“Duo hech qachon quruq ketmaydi”

0
39
marta ko‘rilgan.

Quyida keltiriladigan fikrlar, hikmatlar ijtimoiy tarmoqlardagi turli sahifalardan olib tarjima qilingan. Bundan tashqari sahobai kiromlar, ulug‘ olimlar, Yaqin Sharq, Osiyo, Yevropa va Amerika mutafakkirlarining bir qator fikrlari ham berilgan.

 

*****

Ayolning fitrati

Ayol Qur’on o‘qiyotgan edi. Eri esa uning tilovatini tinglab o‘tirgandi. Ayol “Sizlar uchun (nikohi) halol bo‘lgan ayollarga, ikkita, uchta, to‘rttadan uylanaveringiz” oyatiga yetganda ovozini pasaytirdi. Buni ko‘rgan eri tabassum qildi. Ha, ayolning fitrati shunaqa! 

***** 

Harom haromligicha qoladi, garchi hamma uni qilayotgan bo‘lsa ham. Hech qachon halol ishdan to‘xtamagin, garchi uni bir o‘zing qilayotgan bo‘lsang ham. 

***** 

Duo hech qachon quruq ketmaydi:

yo ijobat bo‘ladi;

yo u sababli bir yomonlik qaytariladi;

yoki oxiratga zaxira ajr bo‘ladi. 

***** 

Allohning zikri bilan tili nam bo‘lgan banda, dili band bo‘lgan banda zinhor va zinhor yomonlikka qo‘l urmaydi!

Shayx Muhammad Sodiq Muhammad Yusuf rahimahulloh 

***** 

Odam bolasi talaffuz qilishi mumkin bo‘lgan eng yaxshi so‘z “La ilaha illalloh” kalimasidir. Banda shuni doim aytib yurishi kerak.

Shayx Muhammad Sodiq Muhammad Yusuf rahimahulloh 

*****

Tavbaning shartlari:

  1. Gunohdan to‘xtash.
  2. Nadomat qilish.
  3. Gunohga aslo qaytmaslik.
  4. Haqlarni egalariga qaytarish.
  5. Umrining oxirigacha boshqalarni ham gunohdan qaytarish. 

***** 

Payg‘ambarimiz sollallohu alayhi vasallamni ko‘proq yaxshi ko‘rishimiz uchun u zotni ko‘proq tanishimiz shartdir! Buning uchun siyrat kitoblarini o‘qib, hayotlarini o‘rganaylik! 

***** 

Namozdagi xushu’ning kaliti namozdan tashqarida zikrni ko‘paytirishdir! 

***** 

Umar ibn Xattob roziyallohu anhu momaqaldiroqning ovozini eshitdilar va qattiq yig‘ladilar. Hamrohlaridan biri: “Sizni nima yig‘latdi, ey Umar?” deb so‘radi. Shunda u zot: “Bu rahmatining ovozi. Azobining ovozi qanday ekan?!” deb javob berdilar. 

***** 

Insonlardan ayblaringga bardosh berishlarini talab qilganingdan ko‘ra o‘sha ayblaringni isloh qilishing yaxshidir.

Ibrohim Akkos

***** 

Bola onasidan: “Ichi to‘la puli bor sumkangizni xodimingiz yonida qoldirasizmi?” deb so‘radi.

Ona: “Aslo uni xodimimga ishonib qoldirmayman” dedi.

Shunda bola: “Unda qanday qilib meni o‘sha xodimingiz yonida qoldirasiz?” dedi.

Xovatir roqiya jurnali

***** 

Qayerda bo‘lsang ham, agar yuzingni Robbing tarafga burmasang (namoz o‘qimasang), haqiqiy xotirjamlik va chinakam saodatni hargiz topa olmaysan. Bas, shunday ekan, Allohga yaqinlash, baxtli bo‘lasan.

 ***** 

Kimning gunohlari ko‘p bo‘lsa, odamlarga suv ulashsin. Alloh taolo chanqagan bir itga suv bergan bandasining gunohlarini kechirgan. Endi mo‘min odamga suv bergan kishi haqida nima deb o‘ylaysan?!

 

Internet materiallaridan to‘plab, tarjima qiluvchi

Nozimjon Iminjonov

 

muslim.uz

MULOHAZA BILDIRISH

Mulohaza kiritilmadi!
Ismi sharifingizni kiriting.