Anglaganim, sohir bu tuyg‘u

0
13
marta ko‘rilgan.

* * *

 

Yuragimga sohir bu tuyg‘u

Qachon kirdi, kuyday yoqimli?

Qayda edi, keltirgan kim u,

Zarrin qishday, ko‘klamday sirli?

 

Tabassumga lab ochgan kurtak,

Olcha guli yaprog‘idami?

Toshni yorgan matonat, istak

Gul chechagim titrog‘idami?

 

Qaldirg‘ochning inidami yo

Unda intiq jajji parvozlar?

Taraddudlar ko‘rgunimcha to

Kirgan kabi umrimga yozlar.

 

Bu sevgimi? Beso‘z, beimo

Aytmay turib seva bilganim?

Onammi yo toleim Humo,

Diydor istab duo qilganim?

 

Qay darchaga solmayin nigoh,

Bari tanish, qalbga yaqinim.

Kafti qadoq, diydasi yumshoq,

Biri opam, birisi inim.

 

Anglaganim, sohir bu tuyg‘u

Millat otlig‘, bir tan bo‘ladi.

Ko‘zim tushgan har yeri suyuk,

Yurak ichra Vatan bo‘ladi!

 

 

* * *

 

Buncha go‘zal, buncha dilrabo

Bahor seni suyganligi rost.

Atrofingda ming turli sabo,

Uning ishqi shamollarga xos.

 

So‘z topolmay dashtlar bir og‘iz

Yer husningdan turadi karaxt.

Oy dalada qo‘rqmayin yolg‘iz

Ayt, qandayin gullading daraxt?

 

 

* * *

 

Zulfiyaxonimga

 

Buncha dilbar edi.

Bunchalar shinam,

Dil uyining oydin

Oppoq tunlari.

Ichkaridan uzolmayin nigohin,

Derazadan ketmas

O‘rik gullari.

 

Chog‘roq xona,

To‘rda so‘zana azim

Duvollarda hasham

Bo‘lmagan sira.

Quloqqa aylanar

Bunda har buyum

She’r o‘qiyapti,

Axir, shoira.

 

Chog‘roq xona.

Kecha baxtga limmo-lim

Bahor bahorligin

Anglaydi shu on.

To‘lib borsa dunyo

She’r iforiga

Dunyoga aylanar

Hamid Olimjon…

 

 

* * *

 

Shiftda turgan ko‘r chiroqlarga,

Bir kechada kunduz chuv tushar.

Panalardan chiqishsa endi,

Qorovullar o‘g‘riga o‘xshar.

 

Chor atrofdan ko‘z olaytirgan

Boyo‘g‘liga bo‘lgan bir nima.

Bir chekkada tunning tushini

Chigirtkalar qilar tarjima.

 

 

* * *

 

Uyulib yotadi stolda qog‘oz,

Boshing ko‘tarolmaysan ishdan.

Xonang issiq.

Sovqotdim biroz,

Jonim, xabaring bormi qishdan?

 

Qiyalatib eshiging nasim

Ostonangdan bo‘ylasa so‘ng bor.

Anglamading,

Sog‘inish kasbim

Qara, axir, ketyapti bahor!

 

Uvushdimi nedandir tanang?

Qarog‘imda qolsa tilaklar.

Ko‘rmaganga yo‘ygach ishxonang.

Olib ketdi, meni laylaklar…

 

Xazonbog‘dan kelsa gar ovoz

Izla, endi tuyg‘ularimni.

Yillar bo‘yi titkilab qog‘oz

Topolmaysan,

Kulgularimni…

 

 

* * *

 

Yana…

Ko‘z yummagan tonglar otganda

Meni olib ketgan yo‘llar eltadi.

Sen kutmagan kunda

Ey yolg‘iz odam

Bizga ilxaq kunlar izga qaytadi.

 

O‘shanda bariga ishonasanmi,

Muhabbat bor deysanmi

Qaroqlarimga?

Bir yaproq tushmasdan ishq bog‘laridan

To‘kilmaysanmi, ayt, titroqlarimga?

 

Jimgina tikilsam, shomdek beadog‘,

Yodingga tushmasmi kechagi og‘riq?

Va, yana… Ohista chiqsamu ketsam –

Ortimdan qolmasmu chuqur xo‘rsiniq?..

 

 

* * *

 

Bu ko‘chaning adog‘i bormi,

Yuragingga eltar bekat-chi?

Talato‘plar aro besado

O‘tayapman, xabaring bormi?

 

O‘ngim sohil, so‘lim olomon

Chayqalaman yakka kemaday.

Bu to‘lqinlar biram berahm,

Yetkazmaydi faqat sen tomon.

 

Kimdir kular, jilmayar, hazil,

Kulmaydi hech taqdir degani.

Ko‘zim giryon, ko‘zim girgitton

Ko‘rinmaydi sen ketgan manzil…

 

Bu ko‘chaning adog‘i bormi?

 

Nargiza ASADOVA

1984 yilda tug‘ilgan. Toshkent davlat madaniyat institutini (hozirgi TDSMI) bitirgan. Uning “Ishq ostonasi”, “Yuragim­ning sarhadlari”, “Nastarin” nomli she’­riy to‘plamlari nashr etilgan.

 

“Sharq yulduzi”, 2017/9

MULOHAZA BILDIRISH

Mulohaza kiritilmadi!
Ismi sharifingizni kiriting.