Sa’dulla Hakim (1951)

0
90
marta ko‘rilgan.

Sa’dulla Hakim 1951 yil 25 martda Jizzax viloyati, Forish tumanidagi Garasha qishlog‘ida tug‘ildi. ToshDU (hozirgi O‘zbekiston Milliy universiteti)ning jurnalistika fakultetida tahsil oldi. Avvaliga “Saodat” jurnalida, so‘ng “O‘zbekiston adabiyoti va san’ati”, “O‘zbekiston ovozi” gazetalarida adabiyot va san’at bo‘limi mudiri, mas’ul kotib lavozimlarida faoliyat ko‘rsatdi. “Ma’rifat” gazetasiga rahbarlik qildi (1992–1996). Mas’ul lavozimlarda, ishladi, “Turkiston press” Axborot agentligida bosh direktor, “O‘zbekiston adabiyoti va san’ati” gazetasida bosh muharrir vazifalarida xizmat qildi.

Sa’dulla Hakimning “Hamal tonglari” (1981), “Sen kutgan bahor” (1986), “Yoz oqshomi” (1996), “Ona so‘z” (2000), “Saylanma” (2001), “Ko‘ngil yuzi” (2006), “Qo‘hna naql” (2011) she’riy kitoblari nashr etildi. Gyote, Pushkin, Lermontov, Yesenin, Yunus Emro kabi shoirlarning she’rlarini tarjima qildi. “Saylanma” kitobi uchun 2002 yili “Eng ulug‘, eng aziz” respublika tanlovi g‘olibi bo‘ldi. Ma’naviy hayotimizga oid “Esimda qolgan kunlar”, “Atom qa’riga sayohat” kabi publitsistik asarlari adabiy jamoatchilik nazariga tushdi. “Oqsaroy” (2001) manzumasida istiqlolimiz va davlat boshqaruvi ramziga aylangan Oqsaroy qarorgohi tarixiy-zamonaviy nuqtai nazardan mushtarak obraz sifatida tarannum etilsa, “Bola Botir” dostonida (2013) badiiy so‘zning ulkan maqsadlar va mustahkam e’tiqod yo‘lidagi o‘rni, ahamiyati tiniq obrazlar vositasida ochib beriladi.

Ayniqsa, uning tarixiy qahramonlikni ulug‘lovchi “Olis yulduz” dostoni muxlislar e’tiboriga tushdi. Dostonda shoirning adabiy-falsafiy konsepsiyasi, olam bilan odamni yaxlit uyg‘unlikda ko‘rish, tasvirlash yo‘sini o‘ziga xos tarzda ifoda etiladi.

Sa’dulla Hakim 2002 yilda “O‘zbekiston Respublikasida xizmat ko‘rsatgan madaniyat xodimi” unvoni bilan taqdirlangan.

 

“O‘zbek adiblari” (S. Mirvaliyev, R. Shokirova. Toshkent, G‘afur G‘ulom nomidagi adabiyot va san’at nashriyoti, 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.