“Takabburlik pastkashlarning illatlaridandir”

0
111
marta koʻrilgan.

Quyida keltiriladigan fikrlar, hikmatlar ijtimoiy tarmoqlardagi turli sahifalardan olib tarjima qilingan. Bundan tashqari sahobai kiromlar, ulugʻ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan.

 

*****

— Robbing kim?

— Alloh.

— Paygʻambaring kim?

— Muhammad sollallohu alayhi vasallam.

— Dining nima?

— Islom dini.

Ey Alloh! Bizni savol-javob paytida sobit qilgin! 

*****

Oʻng tomonga qarab yotish toʻla orom olishga, yurak faoliyati yaxshilanishiga, tushda buzilish boʻlmasligiga, bomdodga oson turishga sabab boʻlar ekan. Eng asosiysi — Sunnatga amal qilingani uchun savob olinadi. Nabaviy koʻrsatmalar baxt-saodat omilidir. 

***** 

Sabr – hayotning “qulogʻi”ga: “Modomiki, Alloh men bilan birga ekan, hargiz yengilmayman” deb shivirlashingdir.

 Xovatir roqiya jurnali

*****

Ehtimol, zolim zulm bilan koʻp narsaga ega boʻlar. Lekin mazlumning duosi bilan hamma narsasidan ajraladi.

 

Xovatir roqiya jurnali

*****

Agar yolgʻiz turganimda nasihat qilsangiz, chindan nasihat qilgan boʻlasiz. Agar koʻpchilikning ichida nasihat qilsangiz, sharmanda qilgan boʻlasiz.

*****

Odam bolasiga ajablanaman:

Molning barchasini toʻplaydi. Keyin barchasini dunyoda qoldirib ketadi. Keyin oxiratda barchasi uchun hisobga tortiladi.

 *****

 Imom Shofeiy rahimahulloh shunday dedilar: «Tavozeʼ oliyjanob insonlarning xulqlaridandir. Takabburlik pastkashlarning illatlaridandir. Tavozeʼ muhabbatning paydo boʻlishiga sabab boʻladi.

Qanoat rohatning paydo boʻlishiga sabab boʻladi».

 *****

Abdurahmon ibn Avf roziyallohu anhu qullari bilan birga ovqatlanardi. Tanimagan odam u kishini qullari orasidan ajrata olmasdi.

 *****

Oqila ayol eriga aytadigan har bir gapiga shakar qoʻshib gapiradi.

Oqila ayol eriga aytadigan har bir gapidan tuzni olib tashlab gapiradi.

 Xovatir roqiya jurnali

***** 

Agar bir insonning xulqini bilmoqchi boʻlsang, rahbarlari bilan qanday muomala qilishiga emas, balki, oʻzidan quyiroqdagilar bilan qanday muomala qilishiga qara!

***** 

Kim yaxshi koʻrganidan xabar olmoqchi boʻlsa, uning uchun masofalarning hech qanday ahamiyati yoʻq.

“Xovatir roqiya jurnali”

*****

 Uch narsa hayotga boʻlgan qarashingizning oʻzgarishiga sabab boʻladi: 

  1. Bemorlik.
  2. Musofirlik.
  3. Aziz kishini yoʻqotish.

 *****

 Usmon ibn Affon roziyallohu anhu dedilar: “Agar qalblarimiz pok boʻlganda, Robbimizning Kalomiga toʻymagan boʻlardik”.

 *****

 Odamlar haqida hukm qilishga shoshilma! Agar shoshilib hukm qilsang, aziz kishiga zulm qilib, arzon kimsaning qadrini koʻtarib qoʻyasan.

 *****

 Insonlarning barchasini rozi qilish yetib boʻlmas orzudir. Shunday ekan, bor gʻaming Robbingni rozi qilish boʻlsin!

 *****

 Bilasizmi…

Janubiy Afrikaning Keyptaun shahrida tabarruotlar (xayr-sadaqalar) bilan toʻla koʻcha bor. Har qanday muhtoj kishi qiynalmasdan olishi uchun odamlar kiyimlarini va poyabzallarini yoʻl chetiga osib qoʻyishadi.

“Xovatir roqiya jurnali”

 *****

 — Dada, anavilar axlatchilarmi?

— Yoʻq, bolam. Axlatchilar bizmiz. Ular esa koʻchalarni biz tashlagan axlatlardan tozalovchilardir.

*****

 «Ie, manavining burni puchuq ekan», «Boʻyni qara, naynov ekanmi», «Mana bu odam pakana ekan»…

Kimning ustidan kulyapsiz?! Maxluqning ustidanmi yoki Xoliqning ustidanmi?!

*****

Bilasizmi…

Agar siz burgutning koʻzidek koʻzga ega boʻlganingizda, oʻn qavatli binoning balandligidagi tomdan turib yerdagi chumolini koʻrishga qodir boʻlar edingiz.

“Xovatir roqiya jurnali”

 ***** 

Tananing kasalligi ogʻriqlar bilandir. Qalblarning kasalligi gunohlar bilandir. Tana kasal boʻlgan paytda taomning mazasini sezmaganidek, gunohlardan qoraygan qalb ibodat halovatini sezmaydi.

 *****

 «Kahf» surasidan olingan ibrat

 

  • Agar kemani teshib qoʻyilmaganda, tortib olingan boʻlardi.
  • Agar bola oʻldirilmaganda, ota-onasining badbaxt boʻlishiga sabab boʻlardi.
  • Agar devor taʼmirlab, tiklab qoʻyilmaganda, ikki yetimning haqqi zoye boʻlardi.

Bas, yaxshilik, xayriyat Alloh taolo ixtiyor qilgan narsadadir!

 *****

 — Barcha tomonlari berk toʻrt devor orasida boʻlganimda, rizqim qayerdan kiradi?

— Oʻlim farishtasi kiradigan joydan!

 

 

Internet materiallaridan toʻplab, tarjima qiluvchi

Nozimjon Iminjonov

 

muslim.uz

MULOHAZA BILDIRISH

Mulohaza kiritilmadi!
Ismi sharifingizni kiriting.