Luqmon Bo‘rixon (1965)

0
190
marta ko‘rilgan.

Luqmon Bo‘rixon 1965 yilning 15 iyulida Qashqadaryo viloyati, G‘uzor tumanining Yangiobod qishlog‘ida tug‘ildi. 23-o‘rta maktabni bitirgach, 1983–1985 yillarda harbiy xizmatni o‘tadi. Toshkent davlat universitetining jurnalistika fakultetida (1986–1991) tahsil oldi. Shundan so‘ng “Turkiston”, “Ma’rifat” gazetalarida adabiy xodim, bo‘lim mudiri, “Yoshlik” jurnali bosh muharriri o‘rinbosari vazifalarida xizmat qildi.

“Begimqul katta” hikoyasi “Yoshlik” (1987) jurnalida chop etilib, ustozlar nazariga tushdi. Birinchi hikoyalar to‘plami “Yalangoyoq” (1991) “Cho‘lpon” nashriyotida chop etildi. “Jaziramadagi odamlar” romani ikki qayta (2005 va 2012) bosildi. “Sirli muallim” (2006) nomli qissasi o‘qituvchilar hayotidan olib yozilgan asar sifatida Xalq ta’limi vazirligi tanlovida (2006) g‘olib deb topildi. Navbatdagi “Xizr ko‘rgan yigit” (2007), “Temiryo‘l” (2009) romanlari ham muxlislar tomonidan katta qiziqish bilan qarshi olindi. Sermahsul ijodkorning “Tun qa’ridagi shu’la” (2002) nomli qissa va hikoyalar to‘plami, “Buyuk ipak yo‘li” (2012) badiiy-publitsistik maqolalar to‘plami, “Quyosh hali botmagan” qissalar to‘plami nashr etildi.

Badiiy-publitsistik maqolalari uchun xalqaro “Oltin qalam” (2009) tanlovi g‘olibi bo‘lgan Luqmon Bo‘rixonning adabiyot sohasidagi xizmatlari munosib baholangan: 2007 yilda “Shuhrat” medali va 2012 yilda “O‘zbekiston Respublikasida xizmat ko‘rsatgan madaniyat xodimi” unvoni bilan taqdirlangan.

 

“O‘zbek adiblari” (S. Mirvaliyev, R. Shokirova. Toshkent, G‘afur G‘ulom nomidagi adabiyot va san’at nashriyoti, 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.