Kipriklarim nayzasiga ilingan osmon

0
76
marta ko‘rilgan.

 * * *

“Chorgoh”mi, “Ushshoq”mi yoki “Munojot”,

Shamollar qanday kuy?..

Titraydi havo.

Bugun avlodlardan izlarmi najot

Changlarni to‘zg‘itib bu sharqiy navo?!

Odamlar tinglamas,

Odamlar loqayd,

Shamolning kuyligin yo olmas payqab.

Bunday befarqlikka qilolmay toqat

Daraxtlar, maysalar turar bosh chayqab.

 

* * *

Yurak osmonida azob naysoni,

To‘sadi nurlarni – sevinchlar yo‘lin.

Bo‘g‘ziga tiqilar Harorat joni,

Beg‘ubor Cheksizlik ko‘tarar qo‘lin.

Yurak ham bo‘g‘ilar yetmay nafasi,

Tumanlar ortida ingraydi surur.

Tinadi yuzlarda kulgilar sasi,

Iztirob – izg‘irin to‘kadi g‘urur.

 

Sovuq so‘z!..

Vujudni – yurak olamin,

Qahraton qahriday qo‘ydi sovutib.

…Sevinchlar yo‘lini ochadi sekin,

Muzlagan ko‘ngilni kimdir ovutib.

 

Nurlardan yorishgay yurak osmoni!..

 

U ShUNDAY KUCHLIKI…

 

O‘rol Tansiqboyev xotirasiga

 

U shunday kuchliki…

Bo‘shliqni yoyday –

Zamin tepasiga qo‘yolgan egib,

Tip-tiniq osmonni balandroq chizgan

Ketmasin deb qushlar qanoti tegib.

 

U shunday kuchliki…

Chizgan zavolsiz –

Yerga to‘ktirmasdan o‘rik gullarin.

To g‘uj-g‘uj dovuchcha tugmagunicha

O‘zi to‘sib turgan shamol yo‘llarin.

 

U shunday kuchliki…

Hayron qolmagan

Pag‘a bulutlarni paxtadek ushlab.

Turnalar uchmoqda suvratlarida

Uzun va yaltiroq nurlarni tishlab.

 

Chizolgan bir vaqtlar sevgani bilan

Kezgan qirg‘oqlarni,

Qalin bog‘larni.

U shunday kuchliki,

O‘z xonasiga –

Kiritib qo‘yolgan qorli tog‘larni!

 

TAXTADAGI IXTIRO

 

Bo‘r bilan yozildi buyuk ixtiro,

Doskaga chizilar noayon shakli.

Jam edi unda nur, fikr, ehtiros,

Hech bitta narsaga yo‘q edi taqlid.

 

Ko‘p ishlar bajarar oddiy shisha nay…

Olimlar qaytishar hayrati katta.

So‘ng shuncha qudratni odatdagiday

O‘chirib tashlaydi chirigan latta.

 

SOMON YO’LI

 

Somon yo‘li. Bosilmaydi bu yo‘lning changi,

Uxlamaydi o‘tib ketgan karvonlar zangi.

 

Kipriklarim nayzasiga ilingan osmon,

Shu tig‘ bilan o‘rtasidan tilingan osmon.

 

Yulduzlar-ku olov tuyoq tevalar izi,

Ko‘zlarimni ochtirmaydi changlari to‘zib.

 

Yulduzlarning yon-girdida bo‘shliq huvullar,

Yutmoq bo‘lib bu sahroda bo‘ri uvillar.

 

Kipriklarim nayzasida ingraydi osmon,

Naq ustimga qulamoqchi cheksizlik shu on.

 

Somon yo‘li surat yanglig‘ qoqilgan ko‘kka,

Ikki uchi ufqlarga sanchilgan tikka.

 

KUMUSHBIBI AZASI

 

Kulfat rangi sachragan yorug‘liklar qoraydi,

Qil sig‘magan yurakday olam bag‘ri toraydi,

Endi faqat Otabek g‘ussalarga yaraydi,

O‘n to‘rt kunlik oy kabi to‘lganding, Kumushbibi,

So‘nggi jonga ilinib to‘lg‘onding, Kumushbibi.

Endi jonsiz sevgingni shul qaro yer ko‘targay,

Yig‘lab qaro tobutni Otabek er ko‘targay,

Mening ko‘z yoshlarimni titrab bu she’r ko‘targay,

Nurmas, yig‘i-dodlarga cho‘lg‘onding, Kumushbibi,

So‘nggi jonga ilinib to‘lg‘onding, Kumushbibi.

 

Qolmadi-ku dunyoda yonib bag‘ri butunlar,

Ko‘kraklarda tug‘ilib ko‘kda o‘lar tutunlar,

Char-churs yonar oromlar bo‘lib g‘amga o‘tinlar,

Har yurakda “oh!” bo‘lib uyg‘onding, Kumushbibi,

So‘nggi jonga ilinib to‘lg‘onding, Kumushbibi.

 

Sen kuylarga o‘xshatgan seravj soy ham yig‘laydi,

Nuray-nuray yarimta bo‘lgan oy ham yig‘laydi,

Seni o‘zi yaratgan Julqunboy ham yig‘laydi,

Nogoh quchgan baxtingday kulganding, Kumushbibi,

So‘nggi jonga ilinib to‘lg‘onding, Kumushbibi.

 

QO‘ShIQ

 

Oh urdirma, oh ursam

Tog‘lar toshi qulaydi.

Yolg‘iz borsam, yor seni,

Qashqadaryo so‘raydi.

 

Sensiz yellar o‘raydi,

Uraydi-ku yo‘limni.

Holimni kim so‘raydi,

So‘nik ko‘rsa fe’limni.

 

Baqaterak, jon terak,

Xo‘p toliqdim, bo‘l tirgak.

Kelinim bir ko‘ray deb

Onaginam jonsarak.

 

E’zozga zor bu tuproq,

Sog‘inchlardan tirnalar,

Olislarga uchadi,

Qarang, elchi turnalar!

 

Baland Hisor past bo‘lib,

Shosh suluvin ko‘ray, der.

Yolg‘iz borsam, yor seni,

Qashqadaryo so‘raydi!

 

Nazar ShUKUR

 

“Yoshlik”, 2014 yil 5-son

MULOHAZA BILDIRISH

Mulohaza kiritilmadi!
Ismi sharifingizni kiriting.