Do‘sti ko‘p bilan siylash

0
27
marta ko‘rilgan.

Abay hikmatlaridan

 

Odamning odamgarchiligi ishni qanday boshlaganidan bilinadi, qanday bitirganidan emas.

* * *

Ko‘ngildagi ko‘rkam o‘y og‘izdan chiqqanda sirini yo‘qotadi.

* * *

Hikmatli so‘zlarni o‘zboshimcha nodonga aytganingda ko‘ngling yonadi ham, o‘chadi ham.

* * *

Yaxshilikni bilganga qayish, noshukrga qayishmoq qadrni yerga urmoqdir.

* * *

Mard ko‘p so‘rasa ham ozga rozi bo‘ladi, nomard oz so‘raydi, ortiqcha bersang ham rozi bo‘lmaydi.

* * *

Faqat o‘zing uchun mehnat qilsang, o‘z qorni g‘amida o‘tlagan hayvonlardan biri bo‘lasan, insoniyat ravnaqi uchun mehnat qilsang, Ollohning sevimli bandalaridan biri bo‘lasan.

* * *

 Odam bolasini zamon voyaga yetkazadi, kimda-kim yomon bo‘lsa, buning uchun uning zamondoshlari aybdor.

* * *

Kimning boshiga g‘am-tashvish tushmaydi? Umidni uzmoq — matonatsizlik. Dunyoda har narsaning intihosi bor, yomonlikning ham oxiri yo‘q, deb kim aytadi? Qalin qorli qahraton qishning ortidan ko‘m-ko‘k maysalari mo‘l, yomg‘iri ko‘l ko‘klam kelmaydimi, axir!

* * *

Achchiqlanib baqirganning ziyoni yo‘q. o‘azablanib indamagandan qo‘rq.

* * *

Baxt va shodlikdan ko‘pchilik boshini yo‘qotib qo‘yadi, mingdan bir kishigina xalq oldida ojiz bo‘lib ko‘rinmaslik uchun xotirjamlik bilan es-hushini saqlab qoladi.

* * *

Agar mehnatim unsin desang — ishning ko‘zini top.

* * *

Shon-shuhrat — baland cho‘qqi. Sabr-toqat bilan o‘rmalagan ilon ham unga tirmashib chiqadi. Tarqoq el cho‘qqiga chiqmaganni maqtaydi, yo‘lovchilar buni chin deb o‘ylaydi.

* * *

Dunyo — ulkan ummon. Vaqt — to‘xtamay yelayotgan shamol. Oldindagi to‘lqinlar — ajdodlar, orqadagi to‘lqinlar — avlodlar. Ularning davomiyligida abadiy hayot yashaydi.

* * *

Baxti ortiq podshodan aqli ortiq faqir yaxshi: soqolini sotgan qariyadan mehnatini sotgan bola afzal.

* * *

To‘q tilanchi — odamning shaytoni.

Ilmsiz so‘fi — mo‘ltoni.

* * *

Yomon do‘st soyaga o‘xshaydi. Peshonangga kun tug‘sa, qochib qutula olmaysan, boshingda bulut to‘plansa, izlab topa olmaysan.

* * *

Do‘sti yo‘q bilan sirlash, do‘sti ko‘p bilan siylash. Qayg‘usizdan uzoq qoch, qayg‘uliga quchoq och.

* * *

Bog‘ing unib o‘sguncha butun el senga tilakdosh bo‘ladi. Bog‘ing unib-o‘sgandan so‘ng mevasini o‘zing yeysan.


Rustam MUSURMON tarjimasi

 

uzas.uz

Oldingi sahifaGulnor opa
Keyingi sahifaAlla
Yoyish

MULOHAZA BILDIRISH

Mulohaza kiritilmadi!
Ismi sharifingizni kiriting.