Кўнгил куйлари

0
94
марта кўрилган.

“Туроб Тўланинг қўшиқлари шоирга ҳақиқий шуҳратни тақдим этди”, деган эди академик шоир Ғафур Ғулом. Бу фикрни давом эттириб Саид Аҳмад: “Халқимиз – ўқувчилар бу шоирни севиб қолди. Унинг бирор куни йўқки, ўз халқи билан куйламаса” деб ёзган эди. Ҳақиқатан, Ўзбекистон халқ шоири Туроб Тўла қаламига мансуб қўшиқлар ҳамон жаранглаб турибди.

Туроб Тўланинг яқинда “Илм-Зиё-Заковат” нашриёти томонидан чоп этилган “Танланган асарлар” китобини варақлар экансиз, кўнгилга яқин қўшиқлар билан бирга “Қари қиз”, “Қизбулоқ”, “Қувваи қаҳқаҳа” сингари драматик асарлар, “Етти зоғора қиссаси”, жаҳон адабиёти намояндалари В. Шекспирнинг “Қийиқ қизнинг қуйилиши”, Ф. Шиллернинг “Мария Стюарт” драмалари таржимаси, мақола ва суҳбатлар билан танишасиз. Бир сўз билан айтганда, устоз адибнинг ижодий мероси ҳақида тўла тасаввурга эга бўласиз.

Ушбу китоб саҳифаларидан олинган қадрдон қўшиқлар эътиборингизга ҳавола этилмоқда.

 

Тошканим, онам

Бунча яхши бўлмасанг,

Тошканим, онам!

Сени бирпас кўрмасам,

Кўзларимда нам.

 

Кимсан ўзинг, нимасан,

Сеҳргармисан?!

Бунчалар қийнамасанг,

Зулфи зармисан?!

 

Юролмадим йироқда,

Сени соғиниб.

Бамисоли фироқда

Ёниб, оҳ уриб.

 

Сенсиз хаёлим, ҳолим,

Парокандадир.

Қайда бўлсам, хаёлим,

Кўнглим сандадир.

 

Бунча яхши бўлмасанг,

Азизим, онам!

Сени бирпас кўрмасам,

Кўзларимда нам.

 

 

Лайломисан сан

 

Кимсан тасаддуқ, Лайломисан сан?

Лайлолар ичра танҳомисан сан?

 

Шикаста нола кимга ҳавола?

Кўнгил куйига ошномисан сан?

 

Очилдими гул, кўйида булбул,

Яшнаб очилган раъномисан сан?

 

Кўнглимни очдинг бир-бир варақлаб,

Кўнглимдаги шул маъномисан сан?

 

Мавжига олди, дарёга солди,

Ошиқлар ўтган дарёмисан сан?

 

Кўнглимни гулдек ороладинг хўб,

Кўнглимга шунча оромисан сан?

 

Ороларингдан ўргилса жоним,

Оҳ, севги шунча аъломисан сан?

 

 

Ойбулоқ

 

Оймома чўмилган ойбулоқ,

Ойбулоқ, кўнглимни ёй, булоқ.

Куйлаган тилингдан ўргулай,

Анвойи куйларга бой булоқ.

 

Бу ташна дилимни шод қил,

Шод қил ҳамда обод қил.

Мен айтай дилимнинг розини,

Сен уни авайлаб ёд қил.

 

Ёд қил авайлаб, куйга сол,

Куйга сол, куй билан дардим ол.

Дардим ол куйимни янгратиб,

Эшитиб қайрилсин у хиёл.

 

У хиёл қайрилса, бас, менга,

Бас, менга, у кирса азмингга.

Наҳотки шунчалар суйганим,

Шунчалар куйганим оз менга?..

 

Оймома чўмилган ойбулоқ…

 

uzas.uz

МУЛОҲАЗА БИЛДИРИШ

Мулоҳаза киритилмади!
Исми шарифингизни киритинг.