Qamchibek Kenja (1946)

0
273
marta ko‘rilgan.

Qamchibek Kenja Andijonning 1946 yili Izboskan tumanida tug‘ildi. Toshkent davlat universiteti (hozirgi O‘zMU)ning avval jurnalistika, so‘ng filologiya fakultetlarida tahsil oldi (1964–1969).

Mehnat faoliyatini “O‘zbekiston madaniyati” (hozirgi “O‘zbekiston adabiyoti va san’ati”) gazetasida boshlab (1969–1979), keyin Izboskan tumani “Paxtakor” gazetasida adabiy xodim, bo‘lim mudiri bo‘ldi, maktablarda o‘qituvchilik qildi. 1980 yildan esa O‘zbekiston Yozuvchilar uyushmasi badiiy adabiyotni targ‘ib etish byurosining Andijon viloyatidagi vakili sifatida ish yuritdi. 1983 yili Toshkentga kelib, O‘zbekiston Yozuvchilar uyushmasi nasr kengashida adabiy maslahatchi lavozimida faoliyat ko‘rsatdi. 1985–2006 yillarda O‘zbekiston Yozuvchilar uyushmasi Andijon viloyati bo‘limining mas’ul kotibi bo‘ldi.

Qamchibek Kenja adabiyot dargohiga shoir sifatida kirib kelib, dastlab “Sog‘inch” she’riy to‘plamini (1975) chop ettirdi. Adibning ikkinchi kitobi “Yashil barg” hikoyalar to‘plami esa 1977 yilda bosildi.

Shundan so‘ng adibning “Ko‘ngil ko‘chalari” (1979), “Ishqing tushsa” (1981), “Orzumandlar” (1982), “Notanish gul” (1988), “Tog‘ yo‘lidagi bir oqshom” (1987), “Sohildagi suv parisi” (1993), “Qizil gullar” (1995), “Sohibjamol ayol siri” (1996), “Muhabbatni gunoh desalar” (1996), “Kulgubaxsh umr” (1997), “Boburiylardan biri” (2000), “Baxt qushi yoki ushalgan orzular” (2001), “Xamir uchidan patir yoxud kulcha hikoyalar” (2005), ikki jildli “Saylanma” (2006–2007), “Andijondan Bag‘dodgacha” (2007), “Buyuklar izidan” (2006), “Sevinchlarim va kuyinchlarim” (2010), “Toshqin” (qissa, 2010), “Ko‘ngil kechinmalari” (2011), “Palaxmon” (roman, 2011), “Jasorat” (ma’rifiy-biografik qissa, 2012), “Muhabbat badali”(2013), “Mashaqqat va jasorat”(2015), “Hayot hikmatlari” (2016) kabi she’riy, nasriy va publitsistik kitoblari dunyoga keldi.

Qamchibek Kenja Bobur nomli xalqaro ekspeditsiya a’zosi sifatida Boburiylar va boshqa buyuk ajdodlarimiz izidan Afg‘oniston, Eron, Pokiston, Hindiston, Bangladesh, Turkiya, Suriya, Iordaniya, Saudiya Arabistoni, Iroq kabi mamlakatlar bo‘ylab ijodiy safarlarda bo‘ldi. Ana shu safarlar taassurotlari asosida yaratilgan “Hind sorig‘a” (2000), “Andijondan Dakkagacha” (2003), “Buyuklar izidan” (2006), “Andijondan Bag‘dodgacha” (2007), “Buyuk Sohibqiron o‘tgan yo‘llarda” (2014) kabi badiiy safarnomalari yaratildi. U “Boburiylar izidan” (1993), “Bobur salomi” (1993), “Buyuk Bobur vorislari” (2002) nomli hujjatli-ommabop filmlar ssenariylari muallifi hamdir.

Qamchibek Kenja tarjimon sifatida A. Pushkin, X. Xeyne, Sh. Petefi, V. Bryusov, M. Svetlov, V. Firsov, Nazrul Islom kabi xorijlik shoir, yozuvchilarning she’r va dostonlari, nasriy asarlarini o‘zbek tiliga o‘girdi. Ayni paytda uning she’r va hikoyalari ham rus, ingliz, ukrain, qozoq, qirg‘iz, qoraqalpoq, uyg‘ur va boshqa xalqlar tillariga tarjima qilindi.

O‘zbekistonda xizmat ko‘rsatgan madaniyat xodimi Qamchibek Kenja 1998 yilda “Shuhrat” medali, 2004 yilda “Xalqaro Bobur mukofoti” bilan taqdirlandi. Respublika Yozuvchilar uyushmasining Istiqlolning 23 yilligiga bag‘ishlab o‘tkazilgan “Vatan uchun yashaylik” tanlovi g‘olibi bo‘ldi. 2014 yilda unga Zahiriddin Muhammad Bobur nomidagi Andijon davlat universitetining faxriy professori ilmiy unvoni berildi.

 

“O‘zbek adiblari” (S. Mirvaliyev, R. Shokirova. Toshkent, G‘afur G‘ulom nomidagi adabiyot va san’at nashriyoti, 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.