Zahro Hasanova (1962)

0
770
marta ko‘rilgan.

1962 yili Toshkent shahrining Labzak dahasida tug‘ilganman. 1966 yil katta zilziladan so‘ng “Suzuk ota” mahallasiga – buvimlarnikiga ko‘chib o‘tganmiz. 1969 yili 1-sinfga o‘qishga bordim. Oilada besh qiz, bir o‘g‘il katta bo‘lganmiz. Maktabda faqat yaxshi baholarga o‘qiganimizni eslayman. “O‘qish kitobi”dagi o‘zimga yoqqan she’rlarni birpasda yodlab olardim. Bundan tashqari musiqa darsida qo‘shiq aytishni juda yaxshi ko‘rardim. Bayramlarda eng faol o‘quvchi edim. Qo‘shiq kuylashni, she’r aytishni yaxshi ko‘rardim. Ba’zan opa-singillarimni bezor qilib yuborardim, chunki ularning dars tayyorlashlariga xalal berardim-da. Shunday paytlarda onam bizni murosaga keltirib qo‘yar edilar.

Bolaligimda rasm chizishni bilmasdim. Ikki yosh katta Fotima opamga uyga vazifa uchun topshirilgan olmaning rasmini chizib berishini so‘rab, yalinib-yolborib o‘tirardim. Opam “o‘zing chiz” deb unamasdi. Sinfimizda yaxshi rasm chizadigan ikki-uchta bola bor edi, ularga havasim kelardi. “Nega men chizolmayman” deb xafa bo‘lardim. Ko‘p urinib, mashq qilib ko‘rganman, biroq qo‘limdan kelmagan.

Onam – Karomat Azizova 14-maktabda ona tili va adabiyoti fanidan dars berar edilar. Adabiyotga – she’riyatga oshno ayol edilar. Shuning uchun uyimizda badiiy kitoblar ko‘p edi. Boshlang‘ich sinflarda o‘qiyotganimda “O‘zbek xalq ertaklari”, “Jahon xalqlari ertaklari”ni opa-singillarim bilan galma-gal o‘qir edik. Ayniqsa, “Bo‘ri bilan tulki” nomli muqovasi sariq, kichik ertaklardan iborat kitobni qayta-qayta o‘qishni yaxshi ko‘rardim. Ota-onam o‘ndan ortiq gazeta va jurnallarga, biz esa maktab orqali bir nechta bolalar nashrlariga obuna bo‘lgan edik. Bu gazeta va jurnallar o‘z vaqtida uyimizga kelar edi va biz ularni qiziqib mutolaa qilardik. Eng qiziqarli mavzuda yozilgan maqola yoki adabiy asarlarni kechki ovqatdan keyin, hammamiz stol atrofiga jam bo‘lganimizda o‘zaro muhokama qilardik. Onam shoir H. Olimjonning “Oygul bilan Bahtiyor” she’riy ertagini yoddan aytib bersalar, jon qulog‘im bilan tinglardim. Chunki onam she’rlarni juda chiroyli, ohang bilan o‘qir edilar. Bu misralar hali ham yodimda.

5-6-sinflarda o‘qiyotganimda esa H. Olimjonning “O‘zbekiston”, G‘. G‘ulomning “Sen yetim emassan” singari katta she’rlarini hech tutilmay yod aytib beradigan bo‘ldim. Oilamizdagi kitobga bo‘lgan mehr-muhabbat meni adabiyotning sehrli olamiga yetakladi. Yodlagan she’r va qo‘shiqlarim so‘z boyligimni oshirdi. Men ham she’rlar yoza boshladim. “Onamga” deb atalgan birinchi she’riy mashqimni 5-sinfda o‘qiyotganimda yozdim.

Ilk mashqlarimni onam ko‘rib berganlar. Lekin to katta bo‘lmagunimcha gazeta va jurnallarda chop etilmagan.

