono buvijonim,

Soʻzi aʼlo buvijonim.

Doim bilim ol deydi,

Yaxshi oʻqib qol deydi.

– Boʻlsang hamki qayerda,

Odob saqla har yerda.

Yuzimizni yorugʻ qil,

Bizga rahmat olib kel!

Buvijonim aytganin

Hech yerda qilmay ikki,

Yaxshi bola boʻlaman,

Aslo eshitmay dakki.

 

ISMOILNING BOBOSI

 

Qoʻshnimiz Ismoilning

Nuroniy bobosi bor.

Unga havasim kelar

Boboning duosi bor.

 

Goho koʻchaga chiqib

Kuzatadi bizlarni,

Kam-koʻstimizni aytib

Tuzatadi bizlarni.

 

– Olmani yeb poʻchogʻin

Irgʻitasan qayoqqa?

Shirinlik yeb qogʻozin

Tashlama, der har yoqqa.

 

– Oʻgʻillar daraxtlarni

Parvarishlasin deydi,

Qizlar ona yonida

Ishga shay tursin deydi.

 

Bobo bizni alqasa

Yayrab ketar dilimiz.

Qoʻl ochib duo qilsa,

Yashnaydi yurt, elimiz.

 

ONAMNING OʻGITLARI

 

Soʻrab bilgan – kamtarlik

Deydilar mudom oyim.

Soʻramagan yomondir,

Tayinlaydilar doim.

 

Maktabda ustozimdan

Soʻrab, bilib kelaman.

Uyga vazifalarni

Hech qiynalmay qilaman.

 

KABUTAR

 

Don sochib chaqirsam ham,

Hech yaqin yoʻlamaysan.

Uzoqlardan kuzatib,

Don tomon boʻylamaysan.

Kabutarim, ayt menga

Nega mendan qochasan?

Senga doʻst boʻlay deyman,

Qachon bagʻring ochasan?

Sen doim odamlarga

Umid va doʻst boʻlgansan,

Nega mendan hurkiding,

Kel, qoʻlimga qoʻngin sen.

 

QORBOBO

 

Qorbobojon, qorbobo,

Erib ketma, hoy bobo.

Yasadim seni qordan,

Qoʻrqmay sovuq, boʻrondan.

 

Oʻynab olayin toʻyib,

Barcha ishimni qoʻyib.

Chaqiray oʻrtoqlarim,

Kiysinlar qoʻlqoplarin.

 

Sen haqingda bir talay

Sheʼr, qoʻshiqlar bilaman.

Erib ketma qorbobo,

Seni yaxshi koʻraman.

 

OROMGOH MARSHI

 

Bir, ikki, uch, toʻrt

Qadamlarim shahdam zoʻr.

Kelgin doʻstim biz bilan

Taʼtilda dam olib koʻr.

 

Bir, ikki, uch, toʻrt

Tabiat chiroyi zoʻr.

Qoʻshiq kuylaydi soylar

Ishonmasang bir bor koʻr.

 

Bir, ikki, uch, toʻrt

Sportda chiniqdim zoʻr.

Futbol, karate, shaxmat,

Biz-la kuching sinab koʻr.

 

Bir, ikki, uch, toʻrt

Gʻayratimiz juda zoʻr.

Maza qilib dam olgach

Aʼlo oʻqishimiz koʻr.

 

Bir, ikki. uch, toʻrt

Ona Vatan mehri zoʻr.

Yashil, oq, havo rangda

Qoʻlda bayrogʻimiz koʻr.

 

OILAM

 

Oila – otam,

Oila – onam,

Oila – ukam koʻzlari.

Oila – sinlim,

Oila – bobom,

Buvijonim soʻzlari.

 

Oila desam biri tan,

Biri jondek koʻrinar.

Moʻjazgina mustahkam,

Bir vatandek koʻrinar.

 

Men ulardan oʻzimni

Tasavvur etmam ayro,

Oila – kichik Vatanim,

Men jilgʻaman, u daryo.

