Tarnov

0
223
marta koʻrilgan.

Erta bahor. Dam olish kuni edi. Hovliga tushdim. Havoning avzoyi buzuq. Yuvinib chiqib qarasam, tunuka tom peshidagi tarnov bir tomonga qiyshayib yotibdi. Qishda yoqqan qor zalvoridan qiyshayib qolgan, shekilli… Qattiqroq shamol boshlansa, tushib ketadigan…

Yoʻlakda yotgan narvonni koʻtarib kelib tomga tiraguncha tinkam quridi, nam tortib, zildek boʻp ketibdi.

Narvon zinasiga oyoq qoʻyishim bilan ayvondan onam tushib keldi.

– Nima qilmoqchisan? – dedi koʻzimga termilib.

– Hozir, – dedim beparvo qoʻl siltab. – Tarnov qiyshayib qopti.

– Shoshma, bolam, oldin choyingni ichib ol…

– Hozir tushaman.

Shunday dedimu narvonga tirmashdim. Tomga chiqishim bilan pastdan onamning xavotirli xitobi eshitildi:

– Ehtiyot boʻl, tom labiga borma!

– Uyga kirsangiz-chi! – dedim ogʻrinib.

Tunuka tomni taraq-turuq bosib, qiyshaygan tarnov oldiga keldim. Uvvalo urinaman, tarnov laʼnati oʻnglansa, qani! Zanglab ketganmi, boʻyogʻi yopishib qolganmi…

Aksiga olib, yomgʻir shivalay boshladi. Oldin tomchilab turdi-da, keyin shiddat bilan yogʻib ketdi. Tom labida oʻtirgancha, tarnovni qoʻshqoʻllab surishga urindim. Qilt etmaydi!

Pastdan yana onamning ovozi keldi:

– Menga qara, bolam.

Narvon oldiga qaytib keldim.

– Nima deysiz?

– Jon bolam, mana buni kiyib olgin…

Qarasam, onam bir qoʻli bilan narvonni changallagancha, ikkinchi qoʻlida toʻn ushlab turibdi. Yupqa roʻmoli, nimchasi hoʻl boʻlib ketgan…

Xunobim oshdi.

– Hozir tushaman, dedim-ku! Men yosh bolamanmi?

– Shamollab qolasan!

– Obbo! Siz uyga kiravering! Hozir tushaman.

Shunday deb, tagʻin tarnov oldiga qaytdim. Jahl bilan tarnovni mushtlay boshladim.

Bir mahal pastdan yana ovoz keldi:

– Ada! Adajon!

– Ha! – dedim battar xunob boʻlib.

– Varragim yirtildi!

Qarasam, yetti yashar oʻgʻlim hovli oʻrtasida turibdi. Oyogʻi ostida yirtilib, qamishlari qovurgʻadek turtib chiqqan varrak loyga qorishib yotibdi. Oʻzi koʻylakchan. Boshyalang. Yomgʻir ostida diydirab turibdi.

– Uyga kir, Farrux! – dedim baqirib. – Uyga kir, shamollab qolasan!

Quloq solsa, qani! Goh varragiga, goh menga qaraydi. Kapalagim uchib ketdi! Tomda sirgʻalib-sirgʻalib, narvon tomon yugurdim.

Uch-toʻrt pillapoya tushib qarasam, onam hamon narvon oyogʻini changallab turibdi. Roʻmoli jiqqa hoʻl boʻlib, sochlariga yopishib qolgan… Bir qoʻli narvon oyogʻida. Bir qoʻlida toʻn…

 

Oʻtkir Hoshimov

MULOHAZA BILDIRISH

Mulohaza kiritilmadi!
Ismi sharifingizni kiriting.