1979 yili maktabni tamomlab Toshkent Davlat universitetining filologiya fakulteti kechki bo‘limiga o‘qishga qabul qilindim. Bir vaqtning o‘zida “Gulxan” jurnaliga matn teruvchi vazifasiga ishga kirdim. 1980 yillar… “Sharq” nashriyotining jurnal tahririyatlari joylashgan binoda o‘zbek adabiyotining katta darg‘alari ishlashardi. Har kuni bino yo‘laklarida ularni ko‘rish, ularga salom berib o‘tish men uchun ulkan baxt edi. Ish va o‘qishdan keyin kechqurun uyga qaytgach, bular haqida ota-onam va opa-singillarimga maqtanib aytib berardim. “Bugun ishxonada shoira Zulfiya opani ko‘rdim, ular ishtirok etgan majlisda qatnashdim. Yozuvchi Asqad Muxtor juda jiddiy odam ekan. Yozuvchi X. To‘xtaboyevning “Qasoskorning oltin boshi” asari hozir jurnalda chop etishga tayyorlanyapti “singari gaplar bilan oila davrasida, talaba dugonalarimga maqtanardim. Shunda oila a’zolarimiz hamda kursdoshlarim menga faxrlanib qarab qo‘yishardi.

Kunduzi ishlab, kechqurun o‘qiy boshladim. O‘qishni tamomlaganimdan so‘ng bir yil o‘tgach “Yosh kuch” jurnali tashkil etildi va men ham shu jurnalga ishga o‘tdim. 1988–1997 yillar davomida farzandlarim – ikki qiz, bir o‘g‘lim dunyoga kelishdi. Ularning beg‘ubor olami meni yana yangi-yangi she’r va hikoyalar yozishga undadi. Kichik qizim bog‘chaga qatnay boshlagach, men yana tahririyatga – ishimga qaytdim. Bo‘lim muharriri sifatida jurnalga kelgan xatlar izidan yurib ko‘plab dolzarb mavzudagi maqolalar yozdim. Onam, opa-singillarim xalq ta’limi tizimida faoliyat yuritganlari sabab, maktab hayoti va undagi muammolarni yaxshi bilardim. Shuni hisobga olib meni “Yangi asr avlodi”nashriyoti muassisligida tashkil etilgan “Sinfdosh” jurnaliga ishga taklif etishdi. Besh yil davomida shu jurnalda ishladim. 2006 yili 6-7 yoshli bolalar uchun “Bekinmachoq” jurnali tashkil etildi va meni shu nashrga bosh muharrir etib tayinlashdi. Ikki yil jurnalni rangli bezakli, qiziqarli qilib chop etilishiga o‘z hissamni qo‘shdim. 2008 yili esa respublika bolalarining adabiy-badiiy jurnali “G‘uncha”ga ishga taklif etishdi. Men bu taklifni bajonidil qabul qildim. Chunki bolalar uchun yozish, ularning davrasida bo‘lish, ana shu beg‘ubor olamda yurish menga hamisha cheksiz zavq, ilhom va kayfiyat bag‘ishlagan. Shuning uchun ham respublikaning qaysi viloyatiga xizmat safariga yuborishsa, hech ikkilanmay o‘sha yerga ketdim. Bolalar davrasida she’rlar o‘qidim, topishmoq va tez aytishlar aytdim. Ularning orasidan yilt etgan iste’dodni ko‘rsam, uning ijodini olib kelib jurnal sahifalarida yoritib bordim.

2014 yil yanvar oyida esa meni ilk bor ish boshlagan sevimli jurnalim “Gulxan”ga bosh muharrir vazifasiga tayinlashdi. Mana besh yildan beri shu jurnalning chiroyli, mazmunli, badiiy jihatdan mukammal chiqishi uchun tahririyat jamoasi bilan birgalikda harakat qilyapmiz.

O‘tgan yillar mobaynida bolalar uchun yozgan ijod namunalarim – “Zukko Alifbo”, “Kutilmagan sovg‘a”, “Topishmoq va tez aytishlar”, “Salom, maktab”, “Ko‘zmunchog‘im” nomi bilan kitob holida turli nashriyotlarda chop etildi. Ularning bir qanchasi maktabgacha ta’lim dasturlariga, boshlang‘ich sinf darsliklariga kiritildi. “Oromgoh marshi” qo‘shig‘im esa yozgi ta’til kunlari bolalar oromgohlarida kuylanmoqda. Qo‘limda yana to‘rtta kitobga jamlasa bo‘ladigan yangi ijod namunalarim bor. Nasib qilsa, ularni ham nashriyotlarga berib kitob shakliga keltiraman va yurtimizning kitobsevar bolalariga taqdim etaman.

MULOHAZA BILDIRISH

Mulohaza kiritilmadi!
Ismi sharifingizni kiriting.