Toshpoʻlat Ahmad (1942)

0
200
marta koʻrilgan.

Toshpoʻlat Ahmad 1942 yil 13 dekabrda Buxoro viloyatining Shofirkon tumanidagi Denov qishlogʻida tugʻildi. Samarqand davlat universitetining filologiya fakultetida tahsil oldi (1959–1964).

Ish faoliyatini oʻrta maktab oʻqituvchiligidan boshlagan Toshpoʻlat Ahmad, keyinchalik “Buxoro haqiqati” (hozirgi “Buxoronoma”) gazetasida (1965–1975; 1993–1996), Oʻzbekiston Yozuvchilar uyushmasi Buxoro viloyati boʻlimida (1975–1993) xizmat qildi. 1996 yildan yana Oʻzbekiston Yozuvchilar uyushmasi Buxoro viloyati boʻlimining masʼul kotibi va ayni paytda “Buxoro mavjlari” jurnalining bosh muharriri vazifasida faoliyat olib bormoqda. Bu yillarda uning “Buxoro yulduzi” nomli hujjatli qissasi (1971), “Qasam va qasos” (1973), “Oʻgʻlingman, hayot!” (1974), “Qalbning oppoq gavhari” (1975) kabi ocherklar toʻplami, “Ochiq eshik” nomli hikoyalar toʻplami (1975), “Minorlar va chinorlar” (1980), “Oydin xayollar” (1984), “Tabassum bogʻi” (1986), “Ahli muslim mehrobi” (1991), “Imon qalʼasi” (1994) singari sheʼriy kitoblari nashr etildi.

Toshpoʻlat Ahmad tarjimon sifatida Jalol Ikromiyning “Qora quzgʻunlar” romanini, shuningdek, Rasul Hamzatov, Vladimir Solouxin, Avetik Isaakyan, Ovanes Sheroz, Loyiq Sherali, Ahmad Muxtor singari shoirlarning asarlarini oʻzbek tiliga tarjima qildi.

Keyingi yillarda shoirning Buxoroning 2500 yilligiga bagʻishlangan “Sharq tumori” (1996), “Figʻon” (1994), “Buxoronoma” (Saylanma, 1997), “Chorbakr” (1996), “Gavhari jonim” (2009), “202 atirgul” (2013) nomli kitoblari chop etildi. “Figʻon” pyesasi sahna yuzini koʻrdi. “Qutlugʻ ostona” (2006), “Sharq gavhari” (Saylanma, 2007), “Qalam va alam” (2008), “Navroʻzingdan oʻrgilay” (2010), “Sajdagoh” (dostonlar, 2011) asarlari eʼlon qilindi.

Toshpoʻlat Ahmadning asarlari rus, tojik, turkman, venger, ispan, turk, qozoq tillariga tarjima qilingan.

Oʻzbekistonda xizmat koʻrsatgan madaniyat xodimi Toshpoʻlat Ahmad 1998 yilda “Mehnat shuhrati” ordeni, 2007 yilda “El-yurt hurmati” ordeni bilan mukofotlangan. U “Oltin qalam” xalqaro mukofoti sohibi.

 

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.