Tipratikan

 

Choshgoh devor tagidan

Tipratikan topdi dadam.

Uni ushlash uchun tezda

Mato bilan yopdi dadam.

 

Kirpi juda chaqqon ekan,

Qochib qoldi yugurib.

Dadam esa poyladilar,

Tutish uchun ulgurib.

 

Dedim: – Dada ehtiyot boʻling,

Tikonlari tilmasin.

Sizdan qochib boshchasini

Shu devorga urmasin.

 

Dadam uni asta ushlab

Bir qutiga soldilar.

Idishchada suv, non qoʻyib

Koʻp tikilib qoldilar.

 

Soʻng dedilar: – Qoʻyib yubor,

Mayli yursin bemalol,

Bizdan hafa boʻlmay ketsa,

Qaytib kelar ehtimol.

 

ShAMOLLAR

 

Oʻynashar qars-qurs qilib,

Dov-daraxt shoxin quchib,

Biri birini quvib,

Samodagi shamollar.

 

Butun borliq joʻr ovoz,

Qoʻshiq kuylashadi soz.

Qancha shoʻxlik qilsa oz,

Tinchimagan shamollar.

 

Nelardan berar darak,

Boshlari sarak-sarak.

Koʻp narsa bilsa kerak,

Dunyo kezgan shamollar.

 

OYMOMA

 

Oymomojon, oymoma,

Yerga tushgin bir zumga,

Yaqindan bir koʻraman,

Sen-la oʻrtoq boʻlaman.

 

Har oqshom koʻkdan boqib,

Yulduzdan marjon taqib,

Zulmatni yoritasan,

Bizni maftun etasan.

 

Senga oshiq hamma joy,

Daryoyu koʻl, toshqin soy,

Osmonoʻpar togʻlar ham,

Keng dalayu bogʻlar ham.

 

Anglolmay sinoating,

Bardoshu qanoating,

Hamisha lolmiz, hayron,

Kattayu kichik har on.

 

Oymomajon oymoma,

Yonimga tush bir zumga.

Yaqindan bir koʻroyin,

Chiroyingga toʻyoyin.

 

HAYVONOT BOGʻIDA

 

Hayvonot boqqa bordik,

Qizim, jajji nabiram.

Har xil jonivorni koʻrib

Hayratga tushdik biram.

Arslon ogʻzin ochib

Pishqirib berdi qarang,

Qoʻrqib ketganimizdan

Qochib ulgurdik arang.

Bahaybat ayiqpolvon

Joyidan hech jilmadi,

Siylab uning yoniga

Non tashlasak yemadi.

Ertaklar “qahramoni”

“Ayyor tulki” unvoni,

Oʻz dumiga mahliyo,

Bizga boqmadi qiyo.

Navbat keldi boʻriga

U qafasning toʻrida.

Yonib turar koʻzlari,

Vahimali yuzlari.

Maynavozchi maymuncha

Xursand koʻrindi buncha.

Bodroq bersak ozgina

Yeb oldi u tezgina.

Chugʻur-chugʻurga toʻla

Mitti qushlar xonasi,

Navbat bilan sayrashni

Oʻrgatmabdi onasi.

Akvariumda baliqlar

Dumini liqillatar.

Qanotlari tillodan,

Koʻz qamashar jilodan.

Eh-he qancha jonvorni

Koʻrib qaytdik birma-bir,

Davomini sizlarga

Aytaman, hozircha sir.

 

MEN SINGLIMGA TARJIMON

 

Jajjigina singlimning

Bordir qiziq oʻz tili,

Tinglagan har kishining

Ochilar bahri dili.

 

Baʼzan qoʻshni bolalar

Uni qurshab olishar,

Goh yolborib, goh aldab

Asta gapga solishar.

 

Konfetni deydi u “oh”,

Issiq taom, choyni “bah”,

Kuchukni deydi “bobov”,

Mushuk uning-chun “miyov”.

 

Yangi koʻylak kiysa gar,

Gir aylanib der “hay-hay”.

