Nazarmat (1917–2009)

0
102
marta ko‘rilgan.

Jangchi shoir Nazarmat Egamnazarov 1917 yil 7 noyabrda Tojikiston Respublikasi Xo‘jand viloyati Nov qishlog‘ida dunyoga kelgan. U 1935 yilda o‘rta maktabni tugatgach, Samarqand Davlat universitetiga o‘qishga kiradi.

Nazarmat Ikkinchi jahon urushida vzvod komandiri, 1944–1947 yillarda “Front haqiqati” gazetasi xodimi vazifalarida xizmat qiladi. Armiyadan qaytgach, 1947–1954 yillarda hozirgi “O‘zbekiston ovozi”, 1955–1985 yillarda esa “Toshkent haqiqati” gazetalarida adabiyot va san’at bo‘limini boshqaradi.

Nazarmat ijodi 30-yillardan boshlangan bo‘lib, uning birinchi she’ri “Qo‘zichoq” 1934 yilda matbuotda e’lon qilingan. Birinchi to‘plami esa 1941 yilda “Yoshlik zavqi” nomi bilan nashr etiladi. Urush tufayli “Vatan ishqi” nomli ikkinchi to‘plami ancha kech ‒ 1949 yilda bosilgan. Shundan so‘ng uning yigirmadan ortiq she’riy, nasriy asarlari chop etiladi. Xususan, uning “Yashil dalalar” (1955), “Sir bo‘yi ‒ nur bo‘yi”(1959), “Tog‘dagi gulxanlar” (1962), “Nay sadosi” (1965), “Bahor qo‘shig‘i” (1968), “Shahrimiz bolalari” (1970), “Mangu olov” (1972), “Dostonlar” (1975), “Yo‘llar va gullar” (1977), “Mehrim-muhabbatim” (1983), “Tanlangan asarlar” (1987), “G‘unchalar” (1987), “Muhabbat taronalari” (1992) kitoblari keng kitobxonlar ommasiga yaxshi tanish.

Nazarmat nosir sifatida ham barakali ijod qilgan. Uning ocherk va hikoyalaridan tashkil topgan “Qirg‘oqdagi jang” (1965), “Burch yo‘li” (1966), “Janggohdagi qatralar” (1974), “Turnalar yo‘li” (1977), “Ona ko‘rsatgan yo‘l” kabi harbiy turkumdagi hikoya va ocherklari kitobxonlar e’tiborini qozongan.

Uning “Olovli tong” (1955), “Sayyod jasorati” (1972) qissalari harbiy hujjatli nasrimiz taraqqiyotiga muhim o‘rin tutadi. Bolalarga atab yozilgan “Shahrimiz bolalari”, “G‘unchalar” kabi she’riy to‘plamlari ham e’tiborga loyiq. Nazarmat shoir va nosir bo‘lishi bilan birga tarjimon hamdir. Uning Bedil, Jomiy, Nosir Xusrav, Firdavsiy, Mirshakar, M. Tursunzoda ijodidan qilgan tarjimalari mavjud.

Nazarmat “O‘zbekistonda xizmat ko‘rsatgan madaniyat xodimi” unvoni bilan taqdirlangan. Mustaqillikning yetti yilligi munosabati bilan unga “El-yurt hurmati” ordeni berilgan.

 

“O‘zbek adiblari” (S. Mirvaliyev, R. Shokirova. Toshkent, G‘afur G‘ulom nomidagi adabiyot va san’at nashriyoti 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.