Ikrom Otamurod (1951)

0
224
marta koʻrilgan.

Ikrom Otamurod 1951 yili Qashqadaryo viloyatining Kasbi tumanidagi Kasbi qishlogʻida tavallud topdi. Oʻrta maktabni tugatgach, 1969–1974 yillarda hozirgi Oʻzbekiston Milliy universitetning jurnalistika fakultetida tahsil koʻrdi.

1974–1975 yillarda Oʻzbekiston ensiklopediyasi nashriyotida muharrirlik qildi. 1975 yildan to shu kunga qadar “Sharq yulduzi” jurnalida avval adabiy xodim, soʻng sheʼriyat boʻlimining mudiri lavozimlarida ishlab kelmoqda.

Ikrom Otamurod tengdoshlari orasida falsafiy mushohadasining kengligi bilan ajralib turadi. Uning sheʼr va dostonlarida ustoz Maqsud Shayxzoda nafasi ufurib turadi. Shoirning “Vaqt ranglari” (1982), “Janub qushlari” (1984), “Toʻrgʻayli manzillar” (1985), “Ufqlar orti bepoyon” (1987), “Uzoqlashayotgan ogʻriq” (1987) sheʼriy kitoblari chop etilgan. Uning falastinlik shoir Muin Bsisuga bagʻishlangan “Yarador umid otlari” (1986) dostoni 80-yillar oʻzbek sheʼriyatida sezilarli voqea boʻldi. Dostonda xorijlik ijodkor obrazi orqali inson qalbining toʻlqinlari, mustaqillik haqidagi orzulari, ona yurt obrazi kuchli his-hayajon bilan ifodalangan.

Shoir falsafiy mushohada bilan yoʻgʻrilgan uslubiga sodiq qolib, 1990 yili “Uzoqlashayotgan ogʻriq” dostonini yaratdi. Bu asarda odamlarni tobora tark etib borayotgan eʼtiqod, burch, insoniylik tushunchalari qalb tugʻyoni, vijdon azobi, yurak qoni bilan badiiy tadqiq etilgan.

Soʻnggi yillarda shoirning “Sopol siniqlari” (1994), “Sen” (1996), “Ichkari va tashqari” (1997), “Istarim”, “Yobondagi yolgʻiz daraxt”, “Qush”, “Huviyyat” kabi kitob va dostonlari nashr etildi. “Ruhimning qaygʻusi” (1996), “Koʻnglim oʻzing” (2004), “Tavr” (2005), “Tanazzul” (2008), “Xaritaga tushmagan joy” (2011), “Muqaddar” (2012) majmualari shoirga katta shuhrat olib keldi.

Ikrom Otamurod taniqli tarjimon hamdir. U Uolt Uitmen, Pablo Neruda, Yevgeniy Yevtushenko, Oʻljas Sulaymon kabi shoirlarning sheʼr va dostonlarini oʻzbek tiliga oʻgirgan. Ayni paytda shoirning asarlari turk, arab, bulgʻor, rus, moldavan, ozarbayjon, qozoq, qirgʻiz, tojik, gruzin tillariga tarjima qilingan. Ikrom Otamurod 1999 yili “Doʻstlik” ordeni bilan taqdirlangan.

 

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.