“Insoniyat bemor tanasiga turli narsalarni ekishni, ko‘chirib o‘tkazishni o‘rgandi. Lekin vijdonni emas!”

0
8
marta ko‘rilgan.

Quyida keltiriladigan fikrlar ijtimoiy tarmoqlardagi “Tarix muxrlagan so‘zlar” sahifasidan olib tarjima qilingan. Bundan tashqari sahobai kiromlar, ulug‘ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan.

 

*****

Payg‘ambarimiz sollallohu alayhi vasallam mutlaqo boshqacha inson bo‘lganlar! Haqiqiy, sadoqatli banda bo‘lganlar! Islom tarixini o‘qiymiz-ku, tafakkur qilib ko‘raylik! Ko‘z oldimizga keltirishga urinaylik! Sahobai kiromlar uyalganlaridan ul muborak zotning yuzlariga, ko‘zlariga tik qaray olishmagan! O‘shanday mard, pok, go‘zal xulqli, iffatli, rostgo‘y, omonatdor, adolatli va muborak bir insonni bizga Payg‘ambar qilib yuborgan Alloh taologa cheksiz hamdu sanolar bo‘lsin! 

Insoniyat bemor tanasiga turli narsalarni ekishni, ko‘chirib o‘tkazishni o‘rgandi. Lekin vijdonni emas!

*****

Qo‘rquvim o‘lim emas, balki, qanday o‘lish! Ey Robbim! Xotimamizni go‘zal qilgin!

*****

«Baliq yegani falon oshxonaga boramiz. Piston oshxonada baliqni yaxshi pishirolmaydi», «Birinchisiga qanaqa ovqatlaringiz bor?», «Qovurilgan tovuq emas, grill tabaka yegim kelyapti» kabi gaplar bilan taomlarni tanlab-tanlab tanovul qilayotgan paytimizda, qorni ochganda, yegani narsa topolmay qiynaladiganlar borligini unutib qo‘ymaylik! Alloh taoloning ne’matlariga ko‘proq shukr qilaylik!

*****

Kim Allohni yaxshi ko‘rish-ko‘rmasligini bilmoqchi bo‘lsa, o‘zini Qur’onga ro‘baro‘ qilsin. Kim Qur’onni yaxshi ko‘rsa, demak, u Allohni yaxshi ko‘radi. Chunki, Qur’on Allohning Kalomidir.

Ibn Mas’ud roziyallohu anhu

*****

Agar Alloh taolo dunyoni senga bermay, qiyinchiliklarni senga ko‘paytirayotganini ko‘rsang, bilki, albatta, sen Uning nazdida aziz ekansan.

*****

Sabr qil, kechadan keyin kunduz bor.

Sabr qil, yomg‘irdan keyin musaffolik bor.

Sabr qil, bemorlikdan keyin shifo bor.

Sabr qil, mahzunlikdan keyin xursandchiliklar bor.

Sabr qil, duodan keyin ijobat bor.

Alloh taolo barchamizni sabr ila rizqlantirib, duolarimizni ijobat etsin!

***** 

Umar ibn Xattob roziyallohu anhuga: “Ka’baga yopinchiq yoptirmaysizmi?” deyildi. Shunda u kishi: “Musulmonlarning qornilari muhimroq” dedilar.

*****

Ko‘prikdan o‘tayotgan kishi ko‘prikka mahliyo bo‘lib chalg‘imasligi, qirg‘oqqa tinch o‘tib olishga urinishi kerak. Shuningdek, dunyo kishini Oxiratdan chalg‘itmasligi, dunyoga mahliyo bo‘lmasdan, qabr va Oxiratga tinch o‘tib olishga urinishi kerak.

*****

— Ey Hasson, bizga she’r aytib ber.

— Qur’on nozil bo‘lishni boshlaganda, tilim tutilgan!

*****

Tobeinlarning birlaridan «Abu Bakr Siddiq roziyallohu anhuni ko‘rdingizmi?» deb so‘raldi. Shunda u kishi «Ha, miskin libosidagi farishtani ko‘rdim» deya javob berdilar.

*****

Ey Alloh! Bizni shirin hayot, yaxshi ato, keng rizq, fikr sofligi, ofiyat libosi va go‘zal xotima bilan rizqlantir!

*****

Sadaqa berayotganingda, bu kishi pulimga muhtoj, demagin! Balki, Robbimning mag‘firatiga va sadaqaning savobiga men muhtojman, degin.

*****

Ey Robbim! Sen shunchalik Mehribon Zotsanki, eshikni berkitib, uyi ichida gunoh qilayotgan bandang nafas olishi uchun eshik tirqishidan havoni kiritib turasan.

*****

Ba’zilar bilan gaplashib, farosat katta ne’matligini yanada ko‘proq sezib boramiz.

*****

Yusuf alayhissalomning akalari o‘n bir kishi edi. Shunday bo‘lsa-da, ular ukalariga qarshi nayrang qildilar.

Muso alayhissalomning akalari Horun alayhissalom bo‘lib, ukalariga vazir bo‘ldilar va yonlarida turdilar.

Demak, songa emas, baraka va salohga e’tibor beriladi.

«Yoqimli gap»

*****

Istig‘forni ko‘paytirganing sari hayoting yaxshiliklar bilan nurafshon bo‘lib, musibatlar uzoqlashib boraveradi.

ASTAG‘FIRULLOH

ASTAG‘FIRULLOH

ASTAG‘FIRULLOH

*****

Ey Alloh! Albatta, Sen Afuvv (Kechiruvchi)san, Kariymsan. Kechirishni yaxshi ko‘rasan. Meni afv qilgin, kechirgin!

*****

Hech kim dunyoni obod qilishdan qaytarilmaydi. Aksincha, dunyoni haloldan topishga, birorta kimsaga muhtoj bo‘lmaslikka va insonlarga infoq qilishga, topadigan halol molidan qabr va Oxiratning obod bo‘lishiga sabab bo‘ladigan o‘rinlarga sarf qilishga buyuriladi. «Alloh taolo oilamning nafaqasini zimmamga yuklagan» degan niyat bilan halol molu dunyo topishga intilish Dinimizda ibodat hisoblanadi.

*****

Bemor Alloh taoloning rahmati bilan shifo topadi.

Musofir Alloh taoloning izni bilan qaytib keladi.

Mahzun Alloh taoloning yordami bilan xursand bo‘ladi.

Musibatga uchragan Alloh taoloning fazli bilan yengillikka erishadi.

Qarzdor Alloh taoloning madadi bilan qarzdan qutuladi.

Barchamiz rahmatni, yordamni, madadni, fazlni Alloh taolodan so‘raylik! Faqat Unga tavakkul qilaylik! 

 

 

Internet materiallaridan to‘plab, tarjima qiluvchi

Nozimjon Iminjonov

 

muslim.uz

MULOHAZA BILDIRISH

Mulohaza kiritilmadi!
Ismi sharifingizni kiriting.