Besh mingtalikni olsam…

0
31
marta ko‘rilgan.

Sartarosh boy bir ishbilarmonning sochini olarkan, uni gapga solgisi, kayfiyatini ko‘targisi kelardi. Shu payt ko‘zi ko‘chada o‘ynab yurgan tanish bir bolaga tushib qoldi.

– Anavi jingalak soch bolani ko‘ryapsizmi? – dedi u mijoziga. – Dunyodagi eng tentak bola ana shu bo‘ladi.

– Ie, nega bunday deyapsiz? – deb hayron bo‘ldi ishbilarmon.

Sartarosh:

– Hozir o‘zingiz ko‘rasiz, – dedi-da derazadan bo‘ynini cho‘zib, bolani chaqirdi, – Mulla Alivoy, bu yoqqa keling-chi, sizda bir ish bor.

Bola indamaygina sartaroshxona kirib keldi va anqov qiyofada salom berdi.

– Qarab turing, – dedi sartarosh mijozining qulog‘iga. So‘ng bir qo‘lida ming so‘mlik, ikkinchisida besh ming so‘mlik pul bilan bolaga yuzlandi: – Qay birini tanlaysiz, toy bola?

Ali bir u pulga, bir bu pulga qaradi, o‘zicha yaxshilab o‘ylab-mushohada qildi. So‘ng tez borib ming so‘mlikni oldi.

Sartarosh bolaga ruxsat bergach, mijoziga jilmaydi:

– Ko‘rdingizmi, nima degandim! – dedi zavq bilan.

Soch-soqoli qirtishlangach, ishbilarmon ko‘chaga chiqdi va nariroqda o‘zi bilan o‘zi o‘ynab yurgan bolakayni ko‘rib qoldi. Unga yaqinlashib, nega besh ming so‘mlikni emas, ming so‘mlikni tanlaganini so‘radi. Bola anqov yoki esipastga mutlaqo o‘xshamagan qiyofada javob berdi:

– Xa-xa-xa! Agar besh mingtalikni olsam, o‘yin tugaydi-da!

 

Orif Tolib

tayyorladi.

 

“Ma’rifat” gazetasida chop etilgan.

 

oriftolib.uz

MULOHAZA BILDIRISH

Mulohaza kiritilmadi!
Ismi sharifingizni kiriting.