Erkin Aʼzam (1950)

0
1567
marta koʻrilgan.

Erkin Aʼzam 1950 yili 10 avgustda Surxondaryo viloyatining Boysun tumanida tugʻildi. Toshkent Davlat universiteti (hozirgi OʻzMU)ning jurnalistika fakultetida tahsil oldi (1967–1972).

Oʻzbekiston radiosida muharrir (1972–1976), “Guliston” jurnalida xodim, adabiy kotib, (1976–1981), “Yoshlik” jurnalida boʻlim mudiri (1981–1986), Gʻafur Gʻulom nomidagi Adabiyot va sanʼat nashriyotida koʻp jildli asarlar tahririyati mudiri (1986–1992), Oʻzbekiston respublikasi Milliy axborot agentligi Bosh direktorining birinchi oʻrinbosari (1992–1994) lavozimlarida ishladi. Ikkinchi chaqiriq (1994–2004) Oʻzbekiston Oliy Majlisi deputatligiga saylandi. Hozirgi kunda “Tafakkur” jurnali bosh muharriri vazifasida xizmat qiladi.

Adibning oʻquvchilik yillarida yozilgan ilk “Inson” hikoyasi viloyat gazetasida bosildi (1966). Dastlabki “Chiroqlar oʻchmagan kecha” hikoyalar toʻplami 1977 yilda chop etildi.

1981 yilda nashr qilingan ikkinchi kitob – “Otoyining tugʻilgan yili” nomli qissa va hikoyalar toʻplami uchun muallif 1982 yilda Oʻzbekiston Yoshlar ittifoqi mukofoti bilan taqdirlandi. Shundan soʻng isteʼdodli adibning “Olam yam-yashil” (1984), “Mir v svetax” (1989), “Pakananing oshiq koʻngli” (2001), “Kechikayotgan odam” (2002), “Jannat oʻzi qaydadir” (2007), “Ertak bilan xayrlashuv” (2007), “Guli-guli” (2009), “Shovqin” (2001) kabi bir qator roman, qissa va hikoyalar toʻplamlari bosmadan chiqdi. “Jannat oʻzi qaydadir”, “Shajara”, “Farrosh kampirning tushi”, “Xonadon egasi”, “Tanho qayiq yoxud devonaning orzusi” nomli pyesalari respublikamiz teatrlarida muvaffaqiyatli sahnalashtirildi.

Erkin Aʼzamov kinodramaturgiyamiz rivojiga ham munosib hissa qoʻshib kelmoqda. Uning ssenariysi asosida tasvirga olingan “Chantrimore” (1990), “Piyoda” (1996) milliy kino sanʼatimizda yangilik boʻldi. Navbatdagi “Dilxiroj” (2001) filmi xalqaro miqyosda eʼtibor qozondi. Germaniya va Fransiya televideniyelari orqali namoyish etildi. Nusxasi Fukuoko (Yaponiya) kinomuzeyida saqlanadi; “Erkak” (2004) nomli filmi “Kinoshok” xalqaro kinofestivalida “Eng yaxshi ssenariy” nominatsiyasi boʻyicha gʻolib deb topildi, Vezul (Fransiya) xalqaro kinofestivalida Bosh sovringa (Gran-pri) sazovor boʻldi; “Zabarjad” (2007) – “Moskovskaya premyera” va MDH anjumanlarida maxsus diplom bilan taqdirlandi, Oʻzbekistondagi kinofestivalda “Eng yaxshi aktrisa” nominatsiyasi gʻolibi boʻldi; “Suv yoqalab” (2008) – “Zolotoy Vityaz” xalqaro kinoforumida (Moskva)Serebryanniʼy Vityaz” sovriniga sazovor boʻlib, Nyu-York shahrida oʻtkazilgan (AQSH) Osiyo filmlari kinofestivalida “Eng yaxshi aktyor” nominatsiyasi gʻolibi boʻldi; “Parizod” (2012) – “Kinoshok” xalqaro kinofestivalida Bosh sovringa sazovor boʻldi. “Jannat qaydadir” (2008), “Qarzdor” (2010) nomli filmlari ham respublikamiz kinoteatrlarida muvaffaqiyatli namoyish etildi.

Oʻzbekiston Respublikasida xizmat koʻrsatgan jurnalist Erkin Aʼzamning hikoya va qissalari rus, ukrain, belorus, qozoq, tojik, turkman, gruzin, bulgʻor, chet tillariga tarjima qilingan. 2015 yilda adibning roman va qissalardan iborat salmoqli toʻplami Angliya va Fransiyada ingliz va fransuz tillarida nashr etildi.

 

“Oʻzbek adiblari” (S. Mirvaliyev, R. Shokirova. Toshkent, Gʻafur Gʻulom nomidagi adabiyot va sanʼat nashriyoti, 2016) kitobidan.

MULOHAZA BILDIRISH

Mulohaza kiritilmadi!
Ismi sharifingizni kiriting.