“Bir hikmatni ilgʻadim…”

2
302
marta koʻrilgan.

* * *

 

Ona, toʻplab chiqsa – bardoshlaringiz,

Shuncha yillar toʻkkan koʻzyoshlaringiz,

Yeru osmon selu yomgʻir, doʻl boʻlardi.

Bir vohani koʻmardi suv,

Bir vohani gʻarq etguvchi koʻl boʻlardi.

 

Ajinlaringizni oʻylasam agar,

Bir-biriga ulab, boylasam agar –

Surxondan to Toshkentgacha,

Toshkentdan to Surxonga qadar

Sogʻinch toʻla, armon toʻla yoʻl boʻlardi.

 

 

 

BIR HIKMAT ILGʻADIM

 

Buncha ham qattiq ekan

Qismatning bolishlari.

Koʻz oldimdan ketmas hech

Onamning kalishlari.

 

Ular ostonasida

Turar bir juft abgorday.

Koʻzimga butun dunyo

Koʻrinadi aybdorday.

 

Yashaydirman garchi qoʻl,

Yuzlarini sogʻinib.

Kalishlari dahlizda

Turaverar ogʻrinib.

 

Dardimni yashirgayman

Onam holim soʻrganda.

Kalishlari va lekin

Barin bilib turganday.

 

Garchi tilsiz, zabonsiz,

Xomush, beozordaylar.

Bor dardu hijronimdan

Ular xabardordaylar.

 

Onamning koʻz yoshidan

Boʻlsa bolishlari nam.

Nazarimda kechalar

Yigʻlar kalishlari ham.

 

Ular ham goʻyo meni

Oʻrtanib oʻylagaylar.

Baxtu baxtsizligimdan

Qissalar soʻylagaylar.

 

Sogʻinchning devorlari

Yomgʻirlarda yemrilgan.

Ular ham onam kabi

Yoʻllarimga termulgan.

 

Mol yigʻmadim men, ammo

Suv soʻrganga soy berdim.

Bir koʻnglim bor edi, lek

Men uni ham boy berdim.

 

Bu dunyoda nihoyat

Bir hikmatni ilgʻadim.

Kalishlarni yuzimga

Bosib, kelar yigʻlagim.

 

Onamning kalishlari…

Bir umrlik qarzimday.

Pataklarin koʻzimga

Surtib oʻlsam arzigay.

 

Sirojiddin SAYYID

2 Mulohaza

MULOHAZA BILDIRISH

Mulohaza kiritilmadi!
Ismi sharifingizni kiriting.