Dildan dilga borar yoʻlimsiz

0
232
marta koʻrilgan.

***

Men tirilsam,

Tovush boʻlaman.

Usmon AZIM

 

Men qachon tovush boʻlaman?!

Qachon tirilaman?!

 

Tirilgach undosh tovush boʻlaymikin,

Va yoki unli?..

 

Undosh tovush boʻlish anchayin mushkul.

NAFAS yoʻllarida qancha toʻsiqlarga

duchorlanishi ayon barchaga.

 

Toʻsiqlardan seskanib,

Qaror qilaymikin yoki unli boʻlishga?!

 

Bilmadim…

Bu endi, men bilan birga

NAFAS yoʻliga ham uzviy bogʻliqdir.

 

… Farqladim. Undosh tovushning ham

xili koʻp ekan.

 

Nihoyat NAFAS yoʻlidaman…

Va shu ondan ahd qildim;

Boʻlmoqlikni faqatgina UNDOSH TOVUSH!

Undosh boʻlganda ham –

Sonor-ovozdor, jarangli, albat!

(Xudo xohlasa!)

 

Ayni dam didimga maʼqul tovush – R!

Shundan soʻng murodlandim,

Undosh tovush-R boʻlmoqqa!

 

Toki, menga murojaat qilganlarning

Un paychalarida

Mudom titroq tugʻilaversin!

 

2011

 

 

***

 

Barmogʻim oʻpadi, chiroq tugmasin

Zulmat yiqiladi, xonamga shu on.

Mening gʻaflat tunda bedorligimga,

Ochiq derazadan, oy boqar hayron.

 

Soʻng yana barmogʻim oʻpar tugmani,

Shisha lampa sochar, qizgʻonmay nurni.

Oy hayron…

Men esa, unutolmayman…

Kecha toʻyi boʻlgan,

Bir goʻzal hurni.

 

Takror oʻpaverar, tugmani barmoq…

 

2007

 

 

Yer sevgisi

 

Insonni shu qadar kuchli sevar yer,

Osmondan rashk qilib erkalab, suyar.

–Men seni hech kimga berolmayman, der,

Hech kimga ishonmay, boshiga qoʻyar.

 

Osmonga sogʻinch koʻp azob yetqazib,

Sabr kosasini qoʻyar toshirib.

Yer shunda bagʻridan bir xona qazib,

Insonni qoʻyadi mangu yashirib.

 

2009

 

 

Bahorgi manzara

 

Bogʻda bir juft gulning nimjonrogʻini

Bexos yoqqan jala belin sindirdi.

Bir-birin suyab oʻsgan gullarni

Shu jala firo-oqqa koʻndirdi…

Butun hovli uzra yotib oldi gʻam,

Endi

Yolgʻiz qolgan gulning umrida

Ayriliq boshlandi…

Gʻussa boshlandi.

Bunday koʻrgulikka chidolmay hatto,

Koʻngilchan oynaning koʻzi yoshlandi.

 

2011

 

 

Boriga shukr

 

Osmonim musaffo, tinch yurt, tinch elim,

Balki, baxt degani aslida shudir?!

Uning quchogʻida tugʻildim, oʻsdim…

Xudojon!

Shu yurtning boriga shukr!

 

Boyman! Ota-onam, shukr, yonimda,

Uka-singillarim joni-jonimda,

Enamning duosi har bir onimda,

Ming baloga qalqon… boriga shukr!

 

Qarindosh, qoʻshnilar, hamqishloqlarim,

Oʻzimdan yaqinim jon oʻrtoqlarim.

Qadoq qoʻl, bugʻdoy rang, koʻngli oqlarim,

Rizq terar qoʻlimning boriga shukr!

 

Jonimdan oʻtgani tanimga sirmas,

Qalb ming chegaligi gʻanimga sirmas.

Ulgur deb parvozga chorlar, u bir… rost,

Hayotda oʻlimning boriga shukr!

 

2012

 

 

***

 

Ustoz shoirlardan umr – arava,

degan tashbehlarni tingladik beun.

Bizni oʻtqazishib aravalarga,

Aravada yoʻqdir koʻplari bugun.

 

Bir kun sherik qilib olgum bir hamroh,

Ikkovlashib yana hamroh olamiz…

Ulovga ishonib yosh hamrohlarni,

Bir kun… ikkimiz ham tushib qolamiz.

 

Shunda, ey yosh hamroh, jilovni tutib,

Manzilga oʻngdan yur, chap yiroq boʻlsin.

Sheriging-la koʻp-koʻp yosh hamroh olib,

Ular-la yurganing – yoʻl uzoq boʻlsin!

 

2012

 

 

***

Sinfdoshim Azamat Jalilov

xotirasiga

 

O! Azamat doʻstim, qaydasan un ber!

Doʻstlar jam, ketyapmiz yoʻlni toʻldirib.

Bu oxiri yoʻq yoʻl qayga boshlar iz,

Seni bizdan mangu ayro qoldirib?!

 

Bugun doʻstlar birga hamon yoʻldamiz,

Har kim har tarafga burilib yurdi.

Kimdir oʻngdan yurdi manzilga qarab,

Kimdir baʼzan chapga burilib turdi.

 

Yoʻldamiz… ortda-chi qolsa oʻlik on,

Tuproqqa qorishib orzular qoldi.

