Jimirlaydi sirli yog‘dular

0
13
marta ko‘rilgan.

SEN VA YOMG‘IR

 

Yomg‘ir yog‘ar. Tom uzra qitmir

Bola kabi sakrar tomchilar.

Yomg‘ir yog‘ar. Tomchilar ritmin

Tinglab, yodim guldek ochilar.

 

Yomg‘ir yog‘ar. Zamin olar tin –

O‘ylamasdan mehnat darsini.

Ko‘z oldimga keltiraman jim

Shtrausning sho‘xchan valsini.

 

Ho‘l bo‘ladi pichan g‘arami,

Tevarakni tutar yoz isi.

Huv, terakzor – hislar harami,

Yuviladi izhorlar izi.

 

Bosiladi yo‘llarda g‘ubor,

Majnuntollar qaraydi o‘ksib.

Chuqur nafas olar tutqator

Nam havoga to‘ldirib ko‘ksin.

 

Sen oynadan boqasan g‘amgin,

Nahot, soflik yetmadi sanga?

Yomg‘ir singan oyna ko‘zidan

Sizib kira boshlar xonangga.

 

 

DILGA BORAR YO’L

 

Somon yo‘li qalbingga eltar,

Biroq unda adashmoq oson.

Baxt izlagan yo‘qolar-yitar

So‘ngan yulduz kabi – begumon.

 

Ipak yo‘li – qalbingga ko‘prik,

Hislarimdan karvon tortaman.

Tuyalarga mangu ayriliq

Va ko‘zyoshim durin ortaman.

 

Somon yo‘li – samo xilvati,

Jimirlaydi sirli yog‘dular.

Ipak yo‘li – g‘arib ulfati,

Zarralari – porloq injular.

 

Yor, qalbimni tevaga ortdim,

Tuya cho‘kib oldi, yurmadi.

Ikki yo‘ldan tanlab qay birin,

Senga qanday borar – bilmadim!

 

 

SOYa

 

Sen yo‘q eding. Eshikdan kirib

Keldi g‘amning kulrang soyasi.

O, yo‘q edi bunda sir, firib,

Tingan edi baxtning ham sasi.

 

Qafasiga o‘rgangan qushdek

Unga boqdim umidvor, sokin.

Nigohimda yo‘q edi hadik,

Qalbim titrab turardi lekin.

 

Yarim kecha qaytding kayfing chog‘

So‘zlagancha yolg‘on-rostingni.

Ko‘zlaringda suzardi charchog‘,

Sen ko‘rmading yangi do‘stimni.

 

Men unga: “Qol!” demovdim, ishon,

Nega hanuz ketmaydi, bilmam?

O‘rtamizda o‘shandan buyon

Yashayotir kulrang soya – g‘am.

 

 

TO‘RTLIK

 

Oshiq dilim nayda manim,

Nayistonim qayda manim?

Yerda nega giryon kezgum,

G‘amim buncha mayda, manim?

 

 

SUZAYOTGAN OY

 

Halok bo‘lgan botir qalqoni

Misol ko‘kda suzar to‘lin oy.

(Nikolay GUMILYOV)

 

Qishda uyg‘oq qolgan ayiqday

Besaranjom kezinar kecha,

Oy suzadi kumush qayiqda

Oshiqlarning xayolin icha.

 

Osmon yig‘ar bulutdan qo‘shin,

Chorlov kabi yonadi chaqmoq.

Oy tushmayin kumush qayiqdan

Nurin tarar: moviy, sarg‘ish, oq.

 

Chaqmoq yonar yana darg‘azab –

Birlashganday million ko‘zlar.

Shoh qahridan qo‘rqqan kanizak

Kabi titrab turar yulduzlar.

 

Noz qiladi oy, nimasiga?

Bulut uni qo‘ymagay xoli –

Yelenani o‘z kemasiga

Chorlayotgan Paris misoli.

 

 

TUG‘DONA

 

Tug‘dona butasiday

Metindir ko‘nglim manim.

Fursatni qo‘ldan bermay

Tumor yasa, suyganim.

 

Yo‘ldosh bo‘layin toki,

Tulporing hech tolmasin.

Beli zirqirab yoki

Ora yo‘lda qolmasin.

 

Tig‘ingni ushla mayin,

Yor, qahrga ber barham.

Mehr yumshatar tayin –

Hatto tug‘donani ham.

 

 

HOVUZ VA MAJNUNTOL

 

Hovuz – pahlavonning hovuchi,

Unda sochin chayar majnuntol.

Kaftigacha yetib soch uchi

Botir qalbi titranar xushhol.

 

Go‘zallikka matonat panoh,

Guvoh bo‘lar makon va zamon:

Shu majnuntol quriguncha to

Hovuchini tortmas pahlavon.

 

Gulnoz MO‘MINOVA

 

“Sharq yulduzi” jurnali, 2015–3

MULOHAZA BILDIRISH

Mulohaza kiritilmadi!
Ismi sharifingizni kiriting.