“Kel, seni koʻzlarim ustida tutay”

0
269
marta koʻrilgan.

VOQIF

(Ozarbayjon)

 

* * *

Har yetuk goʻzalni goʻzal demasman,

Goʻzalda bir gʻayri alomat boʻlar.

Sochlari bir yonda, beli bir yonda,

Oʻzi bilmas, oʻzida bir odat boʻlar.

 

Raqsga tushsa parvoz etar nimtana,

Sochi qalqib, uchi uchar har yona,

Peshanabogʻ manglay qisib hayrona,

Serkillagan toʻshi qiyomat boʻlar.

 

Mujgon oʻqin otar, labi dur toʻkar,

Yuragim chokini birma-bir soʻkar.

Soʻzi tuzli boʻlar, dudogʻi shakar,

Har suhbati ajib hikoyat boʻlar.

 

Boʻyni uzra sadaf marjon tizilar,

Qiyo boqsa jon tanimdan uzilar,

Surma tortgan qora koʻzlar suzilar,

Oʻtirib turmogʻi qiyomat boʻlar.

 

Asli goʻzal shunday xiromon kezar,

Niqob tutib, zulfi parishon kezar,

Sahar sayrga chiqsa, guliston kezar,

Sevgisida oʻtli harorat boʻlar.

 

Voqif qurbon boʻlsin qoʻsha togʻiga,

Taqimga chirmashgan soch soʻrogʻiga,

Qoshlari oʻxshaydi oy oʻrogʻiga,

Tomosha aylagan betoqat boʻlar.

 

* * *

U goʻzal jononlar haydar kokili

Yana menda dinu imon qoʻymadi.

Mastona koʻzlari, xumor boqishi

Aqlimni oldi-yu, omon qoʻymadi.

 

Mubtalo boʻlmasam yonoqda xolga,

Albatta yetardim aqlu kamolga,

Qaddimni bukmasdi oʻxshatib dolga,

Naylayin, bir qoshi kamon qoʻymadi.

 

Yoʻlim tushdi, evoh, bir agʻyor bilan,

Kecha-kunduz yondim ohu zor bilan,

Kunlarim oʻtardi sevgan yor bilan,

Tushdi oramizga yomon, qoʻymadi.

 

Voqif unga boshdan yorimsan, dedi,

Yorimsan dedi-yu, oxir pand yedi,

Bugun jonon bizga kelmoqchi edi,

Uni yana raqib, gumon qoʻymadi.

 

* * *

Koʻzlaring jalloddir, boqishing xanjar,

Qonli gʻamzang kabi boʻlmas balo, qiz!

Nozli-nozli soʻzlar qotib kulganda,

Oʻxsharsan shakarga, qandga, halvo qiz!

 

Lablaring gʻunchadan, guldan aʼlodir,

Sayr ayla bogʻchada, guldan aʼlodir.

Oq taning kechada guldan aʼlodir,

Ey, qomati shamshod kabi raso qiz!

 

Umringga koʻp duo-sano deganman,

Gʻurbatu dardimni sana deganman,

Shirin jonim qurbon sanga deganman

Boshlaganda el aro mojaro, qiz!

 

Qomating, boʻyningu boʻying goʻzaldir,

Mushkinu rayhoning, boʻying goʻzaldir,

Shaydoying deydiki, kuying goʻzaldir,

Bu dunyoda boʻlmas bunday shahlo qiz!

 

Voqifman, yaqin kel, ayilma mendan,

Aqlimni, hushimni ayirma mendan,

Yigʻlayapman, emiz meni siynangdan,

Meni siynang beshigiga bela, qiz!

 

Mikoil MUSHFIQ

(Ozarbayjon)

 

KIYIK

 

Bexosdan sakrama qoya toshlarda,

Toshlar oyogʻingni ezar, kiyigim!

Kel, seni koʻzlarim ustida tutay,

Etma oshigʻingdan hazar, kiyigim!

 

Nozlanib-nozlanib qiyo boqqanda,

Maʼsuma koʻnglimni oʻtga yoqqanda,

U koʻz chashmasidan nurlar oqqanda

Qaynar buloqlarga oʻxshar kiyigim!

 

Yulduzlar husningdan aylaydi soʻroq,

Badnazar koʻzlardan boʻl, erkam, ogoh,

Koʻksimda sayr ayla, ketma koʻp yiroq,

Hijron togʻlarini kezar kiyigim!

 

Afanasiy FET

 (Rossiya)

 

* * *

Kuz naqadar sovuq va qurgʻoq,

Shol roʻmoling boshingga oʻra.

Olov yonar ufqda, mudroq –

Qaragʻaylar osha bir qara!

Shimol tuni – koʻzing porlashi

Xayolimdan uzilmas hech choq,

Yongan bilan koʻzing otashi

Isitmaydi qalbimni biroq!

 

Abdulla TOʻQAY

(Tatariston)

 

BOʻRON

 

Tinchgina turgan havoni qopladi birdan tuman;

Qor uchib, qor sepkilib, qorga koʻmildi har tomon.

