Boqib bagʻrim toʻlur ziyoga

0
203
marta koʻrilgan.

OʻZBEKISTON

Ne-ne taʼrif-tashbeh bitdilar,

Mangu ilhom, mangu imkonsan.

Ikki daryo oraligʻida

Joʻshib yotgan ulkan ummonsan.

 

Bagʻringni dur-marvarid kabi

Ezguliklar etmishdir maskan.

Yomonligu yovlar yoʻliga

Ikki daryo koʻndalang har dam.

 

Boqib bagʻrim toʻlur ziyoga,

Sen – koʻzimning oq-qoraligi.

Alishmasman ikki dunyoga

Ikki daryo oraligʻini!

 

 

YIL ISTAGI

Bu yurt ertasidan xabar –

Koʻkda zarrin hilol boʻlgay.

Yana yashnar dala-dashtlar,

Havo sof, suv zilol boʻlgay.

 

Nazar qilgan zamin, yer bu,

Mudom tinchlik gʻamin yer u,

Kam emas, kamtarin el bu,

Ki kamtarga kamol boʻlgay.

 

Toʻkib ter, tinmagay joni,

Osmonga ustun xirmoni,

Ochiq  qoʻli,  dasturxoni,

Butun noni halol boʻlgay.

 

Yuksalur, kuch olib kunda,

Oydayin balqar ochunda,

Bobolar barhayot bunda,

Bolalar barkamol boʻlgay!

 

 

SUKUT SARHADI

Jim turdimmi,

Qildimmi sukut?..

Shovqinlarga aralashmadim,

Amal-taqal kun koʻrdim gohi,

Soʻz sotib, amal talashmadim.

 

Jimman. Kimman, men bir mehnatkash,

Yeng shimarib bilagimgacha,

Jim ishlayman, bu sukutimning

Chegarasi yuragimgacha.

 

 

QADOQ QOʻL QISSASI

Qul soʻziga uyqashroq nomi,

Qismati ham oʻxshar naqadar.

Faqat mehnat, mehnat kasb-kori,

Qora ishda suyagi qotar.

 

Erta-kech yer tirnab, bukilib,

Kafti qadoq, holi bir xarob.

…Xirmon toʻlib, hosil uyulib,

Oxir bir kun boʻlar sarhisob.

 

Biyron soʻylar Til, kerilar Qosh,

(Yigʻinlarda sal tin oladi.)

Toʻn – yelkaga, doʻppi kiyar Bosh,

U-chi, qarsak chalib qoladi.

 

 

ERTAGIM

Mehring qaynar xumchadir,

Qahring – ur toʻqmoq, yomon.

Koʻnglingni yoz menga bir,

Koʻngling – ochil dasturxon.

 

Hajring – borsa-kelmas yoʻl,

Taroq – oʻrmon, koʻzgung – qoʻl.

 

…Ishq yoqqan olov dilim,

Sen boʻl-da, Oloviddin,

Sevgim – sehrli chiroq;

“Tunday tarqasin firoq!”

 

…Ertak-ku bu, albatta,

Yetgum murod-maqsadga!

 

 

SURUR

Borliq bermish borini:

Suv-havo, gul, qorini…

Foydalan va barini,

Eʼzoz et, zarar qilma.

 

Yosumanmas, gul-ku – bu,

Sen deb kuylar bulbuli,

Labga sur bol kulguni,

Xandani zahar qilma.

 

Haqqa yuzlan, ol tanib,

Gʻanimisan yo gʻarib,

Bandasiga sargʻayib,

Ol yuzing zafar qilma.

 

Oʻtkinchi bu dunyosi,

Gʻuvv, esgan yel – qiyosi,

Qoʻy molu mulk gʻavgʻosin,

Joningga xatar qilma.

 

Zoʻr imkondir bu hayot,

Qur, yarat, yoz, qil ijod.

El dardida yon, Dilshod,

Umring besamar qilma.

 

 

SHEʼR MASHQI

Kunu tunga bir qarang

Buncha tez almashadi,

Oq-qora ikki rang

Umrimni talashadi.

 

Kunduzi oq niyatlar

Ortidan qolmagayman.

Tunlari  oq qogʻozni

Qoralab tolmagayman.

 

Oq-qora orasida

Yorugʻ boʻlgay yuzing, dil

Ming bir rang oynasida

Jilvalansa soʻzing, dil.

 

 

Dilshod RAJAB

 

“Yoshlik”, 2010 yil, 12-son

MULOHAZA BILDIRISH

Mulohaza kiritilmadi!
Ismi sharifingizni kiriting.