Sirojiddin Rauf (1967)

0
131
marta ko‘rilgan.

Sirojiddin Rauf 1967 yil 26 iyunda Qarshi shahrida tug‘ildi. O‘zbekiston Milliy universitetining jurnalistika fakultetida (1992), Toshkent davlat yuridik institutida (2002) tahsil oldi.

Mehnat faoliyatini 1984 yili “Qashqadaryo” viloyat gazetasida musahhihlikdan boshlagan ijodkor keyinchalik “Turkiston”, “Inson va qonun”, “Birja” gazetalarida, “Tafakkur”, “Hayot va qonun” jurnallarida bo‘lim muharriri, bosh muharrir o‘rinbosari va bosh muharrir,

“Jamiyat” ijtimoiy-siyosiy gazetasining bosh muharriri, O‘zbekiston Yozuvchilar uyushmasi mas’ul kotibi vazifalarida xizmat qildi. Hozirda “Sharq yulduzi” va “Zvezda Vostoka” jurnallari vaqtincha bosh muharriri lavozimida ishlaydi.

Sirojiddin Raufning “Yig‘layotgan oy” (1994), “Ko‘k gumbaz” (2001), “Siz menga keraksiz”, shuningdek, bolalarga bag‘ishlangan “G‘alati musobaqa” (2015) kabi kitoblari nashr etilgan.

Sirojiddin Rauf lirik shoir. Ishq-muhabbat, tabiat mavzularida qalam surarkan, Vatan mavzuidagi jiddiylik latif, o‘ynoqi ohanglar bilan almashinadi, ijodiy izlanishlari tasvir ko‘lami jihatidan davr manzaralarini esga tushiradi. Xususan, ifoda madaniyati ohorligi bilan e’tiborli. Shoirning turkum she’rlari “XX asr o‘zbek she’riyati antologiyasi”dan joy olganligi ham bejiz emas.

Birgina an’anaviy mavzudagi “Vatan” she’rini eslash kifoya:

 

O‘tmishning turfa rang qabatlariga

O‘ylarim bosh urib, qaqshaydi yodim:

Yer sharin mana shu sarhadlariga

Ilk bor tug‘ qadagan qaysi ajdodim?

 

Shoir hammaga tanish iboralar vositasida muqaddas tushunchaning moziydagi ildizlariga nigoh qaratadi, vatanparvarlik mavzusi ufqlarini kengaytiradi.

Uning bir qator ta’sirchan, muayyan masalalar yechimiga bag‘ishlangan publitsistik va ilmiy maqolalari el nazariga tushdi.

Shoir tarjimon sifatida taniqli rus shoirlaridan Ivan Bunin va Yevgeniy Yevtushenko she’rlaridan namunalarni o‘zbek tiliga o‘girdi.

Sirojiddin Rauf 2002 yilda “Shuhrat” medali bilan taqdirlangan.

 

“O‘zbek adiblari” (S. Mirvaliyev, R. Shokirova. Toshkent, G‘afur G‘ulom nomidagi adabiyot va san’at nashriyoti, 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.