Бобомнинг сурати

0
19
марта кўрилган.

Момомни бир умр ўртади ёмон,

Бобомнинг фронтдан жўнатган хати.

Термулсам, тилкалар бағримни ҳамон,

Бобомнинг урушда тушган сурати.

 

Орзулари кетди ўзлари билан,

Тўйма-тўй юрмади дўстлари билан.

Фарёд қилиб турар кўзлари билан,

Бобомнинг урушда тушган сурати.

 

Кўзига термулиб туролмам узоқ,

Уларда ўтинч бор, ўкинч бор, юз оҳ.

Сўрагандек бўлар ҳолига изоҳ,

Бобомнинг урушда тушган сурати.

 

Расмдаги йигит мендан ёшроқдир,

Кўргани аламдир, ғамдир, фироқдир,

Юрагимга кўчган кетмас титроқдир,

Бобомнинг урушда тушган сурати.

 

Қувонади бугун бизга қараб у,

Урушни қоралар, тинчлик тараф у,

Хотираси абад, мангу шараф у,

Бобомнинг урушда тушган сурати.

 

Жўрабек ЖАҲОН

МУЛОҲАЗА БИЛДИРИШ

Мулоҳаза киритилмади!
Исми шарифингизни киритинг.