 

Qor urar yuzga rahmsiz, koʻz ochib boʻlmas sira;

Har qaro narsa boʻri yoki qaroqchiga oʻxshar, qara!

 

Qorni yenggandek tushar yerga toʻlin oy yogʻdusi;

Goh sarigʻ, goho kumush qoʻrqqan kabi oyning yuzi.

 

Ne balo! Qof togʻidan jinlar toʻzib solgan yigʻi?

Yo teshilganmi xudoning tengi yoʻq zoʻr yostigʻi?

 

Qor boʻlib yerda ucharmi ushbu yostiq parlari?

Izgʻishib parlar yigʻarmi yoki Qof togʻ jinlari?

 

Ne ajabkim, qor orasidan termilib ul oy kular,

Men gʻarib zahmatda goʻyo – charbogʻingdan boy kular!

 

XO ShI MIN

(Vyetnam)

 

* * *

Elikka yetmasdan baʼzi bir odam

Qarilik daʼvosin qiladi har dam.

Oltmishdan nariga oʻtib ketsam ham

Oʻzimni sezaman tetik va bardam.

Kamtarin bir hayot kechirmoq kerak,

Kamtarda hamisha yosh boʻlur yurak.

Mehnatdir hayotning koʻrki, negizi,

Muntazam mehnatdir yoshlikning oʻzi!

 

* * *

Bu kecha toʻlin oy naqadar koʻrlam!

Daryoning suvlari goʻyoki koʻklam –

Koʻkiga tutashib ketgandek ulkan.

Qirgʻoqda koʻp harbiy rejalar tuzdik.

Tun ogʻgach, qayiqqa oʻtirib suzdik:

Oy nuri qayiqda limmo-lim ekan!

 

Xadzime SATO

(Yaponiya)

 

HAYOT YOʼLI

 

Tik ketgan uzun yoʻlak,

Chiroqlar bedor.

Koʻrimsiz eshiklar tizilmish qator.

Yigirma ikkinchi kameradir bu,

Oʻgʻrining koʻnglidek eshigi qora.

Men bunga tashlangan bir jinoyatkor.

Bir sotqin sudyaning hatto hukmi bor!

Ajalim eshikda,

Kutib turadi.

Ertalab jallodim olib kiradi.

U meni doʻstlardan judo qiladi.

Bahorim yulduzin koʻkdan yuladi.

Alvido, qoyadan oqqan irmoqlar,

Alvido, sof havo,

Shifoli togʻlar!

Ogʻirdir sizlardan mangu ayrilmoq!

Qanchalik bu ogʻir boʻlmasin, biroq

Men taslim boʻlmayman,

Kutmayman shafqat.

Hayotim yoʻlidir kurashmoq faqat.

Tinchlik va erk uchun boʻlsa gar kerak,

Hamisha fidodir

Bu jon, bu yurak!

 

Masaki IMAMURA

(Yaponiya)

 

SAFNI TUTING, KISHILAR!

 

Kurash chogʻi keldi bugun,

Safni tuting, kishilar!

Bu balodan xalos etur –

Yurtni metin kishilar!

 

Bitsin Kisi[1] hukumati!

Bitsin barcha sotqinlar!

Kecha yurtni qirgʻin etgan,

Bugun uni xarid qilar!

 

Olgʻa bosing, yor-birodar,

Olgʻa yuring, oʻrtoqlar.

Vatanini jondan sevgan

Bugun uni ardoqlar!

 

Saflaringiz qattiq tuting,

Qoʻli qadoq kishilar!

Dushmaningiz tor-mor eting,

Sizni zafar olqishlar!

Vatanini chin sevganlar,

Bir saf boʻling ushbu choq,

To pokiza boʻlgunicha

Xoinlardan bu tuproq!

 

Birlashmoqning vaqti yetdi,

Maydonga kir, yovni ur!

Bizning qoʻlda barcha quvvat,

Qani, ey xalq, olgʻa yur!

 

Sirodzi SATO

(Yaponiya)

 

IJOD

 

Ijodda husnixat

Koʻp ham zarurmas…

Mayli, u chaplashgan,

Mayli, jimjima,

Mayli, u xunukdir,

Tik, adl turmas,

Yo oʻngga, yo chapga

Qiyshaysa nima!

Mayli, u oʻqishga

Qiyin boʻlsa ham.

Magʻzida haqiqat qoni yursa, bas!

Nomusu insofdan nido bersa, bas!

Bundayin dastxatlar

Eh, qanday koʻrkam!

Shu uchun hamisha

Ikki soʻz faqat,

Ikki soʻz yozaman:

“Tinchlik! Hurriyat!”

 

ShUHRAT tarjimalari

 

“Jahon adabiyoti” jurnali, 2013–4


 

[1] Amerika tarafdor boʻlgan yapon hukumati boshligʻi.

MULOHAZA BILDIRISH

Mulohaza kiritilmadi!
Ismi sharifingizni kiriting.