Haqqoniyat

0
76
marta koʻrilgan.

Haqqoniyat deb ishda toʻgʻrilik, soʻzda rostlikni aytilur. Inson boʻstoni salomatga, gulzori saodatga haqqoniyat yoʻli ila chiqar. Insoniyatning ildizi oʻlan rahmdillik, haqshunoslik, odillik kabi eng yaxshi sifatlarning onasi haqqoniyatdur. Janobi Haqning shu nomi muborakini muqaddas bilgan kishi hech vaqt haqqoniyatdan ayrilmas, chunki haqqoniyat nuri qaysi dilda jilvagar oʻlsa, janobi Haqning tavfiqi rabboniysi shu dilda nashʼu namo qilur. Aql egalari, vijdon sohiblari har vaqt koʻrgan, qilgan va bilganlarini, haqiqatni va toʻgʻrisini soʻzlar. Ishda toʻgʻrilik birovning nafsiga, moliga xiyonat qilmov, soʻzda toʻgʻrilik har vaqt rost soʻzlamaklikdur.

 

Rostligʻ haqning rizosini topar,

Toʻgʻri yoʻlda yoʻq boʻlurmu hech chopar?

 

Bizim shariati islomiyada agar bir kishining haqiga boʻhton qilinub, qilmagan ishni qildi deb soʻz soʻylansa, bilgan kishi rostini soʻzlab, shul kishini oqlamak vojibdur. Rasuli akram nabiyyi muhataram sallollohu alayhi vasallam afandimiz: “Annajotu fissiddiqi – najot rostlikdadur”, – demishlar. Hazrati mavlono Rumiy: “Islomiyat ayni haqqoniyatdur. Haqni qabul qiluvchilar huquqi sharʼiyani saqlamoqgʻa buyurulmishdurlar. Chunki shariat hukmlarining eng asosiy ildizi haqqoniyatdan iboratdur”, – demishlar.

 

Haqshunoslik oʻlmoq sharofatdur jahonda odama,

Haqni izhor aylamak birla koʻruk ver olama.

Yarashur insona sidqu toʻgʻrilik gar koʻrsa girih,

Toʻgʻrining yordamchisidur haq taolo gʻam yema.

Toʻgʻrilarning maskani firdavs ayvonidadur,

Egrilar ikki jahonda gʻam-alam konidadur.

 

Abdulla AVLONIY

 

“Turkiy Guliston yoxud axloq” kitobidan

MULOHAZA BILDIRISH

Mulohaza kiritilmadi!
Ismi sharifingizni kiriting.