Chinoz manzaralari

0
120
marta koʻrilgan.

“Ustozga maktublar” turkumidan

 

1

 

Xushmanzara joylari,

Soylari koʻp bu yurtning.

Qoʻl yetmas humoylari,

Boylari koʻp bu yurtning.

 

“Chinoz. Yangi mahalla”.

Oyogʻing tegmay yerga

Uch, ukajon, gʻirilla:

“Shaxsan Abdulla Sherga!”

 

“Bu mujda Qoʻrgʻonchadan”,

Shogird ismin xatladi.

Ozgʻinroq daryochada

Chopar daryo hatladi.

 

Qizlar tolbargak taqsin,

Shaftoli shoxin egsin:

– Nima boʻlsa ham, taqsir,

Xat egasiga tegsin!

 

“Assalomu alaykum!”

Ustoz, sogʻ-omonmikin?

Haqsoʻz, sheʼrsuyar mardum

Dardiga darmonmikin?

 

Quyi Chirchiqdan salom,

Daryo, bozorimiz bir.

Yoʻl, koʻl, xullasi kalom:

Masjid, mozorimiz bir.

 

2

 

Xushmanzara joylari,

Soylari koʻp bu yurtning

Qoʻl yetmas humoylari,

Boylari koʻp bu yurtning.

 

Ha, Chinoz koʻp qadim yurt,

“Loy janggi”n shohidi ul.

Endi koʻp gʻamlar unut,

Shodlanar gohida ul.

 

Yoshiga yosh qoʻshilib,

Biri ikki boʻldi, hay!

Buni qoʻsh daryo bilib,

Baliqlarga toʻldi, hay!

 

Qoʻshilishar noz bilan

Ikki dardi bir daryo.

Faxr etar Chinoz bilan

Chirchiq ila Sirdaryo.

 

Daryolar – bagʻri yarim –

Boʻyida bozor boʻldi.

Bozor boʻldi dardlarim,

Bir yor xaridor boʻldi.

 

3

 

Xushmanzara joylari,

Soylari koʻp bu yurtning.

Qoʻl yetmas humoylari,

Boylari koʻp bu yurtning.

 

Chinoz bir emas, ikki,

Tarixi sal noayon.

Ertami-indin, balki,

Sirlar etilgay bayon.

 

Juda qadim, aslida,

Kunchiqardagi qoʻsh kent:

Yangilanish faslida –

Olmazor, eski Toshkent.

Biri-biridan ulugʻ

Yana ikkita robot:

Qavmu qarindosh urugʻ −

Yoʻltushkan, Eshonobod.

 

Bular − xoʻja ovullar,

Diyonati dastida.

Qoqib kelgay dovullar −

Ular haq din qasdida.

 

4

 

Xushmanzara joylari,

Soylari koʻp bu yurtning.

Qoʻl yetmas humoylari,

Boylari koʻp bu yurtning.

 

Chinoz soʻzin lugʻaviy

Maʼnosini el bilar.

Chatiq, axir, arabiy,

Turkiy, forsiy belgilar.

 

Sohibqironga bogʻliq

Bir yashiq tarqab ketmish.

Goʻyo, xon vaqtichogʻliq

Qilmoq ixtiyor etmish.

 

U yogʻi yozgulikmas,

Bir maishat “tahlil”i.

Xunrezlik, yovuzlikmas,

Fahshu vahshat tafsili.

 

Bu hangoma bir qadar

El koʻnglini dogʻlamish.

Kent nomin qay oqpadar,

Shul “bazm”ga bogʻlamish.

 

Toʻqigan biror daydi,

Haq gapmi u yolgʻonmi?

Aytgali til bormaydi,

Qiz sababmi, hoqonmi?

 

Orin saqlagan gʻaru,

Sotgan pokdomon goʻyo.

Bilmaganlar vaysaru,

Bilganlar soqovmu yo?

 

Aytsada qay bechora,

Gʻoya qiziq bagʻoyat.

Yurt nomiga ishora,

Ersa-da ul rivoyat.

Kim haqdir, kim nohaqdir,

Bu keyingi masala.

Tarix – qismatmi, taqdir,

Oʻzi aylar “halala”.

 

Biz uchun suxandonning

Samimiyligi muhim.

Bul ulus, bul makonning

Qadimiyligi muhim.

 

5

 

Xushmanzara joylari,

Soylari koʻp bu yurtning.

Qoʻl yetmas humoylari,

Boylari koʻp bu yurtning.

 

Goh savdo odamlarin

Feʼli tor, hamyoni keng.

Taʼrif etolmam barin,

Xullas, keling, baliq yeng.

 

Sizni siylar chinozlik,

Solib qat-qat koʻrpacha.

Ammo, mehmonnavozlik

Davom etar “toʻrt”gacha.

 

“Toʻrt” boʻlar-boʻlmas, esiz,

Tugaydi “sherikchilik”.

Aybga buyurmaysiz,

Bu yogʻi tirikchilik.

 

Ertalabki savdoda

Baraka bor, bilamiz.

Nochor bir iddaoda

Xayr-maʼzur qilamiz…

 

6

 

Xushmanzara joylari,

Soylari koʻp bu yurtning.

Qoʻl yetmas humoylari,

Boylari koʻp bu yurtning.

 

“Buyuk ipak yoʻli”da

Qoʻr tikkan bu qoʻrgʻonga –

Gul tutgancha qoʻlida

Shoshar mardum mehmonga.

Bois, ular qish gʻamin

Yozda yegan aslardir.

Yashnasa ona zamin,

Sozda, degan kaslardir.

 

Qaratgulik etmasin

Baxil odam qoʻliga.

Gʻashga tegib ketmasin,

Bu gaplar oʻz yoʻliga.

 

Omon boʻlsin qariyu

Navqiron oʻgʻlonlari.

Elning ulugʻlariyu

Vallomat insonlari.

 

7

 

Xushmanzara joylari,

Soylari koʻp bu yurtning.

Qoʻl yetmas humoylari,

Boylari koʻp bu yurtning.

 

Dovrugʻi misli Rimcha

Shu qadim yurt haqida –

Men ham eplaganimcha

Oʻzim etgum baxshida.

 

Qolib ketsa-da, magar,

Qator soha, koʻp tarmoq…

…Maqsad maʼlum, hamyurtlar

Koʻnglini sal koʻtarmoq.

 

Minginchi marta takror

Etganday “Haftiyak”ni;

Sanay olmay bayakbor,

Kaftga tirab iyakni…

 

…Qalam sermadim biroz,

Dilda ming istihola.

Maʼzur tutgaysiz, ustoz,

Agʻi Sizga havola.

 

 

Yahyo TOGʻA

 

“Sharq yulduzi”, 2017/9

MULOHAZA BILDIRISH

Mulohaza kiritilmadi!
Ismi sharifingizni kiriting.