Radioni koʻrsatib,

Qoʻyib ber deydi “nanay”.

 

Quvlashib uydan uyga

Oʻynaydi aji-aji,

Yomon narsani koʻrsa,

Labin burib der “biji”.

 

Sanaybersam qatma-qat,

Tuzilar katta lugʻat.

Kelganda uyga mehmon

Men singlimga tarjimon.

 

DURDONA NIMA DEYDI?

 

Mening ismim Durdona,

Oilada men bir dona…

 

Bogʻchadagi oʻrtoqlarim

Birin-sirin ketishdi.

Voy, nega oyijonim

Bugun ishda kechikdi?

Hamma ketdi bogʻchada

Qolmadi qarang hech kim,

Bogʻcha opam nimanidir

Daftariga yozar jim.

Qoʻgʻirchoq oʻynay-oʻynay

Oxir juda zerikdim,

Sogʻinch toʻla nigohim

Deraza tomon tikdim.

Bogʻcha opam bagʻriga

Bosib erkalab qoʻydi,

Oyimdek asalim, deb

Meni achomlab suydi.

Oyim bilan dadamni

Men bilan uzoq kutdi,

Quyosh qizargan mahal

Yur, deb qoʻlimdan tutdi.

Shu kuni oyimlarda

Muhim majlis boʻlibdi,

Yana buni qarangki,

Uzoqqa choʻzilibdi.

Nahot majlisni mendan

Afzal koʻrsalar oyim,

Akam, opam boʻlsaydi

Erta ketardim doyim.

 

MUSTAQILLIK ARCHASI

 

Yurtimning xushsuratiga

Koʻrk bergan baland archa,

Har yilgidan chiroyliroq

Bezangansan ayt buncha?

 

Boʻyi-basting xoʻp kelishgan,

Yarashibsan maydonga.

Katta-kichik qoʻl ushlashib,

Oshiqar sen tomonga.

 

Kamalakrang chiroqlardan

Munchoq taqib oldingmi?

Senga intilganlarni

Koʻp hayratga soldingmi?

 

Qoʻsh laylaklar qanot qoqib

Bayram bilan olqishlar.

Seni koʻrmoq uchun ketmay,

Qishlab qolganmi qushlar.

 

Oʻyin-kulgu avjga mingan,

Chehralarda tabassum.

Ot oʻyinu argʻimchoqlar

Bolalar bilan gavjum.

 

Moʻjizalar oʻlkasida

Sehrli goʻsha misol,

Qalblarga quvonch ulashib,

Mayli, ertak boʻlib qol.

 

SOAT

 

Erkin ertalab tursa

Soat qolibdi toʻxtab.

Chiq-chiq degan sozini

Chalmay qolibdi uxlab.

Ustasiga yugurdi

Olib uni qoʻliga,

Dedi: – Davosin topib

Solib bering yoʻliga.

Batareyka oʻrnatdi

Usta aka shifokor,

– Qorni ochibdi-ku, – deb

Dardin topibdi tezkor.

Endi har tong soati

Jiringlab uygʻotadi,

Erkinjonni oʻqishga

Kuy chalib kuzatadi.

 

QOʻShNI BOLA

 

Qoʻshni bola Ibrohim

Oʻzi shoʻx, soʻzi shirin.

Bir gʻalva boshlar doim

Sira bilmaydi tinim.

 

Tunov kuni koʻchada

Bir holda koʻrib qoldim.

Peshonasida gʻurra

Qiziqib gapga soldim.

 

Ha toychoq, nima boʻldi,

Yo yiqilib tushdingmi?

Qogʻozdan kema yasab,

Yo osmonga uchdingmi?

 

Ibrohim der: – Akamga

Oʻynaylik deb turvoldim.

Quvlayotib boshimni

Isitgichga urvoldim.

 

Zahro HASANOVA

2 Mulohaza

MULOHAZA BILDIRISH

Mulohaza kiritilmadi!
Ismi sharifingizni kiriting.