Biz nimani oziqlantiryapmiz?

0
17
marta ko‘rilgan.

Bemor bo‘lishning bir yaxshi tomoni bor – o‘ylashga, mushohada qilishga vaqtingiz bemalol bo‘lar ekan. Ma’lumki, odamzod tana va ruh (jon)dan iborat bo‘ladi.

Olimlar o‘lim to‘shagida yotgan turli yoshdagi olti ming odamni tekshirib ko‘rib shunday xulosaga kelgan: bemorning joni uzilgan payti murda 0,04 gramm yengillasharkan. Demak, jonning og‘irligi 0,04 gramm kelarkan. Shunisi qiziqki, yangi tug‘ilgan chaqaloq o‘ladimi, 90 yoshli chol o‘ladimi, og‘irligi bir xil – 0,04 gramm. Demak, ruh qarimaydigan, tanaga bo‘ysunmaydigan, alohida yaralgan substansiya ekan. O‘ylab ko‘rsam, butun jamiyat ana shu substansiya uchun ishlar ekan. Og‘ir va yengil sanoat, transport, qurilish, oziq-ovqat sanoati, bichish-tikish, sartaroshxona va go‘zallik salonlari, restoranlar, poliklinikayu kasalxonalar tanamizga xizmat qilar ekan. Bularning hech biri ruhimizga kerak emas!

Qimmatbaho xorij mashinalarini minamiz, 80-90 kilo keladigan go‘shtimizni u yoqdan-bu yoqqa olib borish uchun kerak, ruhimizga keragi yo‘q – u uchib yuradi. Sovuq yeganimiz uchun kiyinamiz, ruh esa sovuq ham yemaydi, isib ham ketmaydi. Tanamiz uchun qor-yomg‘irdan to‘sadigan bir boshpana kerak, ruh uchun mutlaqo keragi yo‘q. Ruhga tilla taqinchoqlar ham kerak emas. Hatto armiya ham tanamizga xizmat qiladi – u yer-bu yerimizga o‘q tegishidan, tanamiz portlab ketishidan asraydi.

Xo‘sh, ruhimizga nima xizmat qiladi? Ruhning “oziqa”si nima? Qo‘sha-qo‘sha naqshinkor imoratlar, yaltir-yultir kiyim-kechak, duru gavhar kerak bo‘lmasa, unda ruh uchun nima kerak?

Ruhimiz u qadar injiq emas. Uning “non”i – Allohning kalomiyu adabiyot va san’at.

Shu payt xayol surishning beliga tepib, hamshira kelib qoldi:

 – Kapilnitsa olami-iz!..

Ignadan ilma-teshik bo‘lib ketgan bilagimga yana igna tiqib chiqib ketdi.

Bular tag‘in tanamni davolashyapti…

 

Sharof BOSHBEKOV

 

od-press.uz

MULOHAZA BILDIRISH

Mulohaza kiritilmadi!
Ismi sharifingizni kiriting.