Тошпўлат Аҳмад (1942)

0
292
марта кўрилган.

Тошпўлат Аҳмад 1942 йил 13 декабрда Бухоро вилоятининг Шофиркон туманидаги Денов қишлоғида туғилди. Самарқанд давлат университетининг филология факультетида таҳсил олди (1959–1964).

Иш фаолиятини ўрта мактаб ўқитувчилигидан бошлаган Тошпўлат Аҳмад, кейинчалик “Бухоро ҳақиқати” (ҳозирги “Бухоронома”) газетасида (1965–1975; 1993–1996), Ўзбекистон Ёзувчилар уюшмаси Бухоро вилояти бўлимида (1975–1993) хизмат қилди. 1996 йилдан яна Ўзбекистон Ёзувчилар уюшмаси Бухоро вилояти бўлимининг масъул котиби ва айни пайтда “Бухоро мавжлари” журналининг бош муҳаррири вазифасида фаолият олиб бормоқда. Бу йилларда унинг “Бухоро юлдузи” номли ҳужжатли қиссаси (1971), “Қасам ва қасос” (1973), “Ўғлингман, ҳаёт!” (1974), “Қалбнинг оппоқ гавҳари” (1975) каби очерклар тўплами, “Очиқ эшик” номли ҳикоялар тўплами (1975), “Минорлар ва чинорлар” (1980), “Ойдин хаёллар” (1984), “Табассум боғи” (1986), “Аҳли муслим меҳроби” (1991), “Имон қалъаси” (1994) сингари шеърий китоблари нашр этилди.

Тошпўлат Аҳмад таржимон сифатида Жалол Икромийнинг “Қора қузғунлар” романини, шунингдек, Расул Ҳамзатов, Владимир Солоухин, Аветик Исаакян, Ованес Шероз, Лойиқ Шерали, Аҳмад Мухтор сингари шоирларнинг асарларини ўзбек тилига таржима қилди.

Кейинги йилларда шоирнинг Бухоронинг 2500 йиллигига бағишланган “Шарқ тумори” (1996), “Фиғон” (1994), “Бухоронома” (Сайланма, 1997), “Чорбакр” (1996), “Гавҳари жоним” (2009), “202 атиргул” (2013) номли китоблари чоп этилди. “Фиғон” пьесаси саҳна юзини кўрди. “Қутлуғ остона” (2006), “Шарқ гавҳари” (Сайланма, 2007), “Қалам ва алам” (2008), “Наврўзингдан ўргилай” (2010), “Саждагоҳ” (достонлар, 2011) асарлари эълон қилинди.

Тошпўлат Аҳмаднинг асарлари рус, тожик, туркман, венгер, испан, турк, қозоқ тилларига таржима қилинган.

Ўзбекистонда хизмат кўрсатган маданият ходими Тошпўлат Аҳмад 1998 йилда “Меҳнат шуҳрати” ордени, 2007 йилда “Эл-юрт ҳурмати” ордени билан мукофотланган. У “Олтин қалам” халқаро мукофоти соҳиби.

 

“Ўзбек адиблари” (С. Мирвалиев, Р. Шокирова. Тошкент, Ғафур Ғулом номидаги адабиёт ва санъат нашриёти, 2016) китобидан.

МУЛОҲАЗА БИЛДИРИШ

Мулоҳаза киритилмади!
Исми шарифингизни киритинг.