Qolsa yangi armon, soʻz bilmas vijdon,

Buloq suvdek toza tuygʻular qoldi.

 

Yoʻldamiz! Biz uchun muhimi ham shu,

Qoʻlimizday kalta oʻylarimiz ham.

Yelkadagi gʻamni roʻy-rost koʻrsatib,

Choʻzilib turibdi, boʻylarimiz ham.

 

Xullas, yashayapmiz qoʻlga qoʻl berib,

Quvonchu gʻamlarni teng boʻlayapmiz.

Kimdir yupun qolsa umr qishida

Birgalashib yoqa, yeng boʻlayapmiz.

 

Har kim har tarafga yoʻl burib ketdi,

…Men ham koʻpga Soʻzdan gul sochmoqchiman.

Baland parvoz bilan (Xudo xohlasa!)

Qishlogʻimdan Koʻkka yoʻl ochmoqchiman!

 

Ilkda tutib TAQDIR nomli xarita,

Yoʻl izlab ketyapmiz Sen tomonlarga.

Koʻrinmas xarita bizni ishqilib,

Boshlab borsin, illo, o-osmonlarga.

 

O! Azamat doʻstim, qaydasan un ber!

Doʻstlar jam, ketyapmiz yoʻlni toʻldirib.

Bu oxiri yoʻq yoʻl qayga boshlar iz,

Seni bizdan mangu ayro qoldirib?!

 

 

Har kim har tarafga yoʻl burib ketdi,

…Men ham koʻpga Soʻzdan gul sochmoqchiman.

Baland parvoz bilan (Xudo xohlasa!)

Qishlogʻimdan Koʻkka yoʻl ochmoqchiman!!!

 

2012

 

 

***

 

Ey, magʻrurginam!

Kun kelib… dilingda “Afsus” otliq

bir xat qolgʻusi.

 

Bir Xudoga, bir senga

ayon boʻlgan sir xat qolgʻusi.

 

Bugun sening izlaringga

zorligim rostdir,

gar kelmas boʻlsang….

 

Kun kelib…

Albatta, izlarimda labingdan

dastxat qolgʻusi.

 

2012

 

 

***

 

Qadim zamonlarda dushman lashkari

Tunda bosib olmish sokin qishloqni.

Qishloq ahlin asir olib, haydamish,

Koʻklarga sovurib xokin qishloqni.

 

Ona tuprogʻidan uzilib izi,

Tizilib borarlar qayonga?

Kimlar?..

Ular…

Ular axir ketishar qayon?

Ota-onasi-la minglab yetimlar.

 

2012

 

 

***

… dunyoni tasvirlab boʻlmas hayqirib.

Oʻljas Sulaymon

 

Qabrlarni ziyorat aylagach Bahor,

Asta, qabristondan tashqari chiqdi.

Soʻzsiz suhbatlarning shavqidan sarmast,

Sukutli oshyondan tashqari chiqdi.

 

Boshin urib oldi, chiqib… shovqinga,

Borliq kular edi, baland baqirib.

Ichkarida sukut bosh chayqab derdi:

“Dunyoni tasvirlab boʻlmas hayqirib!”

 

2012

 

 

***

 

Sen doim och qolsang

ovqat yeysan.

Zeriksang kitob oʻqiysan.

 

Lekin, bir bor boʻlsa ham

nega ovqat yemasang –

och qolishingni,

Kitob oʻqimasang – zerikishingni

oʻylab koʻrganmisan?!

 

Yoʻq, albatta! Sen bu haqda

hech qachon oʻylab ham koʻrmagansan.

Chunki…

 

Sen doim och qolsang

ovqat yeysan.

Zeriksang kitob oʻqiysan.

 

2012

 

 

Qoʻshiq

 

Oh, Sanam-yey, Shohsanam,

Ishq umrimga zang berdi.

Ming ohki, taqdirimga,

Yuzda xoling rang berdi.

 

Dil-dilga payvand edi,

Dil orzu-la band edi.

Nahot senga ishonib,

Oshiq yurak pand yedi.

 

Kim u mening baxtimni

Oʻziga oʻzlashtirgan?..

Yo otangmi, yo enang

Toʻyingni tezlashtirgan.

 

Baxtsizlik evaziga

Baxt kelmaydi, bilib qoʻy.

Shu gapdan otangniyam

Sen xabardor qilib qoʻy.

 

Toʻgʻri, dunyo topmadim,

Ishq – Haqdan tortiq devdim.

Lekin, seni chin dildan

Dunyodan ortiq sevdim.

 

Oh Sanam-yey, Shohsanam,

Ishq umrimga zang berdi.

Ming ohki, taqdirimga

Yuzda xoling rang berdi.

 

2012

 

 

***

 

Sheʼrlarim!..

Xudodan tilab olganim,

Koʻnglimdan qogʻozga tomgan soʻzimsiz.

Ohangda gʻaribim, bejilva, xomush,

Quyib qoʻygan kabi mening oʻzimsiz.

 

Sheʼrlarim!..

Sir uzra nafis koʻprigim,

Dildan dilga borar yoʻlimsiz, yoʻlim.

Orom arazlagan tunlarim haqqi,

Keltirarmikinsiz oʻlimsiz oʻlim ?!

 

2011

Dilmurod Doʻst.

MULOHAZA BILDIRISH

Mulohaza kiritilmadi!
Ismi sharifingizni kiriting.